ಬೆಂಗಳೂರು: ‘ಭಾರತವು ಪ್ರಾದೇಶಿಕ ವ್ಯಾಪಾರ ಒಪ್ಪಂದವನ್ನು (ಆರ್‌ಟಿಎ) ಬೆಂಬಲಿಸಬೇಕು. ಜೊತೆಗೆ ಇದರಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳಬೇಕು’ ಎಂದು ಅಮೆರಿಕದ ಕಾನ್ಸಾಸ್‌ ಕಾನೂನು ವಿಶ್ವವಿದ್ಯಾಲಯದ ಪ್ರಾಧ್ಯಾಪಕ ರಾಜ್‌ ಭಲಾ ಅಭಿಪ್ರಾಯಪಟ್ಟರು.
ಸಿಎಂಆರ್‌ ಕಾನೂನು ವಿಶ್ವವಿದ್ಯಾಲಯ ಶುಕ್ರವಾರ ಹಮ್ಮಿಕೊಂಡಿದ್ದ ‘ಅಂತರರಾಷ್ಟ್ರೀಯ ವ್ಯಾಪಾರ ಕಾನೂನಿನಲ್ಲಿ ಹೊಸ ಪ್ರವೃತ್ತಿಗಳು’ ಕುರಿತ ಆನ್‌ಲೈನ್‌ ವಿಚಾರ ಸಂಕಿರಣದಲ್ಲಿ ಅವರು ಮಾತನಾಡಿದರು.
‘ಆರ್‌ಟಿಎ ಒಪ್ಪಂದದಲ್ಲಿ ಚೀನಾ ಪ್ರಾಬಲ್ಯ ಹೊಂದಿದೆ. ಈ ಕಾರಣಕ್ಕಾಗಿ ಭಾರತವು ಇದನ್ನು ಬೆಂಬಲಿಸಲು ಹಿಂದೇಟು ಹಾಕುತ್ತಿದೆ. ಅಂತರರಾಷ್ಟ್ರೀಯ ವ್ಯಾಪಾರದಲ್ಲಿ ಹೊಸ ಕ್ರಾಂತಿಯಾಗಬೇಕು. ದೇಶೀಯವಾಗಿ ಹಲವು ಸುಧಾರಣೆಗಳಾದಾಗ ಮಾತ್ರ ಇದು ಸಾಧ್ಯ’ ಎಂದರು.
ಬೆರ್ನ್‌ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕ ಪೀಟರ್‌ ಎಲ್‌.ಎಚ್‌.ವ್ಯಾನ್‌ ಡೆನ್‌ ಬಾಷ್‌ ‘21ನೇ ಶತಮಾನವು ಸವಾಲುಗಳ ಯುಗ. ಹೀಗಾಗಿ ಅಂತರರಾಷ್ಟ್ರೀಯ ವ್ಯಾಪಾರ ನೀತಿಯ ಪುಸ್ತಕದಲ್ಲಿ ಕೆಲ ಬದಲಾವಣೆಗಳಾಗಬೇಕಿದೆ. ಡಿಜಿಟಲೀಕರಣವು ಬಹುಪಕ್ಷೀಯ ವ್ಯಾಪಾರ ವ್ಯವಸ್ಥೆಯಲ್ಲಿ ಹೊಸ ಮನ್ವಂತರ ಸೃಷ್ಟಿಸಲಿದೆ’ ಎಂದು ಹೇಳಿದರು.
‘ಹವಾಮಾನ ಬದಲಾವಣೆ, ರಾಷ್ಟ್ರೀಯ ಭದ್ರತೆ, ಮಾನವ ಹಕ್ಕುಗಳು ಮತ್ತು ಇ–ವಾಣಿಜ್ಯ. ಇವು ಅಂತರರಾಷ್ಟ್ರೀಯ ವ್ಯಾಪಾರ ಮಾತುಕತೆಯ ಹೊಸ ಅಂಶಗಳಾಗಿವೆ’ ಎಂದು ಡೆನ್‌ ಬಾಷ್‌ ಹಾಗೂ ರಾಜ್‌ ಭಲಾ ತಿಳಿಸಿದರು.
