ಚುರುಮುರಿ: ಬ್ಯಾಗು ಪುರಾಣ!

‘ಬ್ಯಾಗ್ ಬೇಕೇ ಬ್ಯಾಗೂ... ಬೆಳಗಾವಿ ಬ್ಯಾಗು, ಬೆಂಗಳೂರು ಬ್ಯಾಗು, ಮಂಡ್ಯ ಬ್ಯಾಗೂ...’ ಎಂದ ತೆಪರೇಸಿ. ‘ಬೆಳಗಾವಿ ಬ್ಯಾಗಲ್ಲಿ ಏನೈತಲೆ ತೆಪರ?’ ದುಬ್ಬೀರ ಕೇಳಿದ.

. ‘ಅದ್ರಲ್ಲಿ ಜಮೀರಣ್ಣ, ಯತ್ನಾಳು ಗುಸಗುಸ, ಪಿಸಪಿಸ ಮಾತಾಡೋದೈತಿ’.

. ‘ಹಂಗಾದ್ರೆ ಪ್ರಿಯಾಂಕಾ ಗಾಂಧಿ ಪ್ಯಾಲೆಸ್ಟೀನ್ ಬ್ಯಾಗ್ ಹಾಕ್ಕಂಡಿದ್ರಲ್ಲ, ಅದ್ರಾಗೇನಿತ್ತು?’

. ‘ಅದ್ರಲ್ಲಿ ಇಡೀ ಜಗತ್ತೇ ಇತ್ತು’.

. ‘ಸರಿ, ಈಗ ಮಂಡ್ಯ ಬ್ಯಾಗಲ್ಲಿ ಏನೈತಿ?’.

. ‘ಅದ್ರಲ್ಲಿ ಭರ್ಜರಿ ಆ್ಯಂಡ್ ಸರ್ಜರಿ! ಸಮ್ಮೇಳ ನದ ಊಟ ಭರ್ಜರಿ, ಕವಿಗಳಿಗೆ ಸರ್ಜರಿ!’

. ‘ಸರ್ಜರಿನಾ? ಏನು ಹಂಗಂದ್ರೆ?’

. ‘ಅಂದ್ರೇ... ಕವಿಗಳು ಕವನ ಓದಾಕೆ ಬರೀ ಮೂರೇ ನಿಮಿಷ ಟೈಂ ಕೊಟ್ಟಾರಂತೆ. ಅವರು ಕೆಮ್ಮಾಕೆ, ಕ್ಯಾಕರಿಸಾಕೇ ಮೂರು ನಿಮಿಷ ಬೇಕು, ಇನ್ನು ಕವನ ಓದೋದೆಲ್ಲಿ?’

. ‘ಅವರು ಕೆಮ್ಮಿ, ಕ್ಯಾಕರಿಸಿದ್ದನ್ನೇ ಕವನ ಅಂದ್ಕಂಡ್ರಾತು’ ಗುಡ್ಡೆ ನಕ್ಕ.

. ‘ಅದಿರ್ಲಿ, ಬರೀ ಊರಿನ ಹೆಸರಿನ ಬ್ಯಾಗಷ್ಟೇ ಅದಾವೋ ಮಂದಿ ಹೆಸರಿನವೂ ಅದಾವೋ?’ ದುಬ್ಬೀರ ಕೇಳಿದ.

. ‘ಅದಾವು, ನಮೋ-ಶಾ ಬ್ಯಾಗು, ರಾಹುಲ್ ಬ್ಯಾಗು, ಬಂಡೆ ಬ್ಯಾಗು, ಬ್ರದರ್ ಬ್ಯಾಗು ಎಲ್ಲ ಅದಾವು’ ಎಂದ ತೆಪರೇಸಿ.

. ‘ಈ ಜಿ.ಟಿ.ದೇವೇಗೌಡ, ಸೋಮಶೇಖರ್ ಬ್ಯಾಗ್ಗಳಿಲ್ವಾ?’

. ‘ಅವೆಲ್ಲ ಸಿದ್ರಾಮಣ್ಣ ಅವರತ್ರ ಅದಾವು’.

. ‘ಸಿದ್ರಾಮಣ್ಣರ ಬ್ಯಾಗಲ್ಲಿ?’

. ‘ಬರೀ ಮುಡಾ ಫೈಲದಾವು’.

. ‘ನಮೋ-ಶಾ ಬ್ಯಾಗಲ್ಲಿ?’

. ‘ಒಂದು ದೇಶ, ಒಬ್ಬನೇ ನಾಯಕ!’

. ‘ಹಂಗಾರೆ ಬಂಡೆ ಬ್ಯಾಗಲ್ಲಿ ಸಿಎಂ ಕುರ್ಚಿ ಇರಬೋದಾ?’ ಕೊಟ್ರೇಶಿ ಕೊಕ್ಕೆ.

. ‘ಇರಬೋದು, ಹಂಗೇ ಬ್ರದರ್ ಬ್ಯಾಗಲ್ಲಿ ಆ ಕುರ್ಚಿ ತಪ್ಪಿಸೋದೆಂಗೆ ಅನ್ನೋದೂ ಇರಬೋದು’.

. ‘ಎಲ್ಲ ಸರಿ, ನಿನ್ ಬ್ಯಾಗಿನಾಗೇನೈತೋ ತೆಪರಾ?’ ದುಬ್ಬೀರ ಕೇಳಿದ.

. ‘ಅವನಿಗೆ ಬ್ಯಾಗೇ ಇಲ್ಲ, ಅವ್ನು ಯಾವಾಗ್ಲೂ ಅವನೆಂಡ್ತಿ ವ್ಯಾನಿಟಿ ಬ್ಯಾಗು ಹಿಡ್ಕಂಡಿರ್ತಾನೆ’ ಎಂದ ಗುಡ್ಡೆ. ಎಲ್ಲರೂ ಗೊಳ್ಳಂತ ನಕ್ಕರು.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.