ಐರಾ ಸಿನಿಮಾ: ದ್ವಿಪಾತ್ರದಲ್ಲಿ ನಯನತಾರಾ

ಮಾರ್ಚ್ 28ರಂದು ತೆರೆಕಾಣಲಿರುವ ತಮಿಳು ಸಿನಿಮಾ ‘ಐರಾ‘ದಲ್ಲಿ ನಯನತಾರಾ ಮುಖ್ಯಭೂಮಿಕೆಯಲ್ಲಿ ನಟಿಸಿದ್ದಾರೆ. 

ಈ ಮೊದಲು ಅವರು ಕಂಡಿರದಂತಹ ವಿಚಿತ್ರವಾದ ಲುಕ್‌ನಲ್ಲಿ ಅವರನ್ನು ನೋಡಬಹುದು ಎಂದು ಸಿನಿಮಾ ತಂಡ ಹೇಳಿಕೊಂಡಿದೆ. 

ವಿಶೇಷ ಎಂದರೆ ಈ ಸಿನಿಮಾದಲ್ಲಿ ನಯನತಾರಾ ದ್ವಿಪಾತ್ರದಲ್ಲಿ ನಟಿಸಲಿದ್ದಾರೆ. ಹಳ್ಳಿ ಹುಡುಗಿ ರೀತಿಯ ಮೇಕಪ್‌, ಗದ್ದೆಯಲ್ಲಿ ಓಡಾಡುವ ಝಲಕ್‌, ಆಗಾಗ ಬಂದು ಕಾಡುವ ದೆವ್ವ ಎಲ್ಲವೂ ಸಾಕಷ್ಟು ಕುತೂಹಲ ಸೃಷ್ಟಿಸಿದೆ.

ಕೆ.ಎಂ. ಸರ್ಜುನ್‌ ಈ ಸಿನಿಮಾವನ್ನು ನಿರ್ದೇಶಿಸಿದ್ದಾರೆ. ನಯನತಾರಾ ಅವರೊಂದಿಗೆ ಕಲೈಯರಸನ್‌, ಯೋಗಿ ಬಾಬು ಕೂಡ ನಟಿಸಿದ್ದಾರೆ. ಕೋಟಪಾಡಿ ಜೆ.ರಾಜೇಶ್‌ ಅವರ ನಿರ್ಮಾಣವಿದೆ. 

ಜನವರಿ 5ರಂದು ಟೀಸರ್ ಬಿಡುಗಡೆಯಾಗಿತ್ತು. ಇದನ್ನು ನೋಡಿದ ಲಕ್ಷಾಂತರ ಜನರು ನಯನತಾರಾ ಅವರ ಭಿನ್ನವಾದ ಅಭಿವ್ಯಕ್ತಿಯನ್ನು ಕಾಣಲು ಕಾತರರಾಗಿದ್ದಾರೆ.