ಇದೇ ಮುನೀರ್ ಅವರು ಹಿಂದೊಮ್ಮೆ ‘ಕಾಶ್ಮೀರವು ಪಾಕಿಸ್ತಾನದ ಕಂಠನಾಳ’ ಎಂದಿದ್ದರು. ಆದಾದ ಕೆಲವೇ ದಿನಗಳಲ್ಲಿ ಪಹಲ್ಗಾಮ್ ಮೇಲೆ ಉಗ್ರರು ದಾಳಿ ನಡೆಸಿ 26 ಪ್ರವಾಸಿಗರನ್ನು ಹತ್ಯೆ ಮಾಡಿದ್ದರು. ಭಯೋತ್ಪಾದಕರ ದಾಳಿಗೆ ಮುನೀರ್ ಅವರ ಆ ಮಾತೇ ಪ್ರೇರಣೆ ಎನ್ನಲಾಗಿತ್ತು. ಈಗ ಅಮೆರಿಕದ ನೆಲದಿಂದ ಅಂಥವೇ ಪ್ರಚೋದನಕಾರಿ ಮಾತುಗಳನ್ನು ಆಡಿದ್ದಾರೆ.

ಅಣ್ವಸ್ತ್ರ ಹೊಂದಿರುವ ಯಾವುದೇ ರಾಷ್ಟ್ರವು, ಮತ್ತೊಂದು ರಾಷ್ಟ್ರದ ಮೇಲೆ ಅಣ್ವಸ್ತ್ರ ಪ್ರಯೋಗಿಸುವುದು ಸುಲಭ ಅಲ್ಲ. ಆದರೂ ಪಾಕಿಸ್ತಾನವು ಹಿಂದಿನಿಂದಲೂ ಭಾರತವನ್ನು ಗುರಿಯಾಗಿಸಿಕೊಂಡು ಆಗಿಂದಾಗ್ಗೆ ಈ ಬಗ್ಗೆ ಪುನರುಚ್ಚಾರ ಮಾಡುತ್ತಿದ್ದು, ಅದನ್ನೇ ಚಾಳಿಯಾಗಿಸಿಕೊಂಡಿದೆ. 2002ರಲ್ಲಿ ಅಧ್ಯಕ್ಷರಾಗಿದ್ದ ಪರ್ವೇಜ್ ಮುಷರಫ್ ಅವರು, ‘ಪಾಕಿಸ್ತಾನದ ಅಣ್ವಸ್ತ್ರಗಳ ಏಕೈಕ ಗುರಿ ಭಾರತವಾಗಿದ್ದು, ದೇಶದ ಅಸ್ತಿತ್ವಕ್ಕೆ ಆತಂಕ ಎದುರಾದಾಗ ಅವುಗಳನ್ನು ಬಳಸಲಾಗುವುದು’ ಎಂದು ಹೇಳಿದ್ದರು.

ಅಮೆರಿಕವು ಜಪಾನ್‌ನ ನಾಗಸಾಕಿ ಮೇಲೆ ಬಾಂಬ್ ಹಾಕಿದ 80ನೇ ವಾರ್ಷಿಕ ದಿನದಂದೇ ಮುನೀರ್ ಅಮೆರಿಕದಿಂದ ಅಣ್ವಸ್ತ್ರ ದಾಳಿಯ ಬಗ್ಗೆ ಮಾತನಾಡಿದ್ದಾರೆ. ಆದರೆ, ಅಮೆರಿಕ ಇದರ ಬಗ್ಗೆ ಮೌನವಾಗಿದೆ. ಸುಂಕಕ್ಕೆ ಸಂಬಂಧಿಸಿದ ಭಾರತ–ಅಮೆರಿಕ ಮಾತುಕತೆ ಯಶಸ್ವಿಯಾಗದೇ ಇರುವುದು, ಭಾರತದ ಉತ್ಪನ್ನಗಳ ಮೇಲೆ ಅಮೆರಿಕ ಶೇ 50ರಷ್ಟು ಸುಂಕ ಹೇರಿರುವುದು.. ಇವೇ ಮುಂತಾದ ಕಾರಣಗಳಿಂದ ಭಾರತ ಮತ್ತು ಅಮೆರಿಕ ಸಂಬಂಧ ಹಳಸಿದೆ. ಇದೇ ವೇಳೆ ಪಾಕ್ ಅಮೆರಿಕಕ್ಕೆ ಹೆಚ್ಚು ಹತ್ತಿರವಾಗಿದ್ದು, ತನ್ನ ಅದ್ಭುತ ಪಾಲುದಾರ ಎಂದು ಪಾಕ್ ಅನ್ನು ಅಮೆರಿಕ ಬಣ್ಣಿಸಿದೆ. ಪಾಕಿಸ್ತಾನದಂಥ ದುರ್ಬಲ ಹಾಗೂ ಅಸ್ಥಿರ ರಾಜಕೀಯ ಪರಿಸ್ಥಿತಿಯ ದೇಶವನ್ನು ಅಮೆರಿಕ ತನ್ನ ಕೈಗೊಂಬೆಯಂತೆ ಮಾಡಿಕೊಳ್ಳಲು ಯತ್ನಿಸುತ್ತಿದೆ. ಆಸಿಮ್ ಮುನೀರ್ ಅವರ ಹೇಳಿಕೆಯನ್ನು ಈ ನೆಲೆಯಲ್ಲಿಯೂ ಅರ್ಥೈಸಲಾಗುತ್ತಿದೆ.