ಬಿಬಿಎಂಪಿ ಶಾಲಾ–ಕಾಲೇಜುಗಳಿಗೆ ಶಿಕ್ಷಕರನ್ನು ಪೂರೈಸುವ ಜವಾಬ್ದಾರಿಯನ್ನು ಏಜೆನ್ಸಿಯ ಬದಲಿಗೆ ಶಿಕ್ಷಣ ಇಲಾಖೆಗೆ ವಹಿಸಲು ತೀರ್ಮಾನ ಮಾಡಿರುವುದು ಗುತ್ತಿಗೆ ಶಿಕ್ಷಕರನ್ನು ಚಿಂತೆಗೀಡು ಮಾಡಿದೆ. ಅಂದಹಾಗೆ, ಪ್ರೌಢಶಾಲೆಯಲ್ಲಿ ಬೋಧಿಸುತ್ತಿರುವ ಈ ಶಿಕ್ಷಕರು ಪಡೆಯುತ್ತಿರುವ ವೇತನ ತಿಂಗಳಿಗೆ ₹18,500 ಮಾತ್ರ. ಅತಿಥಿ ಶಿಕ್ಷಕರಾದರೆ ವೇತನ ಮತ್ತಷ್ಟು ಕಡಿಮೆಯಾಗಲಿದೆ ಎಂಬ ಆತಂಕದಲ್ಲಿರುವ ಈ ಶಿಕ್ಷಕರು, ಉಪನ್ಯಾಸಕರು ‘ನಮ್ಮ ಸೇವೆಯನ್ನು ಕಾಯಂ ಆಗಿ ಮಾಡದಿದ್ದರೂ ಬಿಬಿಎಂಪಿಯಿಂದ ನೇರಪಾವತಿ ಆಗುವಂತೆ ಮಾಡಬೇಕು ಎಂದು ಒತ್ತಾಯಿಸುತ್ತಾರೆ. ಸದ್ಯ ಬಿಬಿಎಂಪಿಯ ಶಾಲಾ–ಕಾಲೇಜುಗಳಲ್ಲಿ ಒಟ್ಟು 772 ಶಿಕ್ಷಕರು, ಉಪನ್ಯಾಸಕರು ಗುತ್ತಿಗೆ ಆಧಾರದ ಮೇಲೆ ಕೆಲಸ ಮಾಡುತ್ತಿದ್ದಾರೆ.
