Plane Crash | 99 ಮಂದಿಯ ಗುರುತು ಪತ್ತೆ: 76 ಮೃತದೇಹ ಕುಟುಂಬಸ್ಥರಿಗೆ ಹಸ್ತಾಂತರ

ವಿಜಯ್‌ ರೂಪಾನಿ ಅವರ ಮೃತದೇಹವನ್ನು ಅವರ ಪತ್ನಿ ಅಂಜಲಿ ರೂಪಾನಿ ಮತ್ತು ಕುಟುಂಬದ ಸದಸ್ಯರಿಗೆ ಸೋಮವಾರ ಹಸ್ತಾಂತರಿಸಲಾಯಿತು. ಅದೇ ದಿನ ಸಂಜೆ ರಾಜ್‌ಕೋಟ್‌ನಲ್ಲಿ ಅವರ ಅಂತ್ಯಸಂಸ್ಕಾರ ನೆರವೇರಿಸಲಾಯಿತು. ರೂಪಾನಿ ಅವರ ಮೃತದೇಹವು ಗುರುತಿಸಲಾಗದಷ್ಟು ಸುಟ್ಟು ಕರಕಲಾಗಿತ್ತು. ಕುಟುಂಬಸ್ಥರ ಡಿಎನ್‌ಎ ಮಾದರಿ ಪಡೆದು ಮೃತದೇಹವನ್ನು ಭಾನುವಾರ ಗುರುತಿಸಲಾಗಿತ್ತು.

ನವದೆಹಲಿ: ಪತನಗೊಂಡಿದ್ದ ಏರ್‌ ಇಂಡಿಯಾ ಬೋಯಿಂಗ್‌ 787–8 ವಿಮಾನದ ಬ್ಲ್ಯಾಕ್‌ ಬಾಕ್ಸ್‌  ‘ಕಾಕ್‌ಪಿಟ್ ವಾಯ್ಸ್ ರೆಕಾರ್ಡರ್‌’ (ಸಿವಿಆರ್) ಮತ್ತು ‘ಡಿಜಿಟಲ್‌ ಫ್ಲೈಟ್‌ ಡೇಟಾ ರೆಕಾರ್ಡರ್‌’ (ಡಿಎಫ್‌ಡಿಆರ್‌) ಪತ್ತೆಯಾಗಿರುವುದು ದುರಂತದ ಕಾರಣ ಪತ್ತೆಗೆ ತನಿಖಾಧಿಕಾರಿಗಳಿಗೆ ಮತ್ತಷ್ಟು ನೆರವಾಗಿದೆ. ಕೆಲವೊಮ್ಮೆ ಒಂದೇ ಬ್ಲ್ಯಾಕ್‌ಬಾಕ್ಸ್‌ನಲ್ಲಿ ಸಿವಿಆರ್‌ ಮತ್ತು ಡಿಎಫ್‌ಡಿಆರ್ ಇರುತ್ತವೆ. ಬಹುತೇಕ ಪ್ರಕರಣಗಳಲ್ಲಿ ಸಿವಿಆರ್‌ ಮತ್ತು ಡಿಎಫ್‌ಡಿಆರ್‌ ಪ್ರತ್ಯೇಕವಾಗಿರುತ್ತವೆ.  ಸಿವಿಆರ್‌ನಲ್ಲಿ ಕಾಕ್‌ಪಿಟ್‌ ಮತ್ತು ಪೈಲಟ್‌ಗಳ ಸಂವಹನವು ರೆಕಾರ್ಡ್‌ ಆಗಿರುತ್ತದೆ. ಡಿಎಫ್‌ಡಿಆರ್‌ನಲ್ಲಿ ವಿಮಾನ ಹಾರಾಟದ ಎತ್ತರ ಗಾಳಿಯ ವೇಗ ಸೇರಿದಂತೆ 80 ರೀತಿಯ ಮಾಹಿತಿ ಸಂಗ್ರಹವಾಗಿರುತ್ತದೆ. ಬ್ಲ್ಯಾಕ್‌ ಬಾಕ್ಸ್‌ ಎಂದು ಕರೆದರೂ ಇದು ಕಿತ್ತಳೆ ಅಥವಾ ಹಳದಿ ಬಣ್ಣದಲ್ಲಿರುತ್ತದೆ. ತಜ್ಞರಿಗೆ ಇದರಲ್ಲಿರುವ ಮಾಹಿತಿಯನ್ನು ಕಲೆಹಾಕಲು ಅಂದಾಜು ಎರಡು ವಾರಗಳು ಬೇಕಾಗುತ್ತದೆ ಎಂದು ಅಧಿಕಾರಿಗಳು ತಿಳಿಸಿದರು.

ಭೀಕರ ವಿಮಾನ ದುರಂತದಲ್ಲಿ ಪವಾಡದ ರೀತಿ ಬದುಕುಳಿದಿರುವ ವಿಶ್ವಾಸ್‌ ಕುಮಾರ್‌ ರಮೇಶ್‌ ಅವರು ವಿಮಾನ ಪತನವಾದ ಸ್ಥಳದಿಂದ ನಡೆದು ಬರುತ್ತಿರುವ ವಿಡಿಯೊ ಸಾಮಾಜಿಕ ಮಾಧ್ಯಮದಲ್ಲಿ ಹರಿದಾಡುತ್ತಿದೆ. ಬಿಳಿ ಬಣ್ಣದ ಟಿ–ಶರ್ಟ್‌ ಧರಿಸಿರುವ ಎಡಗೈನಲ್ಲಿ ಮೊಬೈಲ್‌ ಹಿಡಿದಿರುವ ರಮೇಶ್‌ ಅವರು ವಿಮಾನ ಪತನವಾದ ಸ್ಥಳದಿಂದ ನಡೆದು ಬರುತ್ತಿರುವ ಮತ್ತು ಅವರ ಹಿಂದೆ ದಟ್ಟವಾದ ಹೊಗೆ ಆವರಿಸಿರುವ ದೃಶ್ಯವು ವಿಡಿಯೊದಲ್ಲಿದೆ.  ಸ್ಥಳೀಯರು ವಿಶ್ವಾಸ್ ಅವರ ಕೈಹಿಡಿದು ಆಸ್ಪತ್ರೆಗೆ ಕರೆದೊಯ್ಯುತ್ತಿರುವ ದೃಶ್ಯವೂ ಅದರಲ್ಲಿದೆ.