ಚುರುಮುರಿ: ಅರ್ಥ, ಅಪಾರ್ಥ!

ಬ್ರೇಕಿಂಗ್ ನ್ಯೂಸ್ ಟೀವಿ ಪತ್ರಕರ್ತ ತೆಪರೇಸಿ ಸಂಪಾದಕರ ಮುಂದೆ ತೆಲಿ ಕೆಡಿಸ್ಕಂಡು ಕೂತಿದ್ದ. ‘ಯಾಕ್ರಿ ತೆಪರೇಸಿ, ಏನಾತು?’ ಸಂಪಾದಕರು ಕೇಳಿದರು.

. ‘ಏನೂ ಅರ್ಥ ಆಗ್ತಿಲ್ಲ ಸಾ...’ ಎಂದ ತೆಪರೇಸಿ.

. ‘ಅಂಥಾದ್ದೇನ್ರಿ ನಿಮ್ಗೆ ಅರ್ಥ ಆಗದೇ ಇರೋ ಅಂಥದ್ದು?’

. ‘ಎಲ್ಲದಕ್ಕೂ ಕೊನೆ ಅಂತ ಇರುತ್ತೆ ಅಂದ್ರೆ ಏನ್ಸಾ?’

. ‘ಹಾಗಂತ ಯಾರು ಹೇಳಿದ್ದು?’

. ‘ಯಾರರೆ ಹೇಳಿರ್ಲಿ, ಇಲ್ಲಿ ಯಾವುದೂ ಶಾಶ್ವತ ಅಲ್ಲ ಅಂದ್ರೆ ಏನರ್ಥ?’

. ‘ಗೊತ್ತಿಲ್ಲ...’

. ‘ಸರಿ, ಕೆಲ್ಸ ಮಾಡೋನೊಬ್ಬ, ಲಾಭ ಪಡೆಯೋನೊಬ್ಬ ಅಂದ್ರೆ?’

. ‘ಅಂದ್ರೆ ನೀನು ಕೆಲ್ಸ ಮಾಡ್ತಿದೀಯ, ನಾನು ಕೂತ್ಕಂಡು ಸಂಬಳ ತಗೋತಿದೀನಿ ಅಂತಾನಾ?’

. ‘ಥೋ... ನಿಮ್ ಬಗ್ಗೆ ಅಲ್ಲ ಸಾ... ಈಗ ಎಲ್ಲಿ ಭಕ್ತಿ ಇದೆ, ಅಲ್ಲಿ ಭಗವಂತ ಇರ್ತಾನೆ ಅಂದ್ರೆ?’

. ‘ಇದ್ರಲ್ಲಿ ಅರ್ಥ ಆಗದೇ ಇರೋ ಅಂಥದ್ದು ಏನಿದೆ? ಯಾರು ಹೇಳಿದ್ರು ಇದನ್ನ?’

. ‘ಒಬ್ಬ ರಾಜಕಾರಣಿ ಅನ್ಕಳಿ...’

. ‘ಅಂದ್ರೆ ಹೈಕಮಾಂಡ್ ಮೇಲೆ ಭಕ್ತಿ ಇದ್ರೆ ಅದು ಕುರ್ಚಿ ಕೊಟ್ಟು ಕಾಪಾಡುತ್ತೆ ಅಂತ...’

. ‘ನಾನು ಅಧಿಕಾರದಲ್ಲಿ ಇರ್ತೀನೋ ಇಲ್ಲವೋ ಗೊತ್ತಿಲ್ಲ ಅಂದ್ರೆ?’

. ‘ಅಂದ್ರೆ ಹೆಚ್ಚಿನ ಅಧಿಕಾರ ಕೊಟ್ರೆ ಇರ್ತೀನಿ, ಇಲ್ಲಾಂದ್ರೆ ಇಲ್ಲ ಅಂತ ಅರ್ಥ...’

. ‘ಕರೆಕ್ಟ್... ನಾನೇನು ಓಡಿ ಹೋಗೋ ಮನುಷ್ಯ ಅಲ್ಲ ಅಂದ್ರೆ?’

. ‘ಏನೇ ಬಂದ್ರೂ ಇಲ್ಲೇ ಇದ್ದು ಎದುರಿಸ್ತೀನಿ ಅಂತ... ಅಲ್ಲ, ಈ ಡೈಲಾಗ್ಗಳು ನಮ್ ಬಂಡೆ ಸಾಹೇಬ್ರವು ಅನಿಸ್ತಿದೆ, ಹೌದಾ?’

. ‘ಹೌದು ಸಾ... ಎಲ್ಲ ಅವರ ಮಾತೇ, ಆದ್ರೆ ಒಂದೂ ಅರ್ಥ ಆಗ್ತಿಲ್ಲ...’ ತೆಪರೇಸಿ ತೆಲಿ ಕೆರೆದುಕೊಂಡ.

. ‘ನಿಮ್ತೆಲಿ, ಇದೆಲ್ಲ ಅರ್ಥ ಆಗ್ಬೇಕು ಅಂದ್ರೆ ನಿಮ್ಗೆ ರಾಜಕೀಯ ಡಿಕ್ಷನರಿ ಗೊತ್ತಿರಬೇಕು...’

. ‘ಇಲ್ಲದಿದ್ರೆ?’

. ‘ಅರ್ಥ, ಅಪಾರ್ಥ ಆಗಿ ಆಮೇಲೆ ಒದೆ ತಿನ್ಬೇಕಾಗುತ್ತೆ...’

. ತೆಪರೇಸಿ ಪಿಟಿಕ್ಕನ್ನಲಿಲ್ಲ.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.