ಕೇರಳದ ‘ಊಟಿ’ ರಾಣಿಪುರಮ್‌

ಕೇರಳದಲ್ಲೂ ಒಂದು ಉದಕ ಮಂಡಲ ಅರ್ಥಾತ್ ಊಟಿ ಇದೆ, ಗೊತ್ತಾ?

. ಹೌದು. ಅದು ಊಟಿ ಥರವೇ. ಆದರೆ, ಊಟಿ ಅಲ್ಲ. ಅದರ ಹೆಸರು ರಾಣಿಪುರಮ್. ಸರ್ವ ಋತುಗಳಲ್ಲೂ ತಂಪಾಗಿರುವ, ಸದಾ ಪ್ರವಾಸಿಗರನ್ನು ಸೆಳೆಯುವ ಈ ತಾಣವನ್ನು ‘ಕೇರಳದ ಊಟಿ’ ಎನ್ನುತ್ತಾರೆ.

. ಇದು ಕೇರಳ-ಕರ್ನಾಟಕ ಗಡಿನಾಡು ಕಾಸರಗೋಡು ಜಿಲ್ಲೆಯಲ್ಲಿರುವ ಗಿರಿಧಾಮ. ಕಾಸರಗೋಡಿನಿಂದ 80 ಕಿ.ಮೀ ದೂರವಿದೆ. ಕೊಡಗು – ಭಾಗಮಂಡಲದ ಮೂಲಕವೂ ಇಲ್ಲಿಗೆ ತಲುಪಬಹುದು. ಹೀಗಾಗಿ ಕೊಡಗು ಅಥವಾ ಕಾಸರಗೋಡಿಗೆ ಹೋದವರು, ಒಂದು ದಿನದ ಚಾರಣಕ್ಕಾಗಿ ಈ ತಾಣವನ್ನು ಆಯ್ಕೆ ಮಾಡಿಕೊಳ್ಳಬಹುದು.

. ಪಶ್ಚಿಮಘಟ್ಟಗಳ ಸಾಲಿನಲ್ಲಿ ಬರುವ ರಾಣಿಪುರಮ್ ಹಿಲ್ಸ್ಟೇಷನ್ ಸಮುದ್ರ ಮಟ್ಟದಿಂದ 750 ಮೀಟರ್ ಎತ್ತರದಲ್ಲಿದೆ. ವರ್ಷದ ಎಲ್ಲ ಋತುಗಳಲ್ಲೂ ಇಲ್ಲಿಗೆ ಪ್ರವಾಸಿಗರು ಭೇಟಿ ನೀಡುತ್ತಾರೆ.

. ಈ ಸ್ಥಳಕ್ಕೆ 1930ರವರೆಗೆ ‘ಮಾಡತ್ತುಮಲ’ ಎಂಬ ಹೆಸರಿತ್ತು. ಬ್ರಿಟಿಷರ ಕಾಲದಲ್ಲಿ ರಾಣಿಯ ಗೌರವಾರ್ಥವಾಗಿ ‘ರಾಣಿಪುರಮ್’ ಎಂಬ ಹೆಸರು ಅಸ್ತಿತ್ವಕ್ಕೆ ಬಂತು. ಗಮನಿಸಬೇಕಾದ ಅಂಶವೆಂದರೆ ಈ ಊರಿನ ಪಕ್ಕದಲ್ಲಿ ‘ರಾಜಾಪುರಮ್’ ಎಂಬ ಹೆಸರಿನ ಊರು ಇದೆ.

. ವರ್ಷದ ಬಹುತೇಕ ಕಾಲದಲ್ಲಿ ತಂಪಾದ ಹವೆಯಿರುವ ಬೆಟ್ಟ ಪ್ರದೇಶಗಳನ್ನು ಬ್ರಿಟಿಷರು ಇಷ್ಟಪಡುತ್ತಿದ್ದರು. ಕೇರಳ ಸರ್ಕಾರ ಪ್ರವಾಸೋದ್ಯಮ ಅಭಿವೃದ್ಧಿ ಯೋಜನೆಯಡಿ ಈ ಗಿರಿಧಾಮವನ್ನು ಸೇರಿಸಿಕೊಂಡಿದ್ದರಿಂದ, ಈ ಸ್ಥಳ ಮತ್ತಷ್ಟು ಪ್ರಾಮುಖ್ಯ ಪಡೆದುಕೊಂಡಿತು.

. ಇಲ್ಲಿ ಏನೇನಿದೆ?

. ರಾಣಿಪುರಮ್ನಲ್ಲಿ ನಿತ್ಯಹರಿದ್ವರ್ಣ ಕಾಡುಗಳಿವೆ. ಶೋಲಾ ಮರಗಳಿವೆ. ಜಿಂಕೆ, ಆನೆಗಳು, ವಿವಿಧ ರೀತಿಯ ಮಂಗಗಳಿವೆ. ಪಕ್ಷಿ ಪ್ರಭೇದಗಳು ಕಾಣಸಿಗುತ್ತವೆ. ವಿವಿಧ ಪ್ರಭೇದಗಳ ಚಿಟ್ಟೆ-ಪಾತರಗಿತ್ತಿಗಳಿವೆ. ಕರ್ನಾಟಕದ ತಲಕಾವೇರಿ ಅಭಯಾರಣ್ಯದೊಂದಿಗೆ ರಾಣಿಪುರಮ್ ತನ್ನ ಗಡಿಯನ್ನು ವಿಲೀನಗೊಳಿಸುತ್ತದೆ.

. ಚಾರಣದ ಮಜಾ

. ಸುಮಾರು 3-4 ಕಿ.ಮೀ ಕಡಿದಾದ ದಾರಿಯಲ್ಲಿ ಚಾರಣ ಮಾಡುತ್ತಾ ಬೆಟ್ಟ ಏರಬೇಕು. ವಿವಿಧ ಜಾತಿಯ ಮರಗಳ ನಡುವೆ ಚಾರಣ ಮಾಡುವ ಖುಷಿಯೇ ಅನನ್ಯ. ಬೆಟ್ಟದ ಮೇಲಕ್ಕೆ ತಲುಪುತ್ತಿದ್ದಂತೆ ಹುಲ್ಲುಗಳ ರಾಶಿ ಕಾಣಸಿಗುತ್ತದೆ. ನಡೆಯುವಾಗ ಸದ್ದಿಲ್ಲದೇ ಬಟ್ಟೆಯೊಳಕ್ಕೆ ಸೇರಿಕೊಂಡು ರಕ್ತ ಹೀರುವ ಜಿಗಣೆಗಳ ಬಗ್ಗೆ ಎಚ್ಚರವಹಿಸಬೇಕು.

. ಅರಣ್ಯ ಹಾಗೂ ಆನೆಗಳ ವೀಕ್ಷಣೆಗೆ ಜೀಪ್ ಸವಾರಿ ಮಾಡಬಹುದು. ಇದಕ್ಕಾಗಿ ಸಮೀಪದಲ್ಲಿ ಜೀಪ್ಗಳು ಬಾಡಿಗೆ ಸಿಗುತ್ತವೆ. ದಟ್ಟ ಅರಣ್ಯರಾಶಿಯನ್ನು ಹೊಂದಿರುವ ರಾಣಿಪುರಮ್ನಲ್ಲಿ ಮಳೆಯ ಪ್ರಮಾಣವೂ ಅಧಿಕವಾಗಿದೆ. ಚಳಿಗಾಲದಲ್ಲಿ ಮಂಜು ಮುಸುಕಿದ ವಾತಾವರಣ. ಹೀಗಾಗಿ ಮಳೆಗಾಲದಲ್ಲಿ ಈ ತಾಣಕ್ಕೆ ಪ್ರವಾಸ ಹೋಗುವುದು ಸೂಕ್ತವಲ್ಲ.

. ಪ್ಲಾಸ್ಟಿಕ್ ನಿಷೇಧ

. ಪ್ಲಾಸ್ಟಿಕ್ ವಸ್ತುಗಳನ್ನು ಬೆಟ್ಟದ ಮೇಲೆ ಕೊಂಡೊಯ್ಯುವುದಿದ್ದರೆ ಒಂದಿಷ್ಟು ಹಣವನ್ನು ‘ಸೇಫ್ಟಿ ಡೆಪಾಸಿಟ್’ ಆಗಿ ಕೊಡಬೇಕು. ಬೆಟ್ಟದಿಂದ ವಾಪಸ್ ಬರುವಾಗಲೂ ಅದೇ ವಸ್ತುಗಳನ್ನು ಹಿಡಿದುಕೊಂಡು ಬಂದಿದ್ದರೆ ಮಾತ್ರ ನಿಮ್ಮ ದುಡ್ಡು ವಾಪಸ್. ಇದೊಂದು ರೀತಿಯಲ್ಲಿ ಪ್ಲಾಸ್ಟಿಕ್ ನಿರ್ಬಂಧ ಹೇರುವ ವಿಧಾನ. ಈ ಪ್ಲಾಸ್ಟಿಕ್ ನಿಷೇಧ ಮಾಡಿರುವ ಕಾರಣದಿಂದಲೂ ಇಲ್ಲಿಗೆ ಹೆಚ್ಚಿನ ಪ್ರಮಾಣದಲ್ಲಿ ಪ್ರವಾಸಿಗರು ಆಕರ್ಷಣೆಗೊಳಪಡಲು ಕಾರಣವಾಗಿದೆ.

. ಕೇರಳ ಸರ್ಕಾರ ಪ್ರವಾಸೋದ್ಯಮ ಇಲಾಖೆ ರಾಣಿಪುರಮ್ ಗಿರಿಧಾಮವನ್ನು ತಕ್ಕಮಟ್ಟಿಗೆ ಅಭಿವೃದ್ಧಿಗೊಳಿಸಿದೆ, ನಿಜ. ಆದರೆ, ಕೆಲವೊಂದು ಅಭಿವೃದ್ಧಿ ಯೋಜನೆಗಳು ಇನ್ನೂ ಕಾರ್ಯ ರೂಪಕ್ಕೆ ಬಂದಿಲ್ಲ. ಪ್ರವಾಸಿಗರಿಗಾಗಿ ಇಲ್ಲೊಂದು ರೆಸಾರ್ಟ್ ಇದೆ ಎನ್ನುವುದನ್ನು ಹೊರತುಪಡಿಸಿದರೆ ಬೇರೆ ಯಾವ ಸೌಲಭ್ಯವೂ ಇಲ್ಲಿ ಕಾಣುವುದಿಲ್ಲ.

. ಪನತ್ತಡಿಯಿಂದ ರಾಣಿಪುರಮ್ಗೆ ಹೋಗುವ ಡಾಂಬರು ರಸ್ತೆ ಏಕಾಏಕಿ ಒಂದುಕಡೆ ನಿಂತುಬಿಡುತ್ತದೆ. ಅಲ್ಲಿ ಯಾವುದೇ ಸೂಚನಾ ಫಲಕಗಳೂ ಇಲ್ಲ. ಅರ್ಧಂಬರ್ಧ ಬೆಳೆದ ಕುರುಚಲು ಲಂಟಾನಾ ಕಾಡುಗಳಲ್ಲಿ ಇಲಿಗಳು, ಹೆಗ್ಗಣಗಳು ಓಡಾಡುತ್ತಿರುತ್ತಿವೆ. ಈ ಭಾಗದಿಂದ ಬೆಟ್ಟವನ್ನು ಪ್ರವೇಶಿಸಿದ ಪ್ರವಾಸಿಗರು ದಾರಿ ತಪ್ಪಿ ಕಾಡಿನಲ್ಲಿ ಎಲ್ಲೆಲ್ಲೋ ಹೋದ ಉದಾಹರಣೆಗಳಿವೆ.

. ಇಷ್ಟೆಲ್ಲ ಕೊರತೆಗಳ ನಡುವೆಯೂ ಈ ಹಿಲ್ಸ್ಟೇಷನ್ ಜನರನ್ನು ಆಕರ್ಷಿಸುತ್ತಿದೆ. ಇದಕ್ಕೆ ಮುಖ್ಯ ಕಾರಣ ಇಲ್ಲಿನ ತಂಪು ವಾತಾವರಣ. ಬೆಟ್ಟದ ಮೇಲೆ ಕೈಚಾಚಿದರೆ ಮೋಡಗಳು ಕೈಗೆ ಸಿಗುತ್ತವೇನೋ ಅನ್ನಿಸುವಂಥ ಅನುಭವ. ಇಲ್ಲಿನ ಹಸಿರ ಸೌಂದರ್ಯ, ಸ್ವಚ್ಛವಾದ ತಂಪು ಗಾಳಿ ಚಾರಣದ ದಣಿವು ನಿವಾರಿಸುವಂತೆ ಮಾಡುತ್ತದೆ.

. ಹೋಗುವುದು ಹೇಗೆ?

. ಕಾಸರಗೋಡು ರೈಲ್ವೆ ನಿಲ್ದಾಣದಿಂದ 85 ಕಿ.ಮೀ. ದೂರದಲ್ಲಿದೆ ರಾಣಿಪುರಮ್. ಈ ತಾಣಕ್ಕೆ ಸಮೀಪದ ರೈಲ್ವೆ ನಿಲ್ದಾಣವೆಂದರೆ ಕಾಞಂಗಾಡ್ (45 ಕಿ.ಮೀ). ಮಂಗಳೂರಿನಿಂದ ಕಾಸರಗೋಡು ಮೂಲಕ ರಾಣಿಪುರಮ್ ತಲುಪಬಹುದು.

. ರಾಣಿಪುರಮ್ ಹಿಲ್ಸ್ಟೇಷನ್ ಹೊಸದುರ್ಗ ತಾಲ್ಲೂಕಿನ ಪನತ್ತಡಿ ಗ್ರಾಮ ಪಂಚಾಯತ್ ವ್ಯಾಪ್ತಿಯಲ್ಲಿ ಬರುತ್ತದೆ. ಕಾಞಂಗಾಡಿನಿಂದ ಪಾಣತ್ತೂರು ದಾರಿಯಾಗಿ ಕರಿಕ್ಕೆ, ಭಾಗಮಂಡಲಕ್ಕೆ ಹೋಗುವಾಗ ಪನತ್ತಡಿ ಸಿಗುತ್ತದೆ. ಇಲ್ಲಿಂದ ರಾಣಿಪುರಮ್ಗೆ ರಸ್ತೆಯ ಸೌಕರ್ಯವಿದೆ. ಹೀಗಾಗಿ ಕೊಡಗು ಮೂಲಕವೂ ಈ ತಾಣವನ್ನು ತಲುಪಬಹುದು.

. ಮಂಗಳೂರುವರೆಗೆ ವಿಮಾನದಲ್ಲಿ ಬಂದು, ಅಲ್ಲಿಂದ ರಾಣಿಪುರಮ್ಗೆ ಬಸ್, ಟ್ಯಾಕ್ಸಿ ಅಥವಾ ರೈಲಿನಲ್ಲಿ ಬರಬಹುದು. ಏರ್ಪೋರ್ಟ್ನಿಂದ ಕೆಎಸ್ಆರ್ಟಿಸಿ ಬಸ್ ಮೂಲಕ ಕಾಞಂಗಾಡ್ವರೆಗೆ ಬರಬಹುದು. ಅಲ್ಲಿಂದ ಬೇರೆ ಬಸ್ನಲ್ಲಿ ರಾಣಿಪುರಮ್ ತಲುಪಬಹುದು.

. ಭೇಟಿ ಸೂಕ್ತ ಸಮಯ

. ಮಳೆಗಾಲದಲ್ಲಿ ತುಂಬಾ ಮಳೆ ಇರುತ್ತದೆ. ಹಾಗಾಗಿ ಚಳಿಗಾಲವೇ ಈ ಗಿರಿಧಾಮದ ಭೇಟಿಗೆ ಸೂಕ್ತ ಸಮಯ. ಅಂದರೆ, ಅಕ್ಟೋಬರ್ನಿಂದ ಮಾರ್ಚ್ವರೆಗೆ ಈ ಪ್ರದೇಶದಲ್ಲಿ ಸುತ್ತಾಡಬಹುದು.

. ಊಟ–ವಸತಿ

. ಊಟ– ಉಪಹಾರಕ್ಕೆ ಯಾವುದೇ ವ್ಯವಸ್ಥೆ ಇಲ್ಲ. ಅಲ್ಲೊಂದು ರೆಸಾರ್ಟ್ ಇದೆ. ಆದರೆ ಅದು ಎಲ್ಲ ವರ್ಗದ ಪ್ರವಾಸಿಗರಿಗೆ ಕೈಗೆ ಎಟುಕುತ್ತದೆಯೋ ಇಲ್ಲವೋ ಗೊತ್ತಿಲ್ಲ. ಹೀಗಾಗಿ, ಚಾರಣಿಗರು, ಪ್ರವಾಸಿಗರು ರಾಣಿಪುರಮ್ಗೆ ಹೋಗುವಾಗ ಊಟ–ಉಪಹಾರದ ವ್ಯವಸ್ಥೆ ಮಾಡಿಕೊಂಡರೆ ಒಳ್ಳೆಯದು.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ಕೇರಳದ ‘ಊಟಿ’ ರಾಣಿಪುರಮ್‌

ಚಿನಕುರುಳಿ: 04 ಜುಲೈ 2025, ಶುಕ್ರವಾರ

ಚುರುಮುರಿ | ಒಳಾರ್ಥ–ಗೂಢಾರ್ಥ!

IND vs ENG | ಜೇಮಿ– ಬ್ರೂಕ್‌ ಪ್ರತ್ಯಾಕ್ರಮಣ: ಫಾಲೊಆನ್‌ನಿಂದ ಇಂಗ್ಲೆಂಡ್‌ ಪಾರು

ಧರ್ಮಪುರ: ಜಂಬೂ ನೇರಳೆಯಿಂದ ಕಾಲು ಕೋಟಿ ಆದಾಯ

ಬೆಂಗಳೂರು | ನೀರಜ್ ಚೋಪ್ರಾ ಕ್ಲಾಸಿಕ್‌ ಚಾರಿತ್ರಿಕ ಉತ್ಸವಕ್ಕೆ ಕಂಠೀರವ ಸಜ್ಜು

AFC Women's Asian Cup: ಭಾರತಕ್ಕೆ ಇಂದು ಥಾಯ್ಲೆಂಡ್‌ ವಿರುದ್ಧ ಮಹತ್ವ ಪಂದ್ಯ

ಕೆನಡಾ ಓಪನ್‌: ಶ್ರೀಯಾಂಶಿ ಯಶಸ್ಸಿನ ಓಟ ಅಂತ್ಯ

ವಿಂಬಲ್ಡನ್‌ ಟೆನಿಸ್‌: ನಾಲ್ಕನೇ ಸುತ್ತಿಗೆ ಅಲ್ಕರಾಜ್‌; ಮ್ಯಾಡಿಸನ್‌ಗೆ ಲಾರಾ ಆಘಾತ

ಒಳನೋಟ: ಸೋರುವ ಕೊಠಡಿಯಲ್ಲೇ ಕಲಿಕೆ!

ಒಳನೋಟ: ಹದಗೆಟ್ಟ ಹಾಸ್ಟೆಲ್‌ ‘ಆರೋಗ್ಯ’.. ಸರಿಯಾಗದ SC, ST, OBC ವಸತಿಶಾಲೆಗಳು

ಒಳನೋಟ | ರಾಜ್ಯದಲ್ಲಿ ವಿದೇಶಿ ಹಣ್ಣುಗಳ ದಿಬ್ಬಣ

ಒಳನೋಟ | ಕಾಲ್ತುಳಿತ ಪ್ರಕರಣ: ಸಾವಿನ ಮನೆ ಬಾಗಿಲು ತೆರೆದವರಾರು?

ಚಿನಕುರುಳಿ: 04 ಜುಲೈ 2025, ಶುಕ್ರವಾರ

ಚುರುಮುರಿ | ಒಳಾರ್ಥ–ಗೂಢಾರ್ಥ!

IND vs ENG | ಜೇಮಿ– ಬ್ರೂಕ್‌ ಪ್ರತ್ಯಾಕ್ರಮಣ: ಫಾಲೊಆನ್‌ನಿಂದ ಇಂಗ್ಲೆಂಡ್‌ ಪಾರು

ಧರ್ಮಪುರ: ಜಂಬೂ ನೇರಳೆಯಿಂದ ಕಾಲು ಕೋಟಿ ಆದಾಯ