ಡ್ರಗ್ಸ್‌ ಪ್ರಕರಣ: ಇಂದು ಅನುಶ್ರೀ ವಿಚಾರಣೆ ಸಾಧ್ಯತೆ

ಮಂಗಳೂರು: ಡ್ರಗ್ಸ್‌ ಪ್ರಕರಣಕ್ಕೆ ಸಂಬಂಧಿಸಿದಂತೆ ನಿರೂಪಕಿ ಅನುಶ್ರೀ ವಿಚಾರಣೆಗೆ ಶನಿವಾರ ಬೆಳಿಗ್ಗೆ ಹಾಜರಾಗುವ ಸಾಧ್ಯತೆ ಇದೆ.

ಸಿಸಿಬಿ ಪೊಲೀಸರು ಇದೇ26ರಂದು ವಿಚಾರಣೆಗೆ ಹಾಜರಾಗುವಂತೆ ಅನುಶ್ರೀಗೆ ನೋಟಿಸ್‌ ನೀಡಿದ್ದರು. ಆದರೆ, ಶುಕ್ರವಾರ ಬೆಳಿಗ್ಗೆಯೇ ವಿಚಾರಣೆಗೆ ಹಾಜರಾಗುವುದಾಗಿ ತಿಳಿಸಿದ್ದ ಅನುಶ್ರೀ ಸಂಜೆ ವೇಳೆಗೆ ಪಾಂಡೇಶ್ವರ ಠಾಣೆಗೆ ಬಂದಿದ್ದರಾದರೂ, ಪೊಲೀಸರು ಅವರ ವಿಚಾರಣೆ ನಡೆಸಲಿಲ್ಲ.

ಮಧ್ಯಾಹ್ನದವರೆಗೂ ಡಿಸಿಪಿ ವಿನಯ್ ಗಾಂವ್ಕರ್‌ ನೇತೃತ್ವದ ತಂಡ ಕಾದು ಕುಳಿತಿತ್ತು. ಆದರೆ, ಅನುಶ್ರೀ ಬಾರದಿದ್ದರಿಂದ ತಂಡ ನಂತರ ತಮ್ಮ ಕೆಲಸಕ್ಕೆ ಮರಳಿತು.

ಅನುಶ್ರೀ ಬೆಳಿಗ್ಗೆ ವಿಚಾರಣೆಗೆ ಹಾಜರಾಗದೇ ಇದ್ದುದರಿಂದ ಪೊಲೀಸರ ತಂಡ ಆರೋಪಿಗಳಾದ ಕಿಶೋರ್ ಶೆಟ್ಟಿ, ಅಕೀಲ್‌ ನೌಶೀಲ್‌ ಅವರನ್ನು ವೆನ್ಲಾಕ್‌ ಸರ್ಕಾರಿ ಆಸ್ಪತ್ರೆಯಲ್ಲಿ ವೈದ್ಯಕೀಯ ತಪಾಸಣೆ ಬಳಿಕ, ವಿಡಿಯೊ ಕಾನ್ಫರೆನ್ಸ್ ಮೂಲಕ ಕೋರ್ಟ್‌ಗೆ ಹಾಜರು ಪಡಿಸಿತು. ಇಬ್ಬರಿಗೂ ಅಕ್ಟೋಬರ್‌ 9ರವರೆಗೆ ನ್ಯಾಯಾಂಗ ಬಂಧನ ವಿಧಿಸಲಾಗಿದೆ.