ಟ್ರೈಲರ್‌ ಬಿಡುಗಡೆ: ಅದ್ಯಾರು ವ್ಹೀಲ್‌ಚೇರ್‌ನಲ್ಲಿ ರೋಮಿಯೋ?

‘ವ್ಹೀಲ್‌ಚೇರ್ ರೋಮಿಯೋ’ ಚಿತ್ರದ ಟ್ರೈಲರ್‌ ಬಿಡುಗಡೆಯಾಗಿದ್ದು ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಸಹ ನಿರ್ದೇಶನ, ಸಂಭಾಷಣೆಕಾರರಾಗಿ ಕೆಲಸ ಮಾಡಿದ್ದ ಜಿ. ನಟರಾಜ್‌ ಅವರು ಈ ಚಿತ್ರದ ನಿರ್ದೇಶಕರು.

ಅಂಗವಿಕಲನೊಬ್ಬ ತಾನು ಮದುವೆ ಆಗಬೇಕು ಎಂದು ಆಸೆಪಟ್ಟಾಗ ಅದನ್ನು ಪೂರೈಸಲು ತಂದೆಯ ಪ್ರಯತ್ನ ಈ ಚಿತ್ರದ ಕಥಾಹಂದರ.

ರಾಮ್‌ಚೇತನ್ ಈ ಚಿತ್ರದ ನಾಯಕ. ನಟಿ ಮಯೂರಿ ಅವರು ಲೈಂಗಿಕ ಕಾರ್ಯಕರ್ತೆಯ ಪಾತ್ರ ನಿರ್ವಹಿಸಿದ್ದಾರೆ. ಹಿರಿಯನಟ ಸುಚೇಂದ್ರ ಪ್ರಸಾದ್ ವಿಕಲಾಂಗ ನಾಯಕನ ತಂದೆಯಾಗಿ ನಟಿಸಿದ್ದಾರೆ. ಚಿತ್ರದಲ್ಲಿ ನಾಯಕ ಗಾಲಿ ಕುರ್ಚಿಯಲ್ಲಿ ಕುಳಿತೇ ಇರುವ ಸನ್ನಿವೇಶ. ಈ ಸನ್ನಿವೇಶದ ಸುತ್ತಲೇ ಕಥೆ ಇದೆ ಎನ್ನುತ್ತಾರೆ ನಿರ್ದೇಶಕ ನಟರಾಜ್‌.

‘ದೈಹಿಕ ಅಂಗವಿಕಲತೆಗಿಂತ ಮಾನಸಿಕ ಅಂಗವಿಕಲತೆ ನಮ್ಮಲ್ಲಿ ತುಂಬಾ ಇದೆ. ತಂದೆಯೊಬ್ಬ ಮಗನ ಆಸೆ ಪೂರೈಸಲು ಹೊರಟಾಗ ಎದುರಾಗುವ ಸಂಕಷ್ಟಗಳು, ತಾಕಲಾಟಗಳು ಈ ಚಿತ್ರದಲ್ಲಿವೆ. ಹೃದಯಕ್ಕೆ ಹತ್ತಿರವಾಗುವ ಸಂಗತಿಗಳು ಕಥೆಯಲ್ಲಿ ಬಂದುಹೋಗುತ್ತವೆ’ ಎಂದರು ನಟರಾಜ್‌.

ಚಿತ್ರದ ನಾಯಕ ರಾಮ್ ಚೇತನ್ ಮಾತನಾಡಿ, ಈ ಮೊದಲು ಕೆಲವು ಧಾರಾವಾಹಿಗಳಲ್ಲಿ  ನಟಿಸಿದ್ದೆ. ಮೊದಲ ಚಿತ್ರದಲ್ಲೇ ಅಭಿನಯಕ್ಕೆ ಸಾಕಷ್ಟು ಅವಕಾಶವಿತ್ತು. ನಮ್ಮ ಚಿತ್ರಕ್ಕೆ ಸುಚೇಂದ್ರಪ್ರಸಾದ್, ರಂಗಾಯಣ ರಘು, ತಬಲಾನಾಣಿ ಇವರೆಲ್ಲ ಆಧಾರ ಸ್ತಂಭಗಳು ಎಂದರು. ಈ ಚಿತ್ರಕ್ಕೆ ಟ್ರಾವೆಲ್ ಕಂಪನಿ ನಡೆಸುತ್ತಿರುವ ವೆಂಕಟಾಚಲಯ್ಯ(ವೆಂಕಟೇಶ್) ಹಾಗೂ ಶ್ರೀಮತಿ ಭಾರತಿ ವೆಂಕಟೇಶ್ ಬಂಡವಾಳ ಹೂಡಿದ್ದಾರೆ.

ನಿರ್ದೇಶಕ ಜಿ.ನಟರಾಜ್ ಮಾತನಾಡಿ, ‘ಚಿತ್ರದಲ್ಲಿ ಶೇ 60ರಷ್ಟು ಸಂಭಾಷಣೆ, ಶೇ 40ರಷ್ಟು ನಾಟಕೀಯ ಸನ್ನಿವೇಶ ಇರುತ್ತದೆ’ ಎಂದರು. ಚಿತ್ರಕ್ಕೆ ಬಿ.ಜೆ. ಭರತ್‌ ಸಂಗೀತ ನಿರ್ದೇಶನ ಇದೆ.