ನೂರ್‌ ಜಹಾನ್ ತಳಿಯ ಒಂದು ಮಾವಿನ ಹಣ್ಣಿನ ತೂಕ ಬರೋಬರಿ 4 ಕೆ.ಜಿ; ₹2,000 ಬೆಲೆ!

ಇಂದೋರ್‌ನಿಂದ 250 ಕಿಮೀ ದೂರದಲ್ಲಿರುವ ಬುಡಕಟ್ಟು ಪ್ರಾಬಲ್ಯದ ಅಲಿರಾಜಪುರ ಜಿಲ್ಲೆಯ ಕತ್ತಿವಾಡ ಪ್ರದೇಶದಲ್ಲಿ ನೂರ್‌ ಜಹಾನ್ ತಳಿಯ ಮಾವಿನ ಮರಗಳು ಕಂಡುಬರುತ್ತವೆ.

‘ಈ ವರ್ಷ ಮೂರು ಮರಗಳಲ್ಲಿ ಕನಿಷ್ಠ 250 ಮಾವಿನ ಹಣ್ಣುಗಳು ಬೆಳೆದಿವೆ. ಈ ಹಣ್ಣುಗಳು ಜೂನ್ 15ರೊಳಗೆ ಮಾರಾಟಕ್ಕೆ ಲಭ್ಯವಾಗಲಿವೆ. ಪ್ರತಿ ಮಾವಿನ ಹಣ್ಣು ಗರಿಷ್ಠ ತೂಕ 4 ಕೆ.ಜಿ ತೂಕ ಬರುತ್ತದೆ ಎಂದು ಅಂದಾಜಿಸಿದ್ದೇವೆ’ ಎಂದು ಮಾವು ಬೆಳೆಗಾರ ಶಿವರಾಜ್ ಸಿಂಗ್ ಜಾಧವ್ ‘ಪಿಟಿಐ’ಗೆ ತಿಳಿಸಿದ್ದಾರೆ.

ಓದಿ...ಕ್ರೀಡಾಂಗಣದಲ್ಲಿ ಆರ್‌ಸಿಬಿ ಅಭಿಮಾನಿಗೆ ಪ್ರೇಮ ನಿವೇದನೆ ಮಾಡಿದ ಯುವತಿ: ವಿಡಿಯೊ

ಕಳೆದ ವರ್ಷ ಪ್ರತಿ ಹಣ್ಣು ಸರಾಸರಿ 3.80 ಕೆ.ಜಿ ತೂಕ ಬಂದಿತ್ತು. ಆದರೆ, ಈ ಬಾರಿ ಹವಾಮಾನ ವೈಪರೀತ್ಯದಿಂದ ಮರಗಳಲ್ಲಿ ಹೂವುಗಳು ಉದುರಿ ಹೋಗಿದ್ದು, ಫಸಲು ಕಡಿಮೆಯಾಗಿದೆ ಎಂದು ಶಿವರಾಜ್ ಹೇಳಿದ್ದಾರೆ.

ಈ ಬಾರಿ ಪ್ರತಿ ಕೆ.ಜಿ ಮಾವಿನ ಹಣ್ಣಿಗೆ ₹ 1,000 ರಿಂದ ₹ 2,000 ರವರೆಗೆ ಬೆಲೆ ನಿಗದಿ ಮಾಡಿದ್ದೇವೆ. ಕಳೆದ ಬಾರಿ ಪ್ರತಿ ಕೆ.ಜಿಗೆ ₹ 500 ರಿಂದ ₹ 1,500 ರಂತೆ ಮಾರಾಟ ಮಾಡಲಾಗಿತ್ತು ಎಂದು ಶಿವರಾಜ್ ಮಾಹಿತಿ ನೀಡಿದ್ದಾರೆ.

ಅನೇಕರು ಈಗಾಗಲೇ ಮುಂಗಡವಾಗಿ ಹಣ್ಣುಗಳನ್ನು ಕಾಯ್ದಿರಿಸಲು ಕರೆ ಮಾಡುತ್ತಿದ್ದಾರೆ. ಆದರೆ, ಹೆಚ್ಚು ಮಳೆಯಾಗುವ ಸಾಧ್ಯತೆ ಇರುವುದರಿಂದ ಹೆಚ್ಚಿನ ಪ್ರಮಾಣದ ಬುಕ್ಕಿಂಗ್ ತೆಗೆದುಕೊಳ್ಳಲಾಗುತ್ತಿಲ್ಲ ಎಂದಿದ್ದಾರೆ.

ಓದಿ:ನೆಲ್ಸನ್ ನಿರ್ದೇಶನದ ಹೊಸ ಚಿತ್ರದಲ್ಲಿ ರಜನಿಕಾಂತ್ –ಶಿವರಾಜ್‌ಕುಮಾರ್‌ ನಟನೆ?

ಅಫ್ಘಾನಿಸ್ತಾನ ಮೂಲದ ನೂರ್‌ ಜಹಾನ್ ತಳಿಯ ಮಾವಿನ ಹಣ್ಣು 1 ಅಡಿ ಉದ್ದ, 4 ಕೆ.ಜಿ ತೂಕ ಇರಲಿದೆ. ಜನವರಿ ಅಥವಾ ಫೆಬ್ರುವರಿ ವೇಳೆಗೆ ಈ ಮರಗಳು ಹೂವು (ಫಸಲು) ಬಿಡಲು ಪ್ರಾರಂಭಿಸುತ್ತವೆ. ಜೂನ್ 15ರೊಳಗೆ ಹಣ್ಣು ಮಾರುಕಟ್ಟೆಗೆ ಲಗ್ಗೆ ಇಡುತ್ತದೆ. ಆದರೆ ಈ ಬಾರಿ ಹವಾಮಾನ ವೈಪರಿತ್ಯದಿಂದಾಗಿ ಫಸಲಿನ ಪ್ರಮಾಣ ಕಡಿಮೆಯಾಗಿದೆ ಎಂದು ತೋಟಗಾರಿಕಾ ತಜ್ಞರು ಮಾಹಿತಿ ನೀಡಿದ್ದಾರೆ.