ನವದೆಹಲಿ: ಜಿ20 ಶೃಂಗಸಭೆಗೆ ‘ಭಾರತ ಮಂಪಟ’ ಸಜ್ಜುಗೊಂಡಿದ್ದರೆ, ಬ್ಯಾಂಕಿಂಗ್, ಆರೋಗ್ಯ ಸೇವೆ ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ಭಾರತ ಅನುಷ್ಠಾನಗೊಳಿಸಿರುವ ಡಿಜಿಟಲ್ ಮೂಲಸೌಕರ್ಯಗಳ ಪ್ರದರ್ಶನಕ್ಕೂ ವ್ಯವಸ್ಥೆ ಮಾಡಲಾಗಿದೆ.
ಈ ವಿಷಯದಲ್ಲಿ ದೇಶದ ಸಾಧನೆಯನ್ನು ವಿಶ್ವನಾಯಕರ ಮುಂದಿಡುವ ಸಲುವಾಗಿ ಸಭಾಂಗಣ 4 ಮತ್ತು 14ರಲ್ಲಿ ಸ್ಥಾಪಿಸಿರುವ ‘ಡಿಜಿಟಲ್ ಇಂಡಿಯಾ ಎಕ್ಸ್ಪೀರಿಯನ್ಸ್ ಝೋನ್’ ಆಕರ್ಷಣೆಯ ತಾಣವೆನಿಸಿದೆ. ಜಿ20 ಸದಸ್ಯ ರಾಷ್ಟ್ರಗಳ ಪ್ರತಿನಿಧಿಗಳು ಹಾಗೂ ಇತರ ಅತಿಥಿಗಳು ಈ ತಾಣಕ್ಕೆ ಭೇಟಿ ನೀಡುತ್ತಿದ್ದು, ‘ವರ್ಚುವಲ್ ರಿಯಾಲಿಟಿ’ ವಿಧಾನದಲ್ಲಿ ‘ಡಿಜಿಟಲ್ ಇಂಡಿಯಾ’ದ ಅನುಭವವನ್ನು ತುಂಬಿಕೊಳ್ಳುತ್ತಿದ್ದಾರೆ.
ಕೃತಕ ಬುದ್ಧಿಮತ್ತೆ (ಎಐ) ಆಧಾರಿತ ಭಾಷಾ ವೇದಿಕೆ ‘ಭಾಷಿಣಿ’, ಆಧಾರ್, ಡಿಜಿಲಾಕರ್, ದೀಕ್ಷಾ ಪೋರ್ಟಲ್ಗಳು ಗಮನ ಸೆಳೆಯುತ್ತಿವೆ.
‘ಇ–ಸಂಜೀವಿನಿ’ಯು ಡಿಜಿಟಲ್ ತಂತ್ರಜ್ಞಾನ ಬಳಸಿ, ಆರೋಗ್ಯ ಸೇವೆ ಒದಗಿಸುತ್ತಿರುವ ಭಾರತದ ಪ್ರಯತ್ನವನ್ನು ತೆರೆದಿಟ್ಟಿದೆ.
ದೆಹಯಲ್ಲಿ ಶುಕ್ರವಾರ ಸ್ಕೈಡೈವಿಂಗ್ ಮಾಡಿದ ವ್ಯಕ್ತಿಯು ಜಿ20 ಲಾಂಛನ ಧ್ಯೇಯವಾಕ್ಯವಿರುವ ಬಾವುಟ ಹಿಡಿದು ಗಮನ ಸೆಳೆದರು
–ಪಿಟಿಐ ಚಿತ್ರ
‘ಭಾರತ ಮಂಟಪ’ದಲ್ಲಿ ಪ್ರದರ್ಶಿಸಲಾಗುತ್ತಿರುವ ಈ ಡಿಜಿಟಲ್ ಮೂಲಸೌಕರ್ಯಗಳನ್ನು ವಿವರಿಸುವ ವಿಡಿಯೊಯೊಂದನ್ನು ‘ಎಕ್ಸ್’ನಲ್ಲಿ ಹಂಚಿಕೊಳ್ಳಲಾಗಿದೆ. ಇಲ್ಲಿ ವ್ಯವಸ್ಥೆ ಮಾಡಲಾಗಿರುವ ಪ್ರದರ್ಶನ ಕುರಿತು ಜಿ20 ಮುಖ್ಯ ಸಮನ್ವಯಾಧಿಕಾರಿ ಹರ್ಷವರ್ಧನ ಶ್ರಿಂಗ್ಲಾ ಅವರು ವಿವರಣೆ ನೀಡುತ್ತಿರುವುದನ್ನು ಸಹ ವಿಡಿಯೊ ಒಳಗೊಂಡಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.