ಪ್ರಜಾವಾಣಿ ಸಾಧಕರು 2023 | ರಾಧಾಮಣಿ - ಅಂತರ್ಜಾತಿ ಮರುಮದುವೆಯ ಕಾಯಕ

****

ಹೆಸರು: ರಾಧಾಮಣಿ ಎಂ.ವಿ.

ವೃತ್ತಿ: ಸ್ವಯಂ ಸೇವಾ ಸಂಸ್ಥೆ

ಸಾಧನೆ: ವಿವಾಹ ವಿಚ್ಛೇದನಕ್ಕೆ ಒಳಗಾದವರಿಗೆ ಮರುಮದುವೆ ಮಾಡಿಸುವುದು

ಸರ್ಕಾರಿ ಉದ್ಯೋಗ ಪಡೆಯುವ ಕನಸು ಈಡೇರಲಿಲ್ಲ. ಹೀಗಾಗಿ, ಸಮಾಜಕ್ಕೆ ಏನಾದರೂ ಕೊಡುಗೆ ನೀಡೋಣವೆಂದು ಟೊಂಕಕಟ್ಟಿ ನಿಂತ ರಾಧಾಮಣಿ ಎಂ.ವಿ ಅವರು ವಿಧವೆ, ವಿದುರರಿಗೆ ಹಾಗೂ ವಿಚ್ಛೇದನ ಪಡೆದವರಿಗೆ ಅಂತರ್ಜಾತಿ ಮರುಮದುವೆ ಮಾಡಿಸುತ್ತಿದ್ದಾರೆ. ಈ ಮೂಲಕ ಹಲವರು ಹೊಸದಾಗಿ ಬದುಕು ಕಟ್ಟಿಕೊಳ್ಳಲು ನೆರವಾಗಿದ್ದಾರೆ.

ರಾಧಾಮಣಿ ಅವರದ್ದು ಕೆಜಿಎಫ್ ತಾಲ್ಲೂಕಿನ ತಂಬಾರ್ಲಹಳ್ಳಿ ಎಂಬ ಕುಗ್ರಾಮ. ಒಕ್ಕಲಿಗ ಸಮುದಾಯದ ಅವರಿಗೆ‌ 45 ವರ್ಷ. ಅವರ ಪತಿ ಎನ್.ಅಶ್ವಥ್‌ ಕೃಷಿಕರು.

ಬಿ.ಇ, ಬಿ.ಇಡಿ ಪೂರೈಸಿರುವ ಅವರಿಗೆ ವಿವಿಧ ಇಲಾಖೆಯಲ್ಲಿ ನಾಲ್ಕು ಬಾರಿ ಸರ್ಕಾರಿ ಉದ್ಯೋಗ ‌ಸಿಕ್ಕರೂ ಮನೆಯಲ್ಲಿನ ವಿರೋಧ ಸೇರಿದಂತೆ ವಿವಿಧ ಕಾರಣಗಳಿಂದ ಆ ಅವಕಾಶ ತಪ್ಪಿ ಹೋದವು. ಸದ್ಯ ಬಾಲನ್ಯಾಯ ಮಂಡಳಿ‌ ಸದಸ್ಯರಾಗಿ ಕೆಲಸ ಮಾಡುತ್ತಿದ್ದಾರೆ. ಇದುವರೆಗೆ 28 ಮರುಮದುವೆ ಮಾಡಿಸಿದ್ದಾರೆ.‌ ವಿವಿಧ ಕಾರಣಗಳಿಂದ ಮದುವೆಯಾಗದೆ ಉಳಿದಿದ್ದ ವಯಸ್ಸಾದ 49 ಮಂದಿಗೆ ಮದುವೆ ಮಾಡಿಸಿದ್ದಾರೆ. ವಾಟ್ಸ್‌ಆ್ಯಪ್ ಗುಂಪು ರಚಿಸಿದ್ದು, ಆ ಗುಂಪಿನಲ್ಲಿ ವೈದ್ಯರು, ಎಂಜಿನಿಯರ್, ಉಪನ್ಯಾಸಕರು, ಅಧಿಕಾರಿಗಳು, ರೈತರು, ಹೋರಾಟಗಾರರು ಸೇರಿದಂತೆ 350 ಮಂದಿ ಇದ್ದಾರೆ.

‘ಬೆಳಕು’ ಸ್ವಯಂ ಸೇವಾ ಸಂಸ್ಥೆ ಮೂಲಕ ಮಹಿಳಾ ದೌರ್ಜನ್ಯ,‌ ಬಾಲ್ಯವಿವಾಹದ ವಿರುದ್ಧ ಹೋರಾಟ‌ ನಡೆಸುತ್ತಿದ್ದಾರೆ. ಕೆರೆಗಳ ಹೂಳೆತ್ತಿಸುವುದು, ಕೃಷಿ ಭೂಮಿಗೆ ರಾಸಾಯನಿಕ‌ ಗೊಬ್ಬರ‌ ಹಾಕದಂತೆ ಅರಿವು ಮೂಡಿಸುವುದು, ಎಚ್ಐವಿ ಸೋಂಕಿತರಿಗೆ ಪೌಷ್ಟಿಕ ಆಹಾರ ನೀಡುವ ಕೆಲಸ ಮಾಡುತ್ತಿದ್ದಾರೆ. ಶಾಲಾ‌, ಕಾಲೇಜುಗಳಲ್ಲಿ ಬಡ ಮಕ್ಕಳಿಗೆ ಪುಸ್ತಕ‌ ಸಾಮಗ್ರಿ ವಿತರಣೆ, ವಿದ್ಯಾರ್ಥಿ ವೇತನ ನೀಡುತ್ತಿದ್ದಾರೆ.