ನವದೆಹಲಿ: ಅಮೆರಿಕದ ಸಂಸ್ಥೆಯಿಂದ ಲೀಸ್‌ಗೆ ಪಡೆಯಲಾಗಿರುವ ಎರಡು ಪ್ರಿಡೇಟರ್ ಡ್ರೋನ್‌ಗಳನ್ನು ಭಾರತೀಯ ನೌಕಾಪಡೆಗೆ ನಿಯೋಜನೆ ಮಾಡಲಾಗಿದೆ ಎಂದು ಎಎನ್‌ಐ ಸುದ್ದಿಸಂಸ್ಥೆ ವರದಿ ಮಾಡಿದೆ.
ಇವುಗಳನ್ನು ಹಿಂದೂ ಮಹಾಸಾಗರ ಪ್ರದೇಶದಲ್ಲಿ ಕಣ್ಗಾವಲಿಗೆ ಬಳಸಲಾಗುವುದು. ಚೀನಾ ಜತೆಗಿನ ನೈಜ ನಿಯಂತ್ರಣ ರೇಖೆಯಲ್ಲಿ (ಎಲ್‌ಎಸಿ) ಕಣ್ಗಾವಲಿಗೂ ಇದನ್ನು ಬಳಸುವ ಸಾಧ್ಯತೆ ಇದೆ ಎಂದು ವರದಿ ಉಲ್ಲೇಖಿಸಿದೆ.
ಭಾರತ–ಚೀನಾ ಗಡಿ ಸಂಘರ್ಷದ ಹಿನ್ನೆಲೆಯಲ್ಲಿ ರಕ್ಷಣಾ ಸಚಿವಾಲಯವು ನೀಡಿರುವ ತುರ್ತು ಖರೀದಿ ಅಧಿಕಾರ ಬಳಸಿಕೊಂಡು ಈ ಡ್ರೋನ್‌ಗಳನ್ನು ಖರೀದಿಸಲಾಗಿದೆ. ನವೆಂಬರ್ 2ನೇ ವಾರ ಈ ಡ್ರೋನ್‌ಗಳು ಭಾರತಕ್ಕೆ ಬಂದಿವೆ. ಇವುಗಳನ್ನು ನವೆಂಬರ್ 21ರಿಂದ ತಮಿಳುನಾಡಿನ ಅರಕೋಣಂ ನೌಕಾನೆಲೆಯಲ್ಲಿ ಕಾರ್ಯಾಚರಣೆಗೆ ನಿಯೋಜಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.
ಡ್ರೋನ್‌ಗಳು ಈಗಾಗಲೇ ಕಾರ್ಯಾಚರಣೆ ಆರಂಭಿಸಿವೆ. 30 ಗಂಟೆಗಳಿಗೂ ಹೆಚ್ಚು ಸಮಯ ಕಾರ್ಯಾಚರಣೆ ನಡೆಸಬಲ್ಲ ಇವು ಸಾಗರ ಪಡೆಗಳಿಗೆ ದೊಡ್ಡ ಸ್ವತ್ತಾಗಲಿವೆ ಎಂದೂ ಮೂಲಗಳು ಹೇಳಿವೆ.
