ಸಂಪಾದಕೀಯ | ಮುಡಾ ಹಗರಣ: ತನಿಖೆಗೆ ಅನುಮತಿ ರಾಜಕೀಯ ಸಂಘರ್ಷಕ್ಕೆ ನಾಂದಿ

ತನಿಖೆಗೆ ಅನುಮತಿ ನೀಡಬಾರದು ಎಂದು ಸಚಿವ ಸಂಪುಟ ನೀಡಿದ ಸಲಹೆಯನ್ನು ರಾಜ್ಯಪಾಲರು ತಿರಸ್ಕರಿಸಿದ್ದಾರೆ. ಈ ಪ್ರಕರಣದಲ್ಲಿ ತನಿಖೆ ಅಗತ್ಯ ಇದೆ ಎಂದು ಮೇಲ್ನೋಟಕ್ಕೆ ಕಂಡುಬರುತ್ತಿದೆ ಎಂದು ಅವರು ಹೇಳಿದ್ದಾರೆ. ಆದರೆ, ರಾಜ್ಯಪಾಲರನ್ನು ಈವರೆಗೆ ದುರ್ಬಳಕೆ ಮಾಡಿಕೊಂಡಿರುವ ರೀತಿಯನ್ನು ಗಮನಿಸಿದರೆ, ಈ ಒಪ್ಪಿಗೆಯಲ್ಲಿ ರಾಜಕೀಯ ತಂತ್ರಗಾರಿಕೆಯೇ ಎದ್ದು ಕಾಣುತ್ತಿದೆ. ಇದು ಸರ್ಕಾರವನ್ನು ಉರುಳಿಸುವ ಕಾರ್ಯತಂತ್ರದ ಭಾಗ ಎಂಬ ಆರೋಪವನ್ನು ಕೂಡ ತಳ್ಳಿಹಾಕಲಾಗದು. ಬಿಜೆಪಿ ಈ ಹಿಂದೆ ನಡೆಸಿದಂತೆ ‘ಆ‍ಪರೇಷನ್‌ ಕಮಲ’ ನಡೆಸುವುದು ಹೆಚ್ಚು ದುಬಾರಿಯಾದ ಕಾರ್ಯಾಚರಣೆ. ಆದರೆ, ರಾಜ್ಯಪಾಲರನ್ನು ಬಳಸಿಕೊಂಡು ದಿಢೀರ್‌ ಕಾರ್ಯಾಚರಣೆ ನಡೆಸುವುದು ಅಗ್ಗದ ದಾರಿ. ಪಕ್ಷಾಂತರದಿಂದ ಸರ್ಕಾರವನ್ನು ಉರುಳಿಸಿದರೆ, ರಾಜಕೀಯವಾಗಿ ಸೋಲಾದರೂ ಅಧಿಕಾರ ಕಳೆದುಕೊಂಡ ಪಕ್ಷ ಅನುಕಂಪಕ್ಕೆ ಪಾತ್ರವಾಗುತ್ತದೆ. ಬಿಜೆಪಿ ಮುಖಂಡರ ವಿರುದ್ಧ ಇರುವ ಭ್ರಷ್ಟಾಚಾರ ಆರೋಪ‍ಗಳ ಕುರಿತ ತನಿಖೆಗೆ ಅನುಮತಿ ನೀಡುವ ವಿಚಾರದಲ್ಲಿ ರಾಜ್ಯಪಾಲರು ಇದೇ ಮಟ್ಟದ ಉತ್ಸಾಹ ತೋರುತ್ತಾರೆಯೇ ಎಂಬ ಪ್ರಶ್ನೆ ಈಗ ಇದೆ. ಒಂದು ವೇಳೆ ರಾಜ್ಯಪಾಲರು ಹಾಗೆ ಮಾಡದಿದ್ದರೆ ಅವರು ಪಕ್ಷಪಾತಿಯಾಗಿದ್ದಾರೆ ಎಂಬುದು ಬಹಿರಂಗವಾಗುತ್ತದೆ. ಅದೇನೇ ಇದ್ದರೂ ಸಿದ್ದರಾಮಯ್ಯ ವಿರುದ್ಧದ ಪ್ರಕರಣದ ತನಿಖೆಯಲ್ಲಿ ಅದು ಯಾವ ಬದಲಾವಣೆಯನ್ನೂ ಉಂಟುಮಾಡದು. 

ಸಿದ್ದರಾಮಯ್ಯ ಅವರ ವಾದವು ಬಹಳ ಸ್ಪಷ್ಟವಾಗಿ ಮನದಟ್ಟಾಗುವಂತೆ ಇಲ್ಲ. ಅವರ ಪತ್ನಿಗೆ ಮುಡಾ ನೀಡಿರುವ ಬದಲಿ ನಿವೇಶನಗಳ ಕುರಿತಾಗಿ ಇರುವ ಎಲ್ಲ ಪ್ರಶ್ನೆಗಳಿಗೆ ತೃಪ್ತಿಕರವಾದ ಉತ್ತರವನ್ನು ಅವರು ಕೊಟ್ಟಿಲ್ಲ. ಈ ವಿಚಾರವನ್ನು ವಿಧಾನಸಭೆಯಲ್ಲಿ ಚರ್ಚೆ ಮಾಡಲು ಸರ್ಕಾರವು ಸಿದ್ಧವಿರಲಿಲ್ಲ. ಸರ್ಕಾರ ನೇಮಕ ಮಾಡಿರುವ ತನಿಖಾ ಆಯೋಗದಿಂದ ಯಾವ ಪ್ರಯೋಜನವೂ ಆಗದು. ಆದರೆ, ಈಗಿನ ಸಂಘರ್ಷದಲ್ಲಿ ಭ್ರಷ್ಟಾಚಾರ ಎಂಬುದು ಒಂದು ವಿಷಯವೇ ಆಗಿ ಉಳಿದಿಲ್ಲ. ಸರ್ಕಾರವು ಭ್ರಷ್ಟಾಚಾರದಲ್ಲಿ ಮುಳುಗಿದೆ ಎಂಬ ಗ್ರಹಿಕೆಯನ್ನು ಮೂಡಿಸಿ, ಸರ್ಕಾರದ ಮೇಲೆ ಯುದ್ಧ ಸಾರುವುದಷ್ಟೇ ಇಲ್ಲಿನ ಉದ್ದೇಶ. ರಾಜಕೀಯ ಕ್ಷೇತ್ರದಲ್ಲಿ ಇರುವ ಯಾರು ಕೂಡ ಅವರಿಗಿಂತ ಇವರು ಉತ್ತಮ ಎಂದು ಹೇಳುವಂತೇನೂ ಇಲ್ಲ. ಒಬ್ಬರ ಮೇಲೊಬ್ಬರು ಆರೋಪ–ಪ್ರತ್ಯಾರೋಪ ಮಾಡುತ್ತಿರುವ ಈ ಸಂದರ್ಭದಲ್ಲಿ ಗೆಲುವು ಯಾರಿಗೆ– ರಾಜಕೀಯಕ್ಕೆ, ನೈತಿಕತೆಗೆ, ಸಾರ್ವಜನಿಕ ಹಿತಾಸಕ್ತಿಗೆ ಅಥವಾ ಹೊಂದಾಣಿಕೆ ರಾಜಕಾರಣಕ್ಕೆ? ಸತ್ಯ ಏನು ಎಂಬುದನ್ನು ತಿಳಿಯುವ ಹಕ್ಕು ಜನರಿಗೆ ಇದೆ. ಆದರೆ ಸತ್ಯ ಎಂದಾದರೂ ಹೊರಗೆ ಬಂದೀತೇ? ರಾಜ್ಯ ಸರ್ಕಾರದ ಅಧೀನದಲ್ಲಿ ಇಲ್ಲದ ಸಂಸ್ಥೆಯೊಂದರಿಂದ ನಿಷ್ಪಕ್ಷಪಾತವಾದ ತನಿಖೆಯ ಅಗತ್ಯವಿದೆ; ಅದು ಸಾಧ್ಯವಾದರೆ ಸ್ವಾಗತಾರ್ಹ.