ಹೀಗೊಂದು ವಿಶಿಷ್ಟ ಗೋ ಪ್ರಪಂಚ

ದಾರಿಯುದ್ದಕ್ಕೂ ಬೆಳ್ಳಗೆ ಅರಳಿ ಸುಗಂಧ ಸೂಸುತ್ತಿರುವ ಕಾಫಿ ತೋಟಗಳ ನಡುವಿನ ಅಂಕುಡೊಂಕಿನ ಹಾದಿಯಲ್ಲಿ, ಮೂಡಿಗೆರೆ ಹ್ಯಾಂಡ್ ಪೋಸ್ಟ್‌ನಿಂದ 10 ಕಿ.ಮೀ ದೂರದಲ್ಲಿರುವ ದಾರದಹಳ್ಳಿಗೆ ಸಾಗಿಬಂದ ನಮ್ಮನ್ನು ಗೋವಿನ ಕೊಂಬಿನ ಕಹಳೆಯನ್ನು ಊದುವುದರೊಂದಿಗೆ ಸ್ವಾಗತಿಸಿದ್ದು ಅಲ್ಲಿನ ಹಿರಿಯ ಪಶುಪರೀಕ್ಷಕ ಕೃಷ್ಣರಾಜು.

ದಾರದಹಳ್ಳಿ  ಚಿಕ್ಕಮಗಳೂರು ಜಿಲ್ಲೆಗೆ ಸೇರುತ್ತದೆ. ಇಲ್ಲಿ ಎಲ್ಲಾ ಊರುಗಳಿಗಿಂತ ಭಿನ್ನವಾದ ಸರ್ಕಾರಿ ಪಶು ವೈದ್ಯ ಆಸ್ಪತ್ರೆಯಿದೆ. ಇದನ್ನು ಆಸ್ಪತ್ರೆ ಎನ್ನುವುದಕ್ಕಿಂತ ಗೋವಿನ ವಿಶ್ವರೂಪ ದರ್ಶನವೆನ್ನಬಹುದು.

ಗೋವುಗಳು ಹಾಲು ನೀಡುವುದಕ್ಕೆ, ವಿವಿಧ ರೀತಿಯಲ್ಲಿ ಉಪಯೋಗಕ್ಕೆ ಬರುವ ಸೆಗಣಿ ನೀಡುವುದಕ್ಕಷ್ಟೇ ಸೀಮಿತ ಎಂದಷ್ಟೇ ತಿಳಿದಿರುವವರಿಗೆ  ಒಂದು ಗೋವು ಏನೆಲ್ಲಾ ನೀಡಬಲ್ಲದು ಎಂಬುದರ ಸಂಪೂರ್ಣ ಮಾಹಿತಿ ದೊರಕುತ್ತದೆ.

ಒಂದು ಸಾಮಾನ್ಯ ಸರ್ಕಾರಿ ಪಶು ಆಸ್ಪತ್ರೆಯನ್ನು ಜಾನುವಾರುಗಳ ಮಹತ್ವ ಸಾರುವ ಸಂಗ್ರಹಾಲಯವನ್ನು ಮಾಡಿರುವ ಪರಿ, ಪಶು ಪರೀಕ್ಷಕ ಕೃಷ್ಣರಾಜುರವರ ಗೋವಿನ ಮೇಲಿರುವ ಪೂಜನೀಯ ಭಾವ, ಸಾಮಾಜಿಕ ಕಳಕಳಿಯನ್ನು ಎತ್ತಿ ಹಿಡಿಯುತ್ತದೆ. ಆ ಪುಟ್ಟ ಆಸ್ಪತ್ರೆಯ ಕಿರಿದಾದ ಮೂರು ಕೊಠಡಿಗಳಲ್ಲಿ ಅಚ್ಚುಕಟ್ಟಾಗಿ ಜಾನುವಾರು ಮ್ಯೂಸಿಯಂ ಅನ್ನು ಕಲಾತ್ಮಕವಾಗಿ ರೂಪಿಸಿದ್ದಾರೆ. ಇಲ್ಲಿ ಜವಾನನೂ ಇವರೇ ದಿವಾನನೂ ಇವರೇ.

ದ್ವಾರವನ್ನು ದಾಟಿ ಆ ಪುಟ್ಟ ಆವರಣವನ್ನು ಪ್ರವೇಶಿಸುತ್ತಿದ್ದಂತೆಯೆ ‘ಅಂಗ್ಯೆಯಲ್ಲಿ ಔಷಧಿ ವನ’ ನೋಡುಗರ ಗಮನ ಸೆಳೆಯುತ್ತದೆ. ಇಲ್ಲಿ 30ಕ್ಕೂ ಅಧಿಕ ಔಷಧೀಯ ಸಸ್ಯಗಳಿವೆ. ಒಳಗೆ ಅಡಿಯಿಟ್ಟೊಡನೆ ಆಕರ್ಷಿಸುವ ಮಜ್ಜಿಗೆಯಲ್ಲಿ ನಡೆವ ಗಡಿಯಾರ, ಸಗಣಿ, ಗೋಮೂತ್ರದಿಂದ ಮೂರು ತಿಂಗಳ ಕಾಲ ಉರಿವ ವಿದ್ಯುತ್ ದೀಪ, ಮೂಳೆ, ಕೊಂಬಿನ ಆಲಂಕಾರಿಕ ಸಾಮಗ್ರಿಗಳು, ಬೆರಗು ಮೂಡಿಸುತ್ತವೆ. ಹಾಗೆ ಬಲಕ್ಕೆ ತಿರುಗಿದರೆ  ಜಾನಪದ ಕೃಷಿ ಪರಿಕರಗಳು, ಬಿದಿರಿನ  ಗೊಟ್ಟಗಳು ಕಾಣಸಿಗುತ್ತವೆ.

ಪುರಾತನ ಕಾಲದಲ್ಲಿ ಬೇಸಾಯ ಮಾಡುವಾಗ ಎತ್ತುಗಳಿಗೆ ಬಳಸುತ್ತಿದ್ದ ನೊಗ, ಹೆಗಲು ಪಟ್ಟಿ, ಬಾಯಿ ಕುಕ್ಕೆಗಳೂ ಇಲ್ಲಿ ಕಾಣಸಿಗುತ್ತವೆ. ಚರ್ಮದ ನಂತರ ತೆಂಗಿನ ಕೆತ್ತನೆ, ಈಗ ಪ್ಲಾಸ್ಟಿಕ್ ರೂಪ ಪಡೆದುಕೊಂಡಿರುವ ಸಾಮಗ್ರಿಗಳ ಮಾಹಿತಿ ಮಹಾಪೂರವೇ ಇಲ್ಲಿದೆ.

ಗೋವಿನ ಕೊಂಬಿನ ಕಹಳೆ, ಕೊಂಬಿನ ದೀವಟಿಗೆ, ವಿವಿಧ ರಾಜ್ಯದಲ್ಲಿ ಬಳಕೆಯಲ್ಲಿದ್ದ ಹಲವು ಬಗೆಯ ಚಾಟಿಗಳು, ಗೋವಿನ ಚರ್ಮದ ಢಕ್ಕೆ, ಭೇರಿ, ನಗಾರಿ, ವಿಭಿನ್ನ ಶಬ್ದ ಹೊಮ್ಮಿಸುವ ತಮಟೆ, ಗಂಟೆಗಳು, ಹಲಗೆ, ಹಿಂದೆ ದೀಪದಂತೆ ಬಳಸುತ್ತಿದ್ದ ದನಗಳ ಒಸಡು, ನೂರಾರು ವರ್ಷಗಳ ಇತಿಹಾಸ ಹೇಳುವ  ಮಜ್ಜಿಗೆ ಮೊಸರು ಬೆಣ್ಣೆಯ ಮಣ್ಣಿನ ಪಾತ್ರೆ, 200 ವರ್ಷಗಳ ಹಳೆಯ ತುಪ್ಪದ ಗಿಂಡಿ, ಜಾನುವಾರಿನಿಂದ ಸಿಗುವ ಉತ್ಪನ್ನಗಳಾದ ಹಾಲು, ಮೊಸರು, ಬೆಣ್ಣೆ, ಮಜ್ಜಿಗೆಯಿಂದ ಆಗುತ್ತಿದ್ದ ಔಷಧ ತಯಾರಿಕೆ, ಕೊಂಬಿನಿಂದ ಮಾಡಿದ ಸುತ್ತಿಗೆ, ಆಯುಧ ಇತ್ಯಾದಿ ಇಲ್ಲಿವೆ.

ಇದರ ಒಳಹೊಕ್ಕರೆ ಅಭಿರುಚಿ, ಆಸಕ್ತಿಯಿರುವವರಿಗೆ ದಿನಪೂರ್ತಿ ನೋಡಿದರೂ ಮುಗಿಯದ ಮಾಹಿತಿಯಿದೆ. ಕಳೆದ 25 ವರ್ಷಗಳಿಂದ ಸ್ವಂತ ಖರ್ಚಿನಿಂದ ಗೋವು ಮತ್ತದರ ಪೂರಕ ವಸ್ತುಗಳ ಬಳಕೆ, ಪ್ರಾಚೀನ ಕೃಷಿ ಪರಿಕರಗಳ ಕುರಿತು ಕೃಷಿ ಮೇಳಗಳಲ್ಲಿ ವಸ್ತು ಪ್ರದರ್ಶನ ಏರ್ಪಡಿಸಿ ಮಾಹಿತಿ ನೀಡುತ್ತಿದ್ದಾರೆ ಕೃಷ್ಣರಾಜು.

‘ನಾನು ಜನಿಸಿದ್ದ ಸಂದರ್ಭದಲ್ಲಿ ಮನೆಯಲ್ಲಿ ಬಡತನ. ಶ್ರೀಕೃಷ್ಣ ಜನ್ಮಾಷ್ಟಮಿಯಂದು ನಾನು ಹುಟ್ಟಿದ್ದೆ. ನನ್ನನ್ನು ಸಲಹುವ ಜವಾಬ್ದಾರಿ ಹೊತ್ತಿದ್ದು ನನ್ನ ತಾಯಿ. ತೀವ್ರ ಬಡತನದ ಆ ದಿನಗಳಲ್ಲಿ ಇದ್ದ ಅಲ್ಪ ಚಿನ್ನವನ್ನು ಮಾರಿ ಓದಿಸಿದಳು. ತಾಯಿಯಷ್ಟೇ ಗೋವನ್ನು ಗೌರವಿಸಬೇಕೆನ್ನುವ ಕಾರಣಕ್ಕೆ ಈ ರೀತಿ ಮಾಡುತ್ತಿದ್ದೇನೆ’ ಎನ್ನುತ್ತಾರೆ ಕೃಷ್ಣರಾಜು. ಇವರು ಮನೆ ಮನೆಗೆ ತೆರಳಿ ಕಾಲಕಾಲಕ್ಕೆ ಜಾನುವಾರುಗಳ ಆರೈಕೆ, ಚಿಕಿತ್ಸೆ ಕುರಿತು ತಿಳಿ ಹೇಳುತ್ತಾರೆ. ತಮ್ಮದೇ ತಯಾರಿಯ ಮನೆಮದ್ದನ್ನು ಉಚಿತವಾಗಿ ನೀಡುತ್ತಾರೆ. ಸುತ್ತಮುತ್ತಲಿನ 16 ಹಳ್ಳಿಗರ ಪ್ರೀತಿ ಪಾತ್ರರಾಗಿದ್ದಾರೆ.