ಸತೀಶ್ ರೆಡ್ಡಿ ಪರ ನಟ ಯಶ್ ಪ್ರಚಾರ

ತೆರೆದ ವಾಹನದಲ್ಲಿ ರೋಡ್‌ ಷೋ ನಡೆಸಿದ ಅವರನ್ನು ನೋಡಲು ಭಾರಿ ಸಂಖ್ಯೆಯ ಜನಸ್ತೋಮ ಸೇರಿತ್ತು. ಬೊಮ್ಮನಹಳ್ಳಿ ಹೆಬ್ಬಾಗಿಲಲ್ಲಿರುವ ವಿವೇಕಾನಂದ ಪುತ್ಥಳಿಗೆ ಮಾಲಾರ್ಪಣೆ ಮಾಡಿದ ಯಶ್ ಜನರತ್ತ ಕೈಬೀಸಿ ಧನ್ಯವಾದ ಅರ್ಪಿಸಿದರು.

‘ಪಕ್ಷದ ಪರವಾಗಿ ಮತಯಾಚಿಸಲು ನಾನು ಬಂದಿಲ್ಲ. ಸತೀಶ್ ರೆಡ್ಡಿ ನನ್ನ ಆತ್ಮೀಯರು, ಕ್ಷೇತ್ರದಲ್ಲಿ ಅವರು ಮಾಡಿರುವ ಜನಪರ ಕೆಲಸಗಳನ್ನು ಕಣ್ಣಾರೆ ಕಂಡಿದ್ದೇನೆ. ಈ ಕಾರಣದಿಂದ ಅವರ ಪರ ಪ್ರಚಾರಕ್ಕೆ ಬಂದಿದ್ದೇನೆ’ ಎಂದು ಯಶ್‌ ಸ್ಪಷ್ಟಪಡಿಸಿದರು.

‘ಈ ಭಾಗದಲ್ಲಿ ನೆರೆ ಬಂದ ವೇಳೆ ಸತೀಶ್ ರೆಡ್ಡಿ ಜನರೊಂದಿಗೆ ನಿಂತು ಅವರ ಕಷ್ಟಗಳಿಗೆ ಸ್ಪಂದಿಸಿದ ರೀತಿಯ ಬಗ್ಗೆ ಅಭಿಮಾನವಿದೆ. ರಾಜಕೀಯದಲ್ಲಿ ತೊಡಗಿಕೊಳ್ಳುತ್ತಿರುವ ಬಗ್ಗೆ ಕೆಲವರು ಆಕ್ಷೇಪ ವ್ಯಕ್ತಪಡಿಸುತ್ತಿದ್ದಾರೆ. ನನ್ನ ಈ ನಡೆಯ ಬಗ್ಗೆ ಮುಂದಿನ ದಿನಗಳಲ್ಲಿ ಉತ್ತರ ಸಿಗಲಿದೆ. ಚುನಾವಣೆಗಾಗಿ ಸತೀಶ್ ಜೊತೆ ಇದ್ದೇನೆ. ಆದರೆ, ಜನರಿಗೆ ಅನ್ಯಾಯವಾದಾಗ ನಾನು ನಿಮ್ಮೊಂದಿಗೆ ನಿಲ್ಲುತ್ತೇನೆ’ ಎಂದು ಭರವಸೆ ನೀಡಿದರು.