ಔರಂಗಾಬಾದ್‌: ಗಗನಕ್ಕೇರಿದ ಬೆಲೆ ನಡುವೆಯೂ ಬಹು ಬೇಡಿಕೆ ಹೊಂದಿರುವ ಟೊಮೆಟೊ ಬೆಳೆ ಕಾವಲಿಗೆ ಮಹಾರಾಷ್ಟ್ರ ರೈತ ಸಿಸಿಟಿವಿ ಕ್ಯಾಮೆರಾ ಮೊರೆ ಹೋಗಿದ್ದಾರೆ.
‘ದೇಶದಾದ್ಯಂತ ಪ್ರಸ್ತುತ ಟೊಮೆಟೊ ₹100– 200ಕ್ಕೆ ಮಾರಾಟವಾಗುತ್ತಿದೆ. 10 ದಿನಗಳ ಹಿಂದೆ 22–25 ಕೆಜಿಯ ಕ್ರೇಟ್‌ ಕಳ್ಳತನವಾಗಿದೆ. ಆದ್ದರಿಂದ ₹22,000 ವೆಚ್ಚ ಮಾಡಿ ಹೊಲಕ್ಕೆ ಸಿಸಿಟಿವಿ ಕ್ಯಾಮೆರಾ ಅಳವಡಿಸಿದ್ದೇವೆ’ ಎಂದು ಔರಂಗಾಬಾದ್‌ನಿಂದ 20 ಕಿ.ಮೀ.ದೂರದಲ್ಲಿರುವ ಶಹ್‌ಪುರ್‌ ಬಂಜಾರ್‌ನ ರೈತ ಶರದ್‌ ರಾವ್ತೆ ತಿಳಿಸಿದ್ದಾರೆ.
‘ಪ್ರಸ್ತುತ 22–25 ಕೆಜಿಯುಳ್ಳ ಟೊಮೆಟೊ ಕ್ರೇಟ್‌ ₹3000ಕ್ಕೆ ಮಾರಾಟವಾಗುತ್ತಿದೆ. ಇಂತಹ ಸಂದರ್ಭದಲ್ಲಿ ನಮ್ಮ ಬೆಳೆ ಕಳ್ಳರ ಪಾಲಾಗಲು ಬಿಡಲಾಗುವುದಿಲ್ಲ. 5 ಎಕರೆ ಕೃಷಿ ಭೂಮಿ ಹೊಂದಿದ್ದು, ಅದರಲ್ಲಿ 1.5 ಎಕರೆಯಲ್ಲಿ ಟೊಮೆಟೊ ಬೆಳೆದಿದ್ದೇನೆ. ಕನಿಷ್ಠ 6–7 ಲಕ್ಷ ಆದಾಯ ಸಿಗಲಿದೆ’ ಎಂದಿದ್ದಾರೆ.
‘ಸಿಸಿಟಿವಿ ಕ್ಯಾಮೆರಾವು ಸೌರಶಕ್ತಿಯಿಂದ ಕಾರ್ಯನಿರ್ವಹಿಸುತ್ತದೆ. ಅಲ್ಲಿನ ದೃಶ್ಯಗಳನ್ನು ಎಲ್ಲಿ ಕೂತು ಬೇಕಾದರೂ ಮೊಬೈಲ್‌ನಲ್ಲಿ ವೀಕ್ಷಿಸಬಹುದಾಗಿದೆ’ ಎಂದು ರಾವ್ತೆ ತಿಳಿಸಿದ್ದಾರೆ.
