ಸಂಪಾದಕೀಯ | ಮತದಾನದ ನಿಖರ ಸಂಖ್ಯೆಯನ್ನು ಪ್ರಕಟಿಸದಿರುವುದು ಸರಿಯಲ್ಲ

ಚುನಾವಣಾ ಆಯೋಗ ಪ್ರಕಟಿಸಿರುವ ದತ್ತಾಂಶವು ಪರಿ‍ಪೂರ್ಣವೂ ಅಲ್ಲ. ವಿವಿಧ ಕ್ಷೇತ್ರಗಳಲ್ಲಿ ಆಗಿರುವ ಮತದಾನದ ಶೇಕಡಾವಾರು ಪ್ರಮಾಣವನ್ನು ಮಾತ್ರ ಆಯೋಗವು ನೀಡಿದೆ; ಎಷ್ಟು ಸಂಖ್ಯೆಯ ಮತ ಚಲಾವಣೆಯಾಗಿದೆ ಎಂಬ ವಿವರವನ್ನು ನೀಡಿಲ್ಲ. ಈ ಹಿಂದೆ, ಎಷ್ಟು ಮತಗಳು ಚಲಾವಣೆ ಆಗಿವೆ ಎಂಬುದನ್ನು ಪ್ರಕಟಿಸುವ ಸಂಪ್ರದಾಯ ಇತ್ತು. ದತ್ತಾಂಶವನ್ನು ಅರ್ಥ ಮಾಡಿಕೊಳ್ಳಲು ಮತ್ತು ವ್ಯಾಖ್ಯಾನಿಸಲು ಶೇಕಡಾವಾರು ಪ್ರಮಾಣ ಸಾಕಾಗುವುದಿಲ್ಲ. ಚಲಾವಣೆಯಾದ ಮತಗಳ ಒಟ್ಟು ಸಂಖ್ಯೆಯ ಆಧಾರದಲ್ಲಿ ಶೇಕಡಾ ವಾರು ಪ್ರಮಾಣವನ್ನು ಕಂಡುಕೊಳ್ಳಲಾಗುತ್ತದೆ. ಮತದಾನವನ್ನು ಅರ್ಥ ಮಾಡಿಕೊಳ್ಳಲು ಮತ್ತು ವಿಶ್ಲೇಷಣೆಗೆ ಒಳಪಡಿಸಲು ನಿಖರವಾದ ಸಂಖ್ಯೆಯನ್ನೇ ಕೊಡಬೇಕು. ಮತದಾನ ಮಾಡಿದ ಜನರ ಸಂಖ್ಯೆಯು ದೊಡ್ಡದಿರುವ ಕಾರಣ ಶೇಕಡಾವಾರು ಪ್ರಮಾಣವು ಸತ್ಯವನ್ನು ಮರೆಮಾಚಬಹುದು. ಕೆಲವು ಸಂದರ್ಭ ಗಳಲ್ಲಿ ಕೆಲವೇ ಕೆಲವು ಮತಗಳ ವ್ಯತ್ಯಾಸ ಕೂಡ ಬಹುದೊಡ್ಡ ಪರಿಣಾಮಕ್ಕೆ ಕಾರಣ ಆಗಬಹುದು. ಶೇಕಡಾವಾರು ಪ್ರಮಾಣದಲ್ಲಿ ಕೂಡ ಆರಂಭದಲ್ಲಿ ಕೊಟ್ಟ ದತ್ತಾಂಶ ಹಾಗೂ ಅಂತಿಮ ದತ್ತಾಂಶದ ನಡುವೆ ದೊಡ್ಡ ಅಂತರ ಇರುವುದರ ಕುರಿತು ಕೂಡ ಕೆಲವು ರಾಜಕೀಯ ಪಕ್ಷಗಳು ಕಳವಳ ವ್ಯಕ್ತಪಡಿಸಿವೆ.
ಆರಂಭದಲ್ಲಿ ಕೊಟ್ಟ ದತ್ತಾಂಶ ಮತ್ತು ಅಂತಿಮ ದತ್ತಾಂಶದ ನಡುವೆ ಶೇ 5ರಿಂದ ಶೇ 6ರಷ್ಟು ವ್ಯತ್ಯಾಸ ಕಂಡುಬಂದಿದೆ. ಇದು ಕೂಡ ಅಸಹಜವೇ ಆಗಿದೆ. 

ಚುನಾವಣೆ ನಡೆಯುವ ಪ್ರತಿಯೊಂದು ಹಂತದಲ್ಲಿಯೂ ಚುನಾವಣಾ ಆಯೋಗವು ಯಾವುದೇ ಸಂದೇಹಕ್ಕೆ ಆಸ್ಪದ ಇಲ್ಲದ ರೀತಿಯಲ್ಲಿ ಸಮರ್ಪಕವಾಗಿ ನಡೆದುಕೊಳ್ಳಬೇಕು. ಆದರೆ, ಚುನಾವಣಾ ಆಯೋಗವು ಹಲವು ವಿಚಾರಗಳಲ್ಲಿ ಟೀಕೆಗೆ ಒಳಗಾಗಿದೆ. ಆಯೋಗವು ಸಿದ್ಧಪಡಿಸಿದ ಚುನಾವಣಾ ವೇಳಾಪಟ್ಟಿಯ ಕುರಿತೇ ಟೀಕೆಗಳು ಕೇಳಿಬಂದಿದ್ದವು. ಬಿಜೆಪಿಯ ಮುಖಂಡರು ಮತ್ತು ಕೇಂದ್ರದ ಸಚಿವರು ಚುನಾವಣಾ ಮಾದರಿ ನೀತಿ ಸಂಹಿತೆಯನ್ನು ಉಲ್ಲಂಘಿಸಿ ಮಾಡಿದ ದ್ವೇಷ ಭಾಷಣಗಳ ಕುರಿತು ಆಯೋಗವು ಯಾವ ಕ್ರಮವನ್ನೂ ಕೈಗೊಂಡಿಲ್ಲ. ಪ್ರಧಾನಿ ನರೇಂದ್ರ ಮೋದಿ ಅವರು ಮಾಡಿದ ದ್ವೇಷ ಭಾಷಣದ ಕುರಿತೂ ಆಯೋಗವು ಯಾವುದೇ ಕ್ರಮಕ್ಕೆ ಮುಂದಾಗಲಿಲ್ಲ. ಎಷ್ಟು ಜನರು ಮತದಾನ ಮಾಡಿದ್ದಾರೆ ಎಂಬ ಸಂಖ್ಯೆಯು ಬಹಳ ಮುಖ್ಯವಾದುದು. ಚುನಾವಣಾ ಆಯೋಗವು ನೀಡಿರುವ ಅಪೂರ್ಣ ಅಂಕಿ ಅಂಶವನ್ನು ಫಲಿತಾಂಶವನ್ನು ತಿರುಚಲು ಬಳಸಿಕೊಳ್ಳಬಹುದು ಎಂಬ ಆತಂಕವೂ ವ್ಯಕ್ತವಾಗಿದೆ. ಚುನಾವಣಾ ಆಯೋಗದ ಅಸಹಜ ನಡವಳಿಕೆಯೇ ಇಂತಹ ಆತಂಕಕ್ಕೆ ಕಾರಣವಾಗಿದೆ. ಚುನಾವಣಾ ಆಯೋಗದ ನಡವಳಿಕೆಯಲ್ಲಿ ರಹಸ್ಯ ಇರಬಾರದು; ಎಲ್ಲ ಹಂತಗಳಲ್ಲಿಯೂ ಪಾರದರ್ಶಕತೆ ಇರಬೇಕು; ಅದಕ್ಷವಾದ ನಡವಳಿಕೆ ಇರಲೇಬಾರದು. ಆಯೋಗವು ಮತದಾನಕ್ಕೆ ಸಂಬಂಧಿಸಿದ ಅಪೂರ್ಣ ಮತ್ತು ಅಸಮರ್ಪಕ ದತ್ತಾಂಶವನ್ನು ಪ್ರಕಟಿಸಿರುವುದು ಸರಿಯಲ್ಲ. ಒಂದು ವೇಳೆ ದತ್ತಾಂಶ ಪ್ರಕಟಣೆಯಲ್ಲಿ ಆಗಿರುವ ವಿಳಂಬ ಮತ್ತು ಮತದಾನದ ಸಂಖ್ಯೆಯನ್ನು ನೀಡದಿರುವುದಕ್ಕೆ ಕಾರಣಗಳಿದ್ದರೆ ಅವುಗಳನ್ನು ವಿವರಿಸಬೇಕಿತ್ತು.