ಬೆಂಗಳೂರು: ಬಾಲಿವುಡ್ ಮಂದಿಯ ಶ್ವಾನಪ್ರೇಮ ಹಲವು ಬಾರಿ ಸಾಮಾಜಿಕ ತಾಣಗಳಲ್ಲಿ ಪ್ರಕಟವಾಗುತ್ತಲೇ ಇರುತ್ತದೆ.
ನಟ ವರುಣ್ ಧವನ್ ಇತ್ತೀಚೆಗೆ ಮನೆಗೆ ಪುಟ್ಟ ಬೀಗಲ್ ನಾಯಿಮರಿಯನ್ನು ತಂದಿದ್ದಾರೆ. ಆದರೆ ನಾಯಿಮರಿಗೆ ಏನು ಹೆಸರಿಡುವುದು ಎನ್ನುವ ಕುರಿತು ಅವರಿಗೆ ಗೊಂದಲ ಉಂಟಾಗಿತ್ತು.
ನಾಯಿಮರಿಗೆ ಸೂಕ್ತ ಹೆಸರನ್ನು ಸೂಚಿಸಿ, ಅವನಿಗಿನ್ನೂ ನಾಮಕರಣ ಆಗಿಲ್ಲ ಎಂದು ವರುಣ್ ಧವನ್ ಅಭಿಮಾನಿಗಳನ್ನು ಕೋರಿಕೊಂಡಿದ್ದರು.
ವರುಣ್ ಪೋಸ್ಟ್‌ಗೆ ಸಾವಿರಾರು ಮಂದಿ ಪ್ರತಿಕ್ರಿಯಿಸಿ, ವಿವಿಧ ಹೆಸರುಗಳನ್ನು ಬೀಗಲ್‌ಗೆ ಸೂಚಿಸಿದ್ದರು. ಅದರಲ್ಲಿ ವರುಣ್ ಜಾಯ್ ಎನ್ನುವ ಹೆಸರನ್ನು ಬೀಗಲ್ ನಾಯಿಮರಿಗೆ ಆಯ್ಕೆ ಮಾಡಿಕೊಂಡಿದ್ದಾರೆ.
ಮನೆಯ ಹೊಸ ಸದಸ್ಯನ ಕುರಿತು ವರುಣ್ ಇನ್‌ಸ್ಟಾಗ್ರಾಂನಲ್ಲಿ ಪೋಸ್ಟ್ ಮಾಡಿದ್ದು, ಮೈ ಬ್ಯೂಟಿಫುಲ್ ಬಾಯ್ ಜಾಯ್ ಎಂದು ಅಡಿಬರಹ ನೀಡಿ, ನಾಯಿಮರಿಯನ್ನು ಎತ್ತಿಕೊಂಡಿರುವ ಫೋಟೊ ಪೋಸ್ಟ್ ಮಾಡಿದ್ದಾರೆ.
