ಸುಂಟಿಕೊಪ್ಪ: ಸುಂಟಿಕೊಪ್ಪ ಗ್ರಾಮ ಪಂಚಾಯಿತಿಯ ಹಲವು ಪೌರ ಕಾರ್ಮಿಕರಿಗೆ ಕೊರೊನಾ ಮತ್ತು ಅನಾರೋಗ್ಯಪೀಡಿತರಾದ ಹಿನ್ನೆಲೆಯಲ್ಲಿ ಪಟ್ಟಣ ಮತ್ತು ವಿವಿಧ ಬಡಾವಣೆಗಳಲ್ಲಿ ಕಸದ ವಿಲೇವಾರಿಗೆ ತೊಂದರೆಯಾಗದಂತೆ ಬುಧವಾರ ಪಿಡಿಒ ವೇಣುಗೋಪಾಲ್, ಸದಸ್ಯರಾದ ಶಬ್ಬೀರ್ ಮತ್ತು ರಫೀಕ್ ಖಾನ್ ಅವರು ಕಸದ ಆಟೊ ಚಾಲಕರಾಗಿ ಕಾರ್ಯ ನಿರ್ವಹಿಸಿದರು.
ಗ್ರಾಮ ಪಂಚಾಯಿತಿಯ 4 ಮಂದಿ ಪೌರ ಕಾರ್ಮಿಕರಿಗೆ ಕೊರೊನಾ ಸೋಂಕು ದೃಢಪಟ್ಟಿದ್ದು, ಅದರಲ್ಲಿ ಅವರೊಂದಿಗೆ ಇದ್ದ ಆಟೊ ಚಾಲಕ ಪ್ರಾಥಮಿಕ ಸಂಪರ್ಕದಿಂದಾಗಿ ಹೋಂ ಕ್ಯಾರಂಟೈನ್‌ ಆಗಿದ್ದಾರೆ. ಆ ಸಮಸ್ಯೆಯನ್ನು ಬಗೆಹರಿಸಲು ಪಿಡಿಒ ಮತ್ತು ಸದಸ್ಯರು ಅವರ ಪರವಾಗಿ ಚಾಲಕರಾಗಿ ಕಾರ್ಯನಿರ್ವಹಿಸಿ ಸಾರ್ವಜನಿಕರ ಪ್ರಶಂಸೆಗೆ ಪಾತ್ರರಾದರು.
