ಕೇಂದ್ರದ ವಿರುದ್ಧ ರಾಜ್ಯದ ‘ಯುದ್ಧ’; ಫೆ.7ಕ್ಕೆ ದೆಹಲಿಯಲ್ಲಿ ಪ್ರತಿಭಟನೆ

‘₹100 ಕ್ಕೆ ₹12 ಮಾತ್ರ ಸಿಗುತ್ತಿದೆ’

* ರಾಜ್ಯದಲ್ಲಿ ಗ್ಯಾರಂಟಿ ಯೋಜನೆಗಳನ್ನು ಜಾರಿ ಮಾಡಿದ ಮೇಲೆ ರಾಜ್ಯದ ಜಿಎಸ್‌ಟಿ ಸಂಗ್ರಹದ ದರದಲ್ಲಿ ಗಮನಾರ್ಹ ಸಾಧನೆ (ಶೇ 17) ಮಾಡಿದ್ದೇವೆ. ಇಷ್ಟೆಲ್ಲ ಮಾಡಿದರೂ ಸಂಗ್ರಹವಾದ ಜಿಎಸ್‌ಟಿ ಮೊತ್ತದಲ್ಲಿ ರಾಜ್ಯಕ್ಕೆ ಶೇ 52ರಷ್ಟು ಮಾತ್ರ ಸಿಗುತ್ತಿದೆ. ಈ ವರ್ಷ ಸುಮಾರು ₹ 4 ಲಕ್ಷ ಕೋಟಿಗೂ ಹೆಚ್ಚು ತೆರಿಗೆ, ಸೆಸ್‌, ಸುಂಕ ರೂಪದಲ್ಲಿ ಸಂಗ್ರಹಿಸುತ್ತಿದೆ. ಆದರೆ, ನಮಗೆ ಕೇಂದ್ರ ನೀಡುತ್ತಿರುವುದು ಕೇವಲ ₹ 50,000 ಕೋಟಿಯಿಂದ ₹ 53,000 ಕೋಟಿ. ರಾಜ್ಯ ₹ 100 ಸಂಗ್ರಹಿಸಿ ಕೇಂದ್ರಕ್ಕೆ ಕೊಟ್ಟರೆ ಕರ್ನಾಟಕಕ್ಕೆ ವಾಪಸ್‌ ಕೊಡುವುದು ₹ 12ರಿಂದ ₹ 13 ಮಾತ್ರ

* 2018–19 ರಲ್ಲಿ ಕೇಂದ್ರ ಬಜೆಟ್‌ನ ಒಟ್ಟು ಗಾತ್ರ ₹ 24,42,213 ಕೋಟಿ ಇತ್ತು. ಆಗ ತೆರಿಗೆ ಪಾಲು ₹ 35,895 ಕೋಟಿ ಮತ್ತು ಕೇಂದ್ರ ಪುರಸ್ಕೃತ ಯೋಜನೆಯಡಿ ₹ 16,082 ಕೋಟಿ ಅನುದಾನ ಸಿಗುತ್ತಿತ್ತು. ಎರಡರಿಂದ ಒಟ್ಟಾರೆ ₹ 46,288 ಕೋಟಿಯಷ್ಟು ರಾಜ್ಯಕ್ಕೆ ಸಿಕ್ಕಿದೆ. 2023–24 ರ ಸಾಲಿನಲ್ಲಿ ಕೇಂದ್ರ ಬಜೆಟ್‌ ಗಾತ್ರ ₹ 45,03,097 ಕೋಟಿ. ಆದರೆ, ಈ ಬಾರಿ ಒಟ್ಟಾರೆ ₹ 50,257 ಮಾತ್ರ ಸಿಗುವ ಅಂದಾಜಿದೆ

* ಜಿಎಸ್‌ಟಿ ಅನುಷ್ಠಾನದಿಂದ ₹ 59,2754 ಕೋಟಿ (2017ರಿಂದ 2024), 15 ನೇ ಹಣಕಾಸು ಆಯೋಗದ ತೆರಿಗೆ ಪಾಲು ಹಂಚಿಕೆ ₹ 62,098 ಕೋಟಿ (2020ರಿಂದ 2025–26), ಸೆಸ್‌ ಮತ್ತು ಸರ್‌ಚಾರ್ಜ್‌ ಬಾಬ್ತಿನಿಂದ ₹ 55,000 ಕೋಟಿ (2017ರಿಂದ 2023–24), 15ನೇ ಹಣಕಾಸು ಆಯೋಗದ ವಿಶೇಷ ಅನುದಾನ ₹ 11,495 ಕೋಟಿ (2020ರಿಂದ 2021–22). ಒಟ್ಟು ₹ 1,87,867 ಕೋಟಿ ನಷ್ಟ ಆಗಿದೆ

* ಕೇಂದ್ರ ಸರ್ಕಾರವು ರಾಜ್ಯಕ್ಕೆ ನೀಡುತ್ತಿರುವ ತೆರಿಗೆ ಪಾಲು ಮತ್ತು ಅನುದಾನ 2018–19 ಕ್ಕೆ ಹೋಲಿಸಿದರೆ ಶೇ 40ರಿಂದ ಶೇ 45 ರಷ್ಟು ಕಡಿಮೆ ಆಗಿದೆ

ರಾಜಸ್ವ ಸ್ವೀಕೃತಿ ಹಿನ್ನಡೆ ಏಕೆ ಉತ್ತರಿಸಿ

ರಾಜಸ್ವ ಸ್ವೀಕೃತಿ ಗುರಿ (ರೆವಿನ್ಯೂ ರಿಸೀಟ್‌)₹2 ಲಕ್ಷ 38 ಸಾವಿರ ಕೋಟಿ ಇದ್ದು, ಡಿಸೆಂಬರ್ ಅಂತ್ಯಕ್ಕೆ ₹1 ಲಕ್ಷ 61 ಸಾವಿರ ಕೋಟಿ ಮಾತ್ರ ಸ್ವೀಕಾರ ಆಗಿದೆ. ಶೇ 67 ರಷ್ಟು ಮಾತ್ರ ಸಾಧನೆ ಆಗಿದೆ. ನಮ್ಮ ಸರ್ಕಾರ ಇದ್ದಾಗ ಶೇ 82 ರಷ್ಟು ಗುರಿ ಸಾಧಿಸಿದ್ದೆವು. ಸಿಎಂಗೆ ಗುರಿ ಸಾಧಿಸಲು ಆಗುತ್ತಿಲ್ಲ. ಶೇ 82 ರಿಂದ ಶೇ 67 ಕ್ಕೆ ಇಳಿದುದಕ್ಕೆ ಮೋದಿ ಅವರು ಮೇಲೆ ಆರೋಪ ಮಾಡುವುದನ್ನು ಬಿಡಲಿ. ಗುರಿ ಮುಟ್ಟಲು ಏಕೆ ಸಾಧ್ಯವಾಗಿಲ್ಲ ಎಂದು ಜನರಿಗೆ ಉತ್ತರಿಸಲಿ

– ಬಿ.ವೈ.ವಿಜಯೇಂದ್ರ, ಬಿಜೆಪಿ ರಾಜ್ಯ ಘಟಕದ ಅಧ್ಯಕ್ಷ

‘ಸಿದ್ದರಾಮಯ್ಯ ಅವರಿಂದಲೇ ರಾಜ್ಯಕ್ಕೆ ಅನ್ಯಾಯ’ : ಕೇಂದ್ರ ಕೊಟ್ಟಿದ್ದು ₹2,82,791 ಕೋಟಿ : ಬೊಮ್ಮಾಯಿ

ಪ್ರಧಾನಿ ನರೇಂದ್ರ ಮೋದಿ ಅವರ 10 ವರ್ಷಗಳ ಅವಧಿಯಲ್ಲಿ ರಾಜ್ಯಕ್ಕೆ ₹2,82,791 ಕೋಟಿ ಹಣ ಬಂದಿದ್ದು, ಯುಪಿಎ ಅವಧಿಯಲ್ಲಿ(2004–14) ತೆರಿಗೆ ಮೂಲಕ ಕೇವಲ ₹81,795 ಕೋಟಿ ಬಂದಿತ್ತು ಎಂದು ಮಾಜಿ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಹೇಳಿದರು.

ಸುದ್ದಿಗಾರರ ಜತೆ ಮಾತನಾಡಿದ ಅವರು, 15 ನೇ ಹಣಕಾಸು ಆಯೋಗದಿಂದ ಕರ್ನಾಟಕಕ್ಕೆ ಅನ್ಯಾಯ ಆಗಲು ಮೂಲ ಪುರುಷ ಸಿದ್ದರಾಮಯ್ಯ ಅವರೇ ವಿನಃ ಬೇರೆ ಯಾರೂ ಅಲ್ಲ ಎಂದೂ ಆರೋಪಿಸಿದರು.

ಬೊಮ್ಮಾಯಿ ಹೇಳಿದ್ದೇನು?

15 ನೇ ಹಣಕಾಸು ಆಯೋಗ ರಾಜ್ಯಕ್ಕೆ ಹಣ ಕಡಿಮೆ ನೀಡಿದೆ ಎಂದು ಸಿದ್ದರಾಮಯ್ಯ ಆರೋಪಿಸಿದ್ದಾರೆ. 15 ನೇ ಹಣಕಾಸು ಆಯೋಗದ ಸಮಿತಿಯು ರಾಜ್ಯಕ್ಕೆ ಬಂದ ಸಂದರ್ಭದಲ್ಲಿ ಸಿದ್ದರಾಮಯ್ಯ ಅವರದ್ದೇ ಸರ್ಕಾರ ಇತ್ತು. ಇವರು ರಾಜ್ಯದ ಆರ್ಥಿಕ ಪರಿಸ್ಥಿತಿಯ ಚಿತ್ರಣ ಸರಿಯಾಗಿ ನೀಡದ ಕಾರಣ 15 ನೇ ಹಣಕಾಸು ಆಯೋಗ ತೆರಿಗೆ ಪಾಲನ್ನು ಶೇ 4.7 ರಿಂದ ಶೇ 3.6 ಕ್ಕೆ ಕಡಿಮೆ ಮಾಡಿತು. ಇದಕ್ಕೆ ಸಿದ್ದರಾಮಯ್ಯ ಅವರೇ ನೇರ ಕಾರಣ.

 * ಅಭಿವೃದ್ಧಿ ಅನುದಾನ ಯುಪಿಎ ಅವಧಿಯಲ್ಲಿ₹60,779 ಕೋಟಿ ಬಂದಿದ್ದರೆ, ನರೇಂದ್ರಮೋದಿ ಅವಧಿಯಲ್ಲಿ ₹2,08,882 ಕೋಟಿ ಬಿಡುಗಡೆಯಾಗಿದೆ. 15ನೇ ಹಣಕಾಸು ಆಯೋಗದ ಅವಧಿ ಇನ್ನೂ ಎರಡು ವರ್ಷ ಇದೆ. 2026 ರ ವೇಳೆಗೆ ₹2.5 ಲಕ್ಷ ಕೋಟಿ ಮೀರಿ ತೆರಿಗೆ ಹಂಚಿಕೆ ಬರಲಿದೆ. ಇದು ಯುಪಿಎ ಅವಧಿಯಲ್ಲಿದ್ದ 14 ನೇ ಹಣಕಾಸು ಆಯೋಗದ ಶಿಫಾರಸಿಗಿಂತ ₹1,52,309 ಕೋಟಿ ಅಧಿಕ.

*ಇದಲ್ಲದೇ ಕೇಂದ್ರದಿಂದ ರಾಜ್ಯಕ್ಕೆ ಬೇರೆ ಬೇರೆ ರೂಪದಲ್ಲಿ ಅನುದಾನ ಬರುತ್ತಿದೆ. ಸ್ವಾತಂತ್ರ್ಯ ಬಂದಾಗಿನಿಂದ 2014 ರವರೆಗೆ ರಾಜ್ಯದಲ್ಲಿ ಕೇವಲ 6,000 ಕಿ.ಮೀ ಹೆದ್ದಾರಿ ಅಭಿವೃದ್ಧಿ ಆಗಿತ್ತು. ಮೋದಿ ಅವಧಿಯಲ್ಲಿ 13,500 ಕಿ.ಮೀ ರಾಷ್ಟ್ರೀಯ ಹೆದ್ದಾರಿ ಅಭಿವೃದ್ಧಿಯಾಗಿದೆ.

*ರಾಜ್ಯದ ರೈಲ್ವೆಗೆ ಯುಪಿಎ ಅವಧಿಯ 10 ವರ್ಷದಲ್ಲಿ ₹835 ಕೋಟಿ ಬಂದಿದ್ದರೆ, ಎನ್‌ಡಿಎ ಅವಧಿಯಲ್ಲಿ ₹11,000 ಕೋಟಿ ಬಂದಿದೆ. 2023–24 ನೇ ಬಜೆಟ್‌ನಲ್ಲಿ ₹7,524 ಕೋಟಿ ಹಂಚಿಕೆಯಾಗಿದೆ. ರೈಲ್ವೇ ವಿದ್ಯುದ್ದೀಕರಣಕ್ಕೆ 1947 ರಿಂದ 2014 ರವರೆಗೆ ರಾಜ್ಯದಲ್ಲಿ ಕೇವಲ 16 ಕಿ.ಮೀ ಅಭಿವೃದ್ಧಿ ಆಗಿದ್ದರೆ, ಎನ್‌ಡಿಎ ಅವಧಿಯಲ್ಲಿ 3,265 ಕಿ.ಮೀ ಅಭಿವೃದ್ಧಿ ಆಗಿದೆ.

*ಅನ್ನಭಾಗ್ಯದ  ಐದು ಕೆ.ಜಿ. ಅಕ್ಕಿ ನೀಡುತ್ತಿರುವುದೂ ಕೇಂದ್ರ ಸರ್ಕಾರವೇ. ಆದರೆ ಸಿದ್ದರಾಮಯ್ಯ ತಾವೇ ಅದನ್ನು ಕೊಡುತ್ತಿರುವುದಾಗಿ ಸುಳ್ಳು ಪ್ರಚಾರ ಮಾಡಿಕೊಳ್ಳುತ್ತಿದ್ದಾರೆ.

*ಭದ್ರಾ ಮೇಲ್ದಂಡೆ ಯೋಜನೆಗೆ ಕೇಂದ್ರ ₹5,300 ಕೋಟಿ ಘೋಷಿಸಿದೆ. ಕೇಂದ್ರದ ಹಣ ಬಿಡುಗಡೆ ಮಾಡಬೇಕಾದರೆ ರಾಜ್ಯ ಶೇ 50 ರಷ್ಟ ಭರಿಸಬೇಕು. ರಾಜ್ಯ ಸರ್ಕಾರ ಈವರೆಗೆ ಒಂದು ಪೈಸೆ ಬಿಡುಗಡೆ ಮಾಡಿಲ್ಲ.

*ರಾಜ್ಯ ಇತಿಹಾಸದಲ್ಲಿ ಅತಿ ಹೆಚ್ಚು ಸಾಲ ಮಾಡಿದ್ದು ಸಿದ್ದರಾಮಯ್ಯ ಅವಧಿಯಲ್ಲಿಯೇ. ಮುಂದೆಯೂ ಅವರು ಸಾಲ ಮಾಡಲಿದ್ದಾರೆ.

* ಗ್ಯಾರಂಟಿ ಯೋಜನೆಯ ಯಶಸ್ಸಿನ ಬಗ್ಗೆ ಸಿದ್ದರಾಮಯ್ಯ ಶ್ವೇತ ಪತ್ರ ಹೊರಡಿಸಲಿ.