ಸಂಪಾದಕೀಯ: ರಾಜಕಾರಣಿಗಳ ಬಾಯಿತುರಿಕೆಯಿಂದ ಲಿಂಗಸಂವೇದನೆಗೆ ನಿರಂತರ ಕುತ್ತು

ರಾಜ್ಯ ಸರ್ಕಾರದ ಗ್ಯಾರಂಟಿ ಯೋಜನೆಗಳಿಂದ ಹಳ್ಳಿಗಳ ತಾಯಂದಿರು ದಾರಿ ತಪ್ಪಿದ್ದಾರೆ ಎಂದು ಜೆಡಿಎಸ್‌ ರಾಜ್ಯ ಘಟಕದ ಅಧ್ಯಕ್ಷ ಎಚ್‌.ಡಿ. ಕುಮಾರಸ್ವಾಮಿ ಅವರು ಆಡಿರುವ ಮಾತು, ಲಿಂಗಸಂವೇದನೆಯ ಸೂಕ್ಷ್ಮಗಳನ್ನು ನಮ್ಮ ರಾಜಕೀಯ ನೇತಾರರು ಇನ್ನೂ ರೂಢಿಸಿಕೊಂಡಿಲ್ಲ ಎನ್ನುವುದಕ್ಕೆ ಹೊಸ ಉದಾಹರಣೆ.

ಲಿಂಗತಾರತಮ್ಯವನ್ನು ನಿವಾರಿಸಬೇಕಾದ ರಾಜಕಾರಣಿಗಳೇ ಲಿಂಗಭೇದವನ್ನು ಉತ್ತೇಜಿಸುವಂತೆ ಮಾತನಾಡುವುದು ದುರದೃಷ್ಟಕರ. ಕುಮಾರಸ್ವಾಮಿ ಅವರ ಅಭಿಪ್ರಾಯವನ್ನು ಸರ್ಕಾರದ ವಿರುದ್ಧದ ಟೀಕೆಯ ಭರದಲ್ಲಿ ಬಾಯ್ತಪ್ಪಿ ಬಂದಿರುವ ಮಾತೆಂದು ಭಾವಿಸುವಂತಿಲ್ಲ. ‘ನನ್ನ ಹೇಳಿಕೆಯಿಂದ ತಾಯಂದಿರಿಗೆ ನೋವಾಗಿದ್ದರೆ ವಿಷಾದಿಸುವೆ’ ಎಂದು ಹೇಳಿದ್ದರೂ ಅವರಿಗೆ ತಾವು ಆಡಿರುವ ಮಾತಿನ ಬಗ್ಗೆ ಪಶ್ಚಾತ್ತಾಪವೇನೂ ಆದಂತಿಲ್ಲ.

ಮಹಿಳೆಯರ ಬಗ್ಗೆ ತಮಗೆ ಅಪಾರ ಗೌರವವಿದೆ ಎಂದು ಹೇಳುತ್ತಲೇ ಲಿಂಗಭೇದದ ಮಾತುಗಳನ್ನಾಡುವ ರಾಜಕಾರಣಿಗಳ ಜಾಣ್ಮೆಯನ್ನು ಅವರೂ ಪ್ರದರ್ಶಿಸುತ್ತಿದ್ದಾರೆ. ಚುನಾವಣಾ ಪ್ರಚಾರದ ಸಂದರ್ಭದಲ್ಲಿ ರಾಜ್ಯ ಸರ್ಕಾರದ ಗ್ಯಾರಂಟಿ ಯೋಜನೆಗಳನ್ನು ಟೀಕಿಸುವ ಭರದಲ್ಲಿ ಕುಮಾರಸ್ವಾಮಿ ಅವರು ಮಹಿಳೆಯರ ಬಗ್ಗೆ ಲಘುವಾಗಿ ಮಾತನಾಡಿದ್ದಾರೆ. ಕಳೆದ ಲೋಕಸಭಾ ಚುನಾವಣೆ ಸಂದರ್ಭದಲ್ಲಿ ಹಾಗೂ ಚುನಾವಣೆ ನಂತರ ಸುಮಲತಾ ಅಂಬರೀಷ್‌ ಅವರ ಬಗ್ಗೆ ಕುಮಾರಸ್ವಾಮಿ ಅವರು ಆಡಿದ್ದ ಮಾತುಗಳೂ ವಿವಾದಕ್ಕೆ ಕಾರಣವಾಗಿ ದ್ದವು. ರಾಜಕೀಯ ಪಕ್ಷಗಳ ಮುಖಂಡರ ನಡುವೆ ಟೀಕೆ ಟಿಪ್ಪಣಿಗಳು ಸಹಜ.

ಟೀಕೆ ಅಥವಾ ಚರ್ಚೆಗಳನ್ನು ತಾತ್ವಿಕ ನೆಲೆಗಟ್ಟಿನಲ್ಲಿ ಮಾಡಬೇಕೇ ಹೊರತು, ವೈಯಕ್ತಿಕ ಕೆಸರೆರಚಾಟವು ಸಾರ್ವಜನಿಕ ಸಭ್ಯತೆಯಲ್ಲ. ಮಹಿಳೆಯರ ಬಗ್ಗೆ ಲಘುವಾಗಿ ಮಾತನಾಡಿರುವುದು ಕುಮಾರಸ್ವಾಮಿ ಒಬ್ಬರೇ ಅಲ್ಲ. ಬೆಳಗಾವಿ ಲೋಕಸಭಾ ಕ್ಷೇತ್ರದ ಬಿಜೆಪಿ ಉಸ್ತುವಾರಿ ಹೊಣೆ ಹೊತ್ತಿರುವ ಸಂಜಯ ಪಾಟೀಲ ಹಾಗೂ ಕಾಂಗ್ರೆಸ್‌ ಶಾಸಕ ಶಾಮನೂರು ಶಿವಶಂಕರಪ್ಪ ಇತ್ತೀಚೆಗೆ ಬೇಜವಾಬ್ದಾರಿಯಿಂದ ಮಾತನಾಡಿದ್ದರು. ‘ಬೆಳಗಾವಿ ಕ್ಷೇತ್ರದಲ್ಲಿ ಬಿಜೆಪಿಗೆ ಸಿಕ್ಕಿರುವ ಬೆಂಬಲ ನೋಡಿ ನಿದ್ದೆಗೆಡುವ ಅಕ್ಕ ನಿದ್ದೆ ಮಾತ್ರೆ ತೆಗೆದುಕೊಳ್ಳಬೇಕು ಇಲ್ಲವೇ ಒಂದು ಪೆಗ್‌ ಹೆಚ್ಚುವರಿ ಕುಡಿಯಬೇಕು’ ಎಂದು ಸಂಜಯ ಪಾಟೀಲ ವ್ಯಂಗ್ಯವಾಡಿದ್ದರು.

ದಾವಣಗೆರೆ ಲೋಕಸಭಾ ಕ್ಷೇತ್ರದ ಎದುರಾಳಿ ಮಹಿಳಾ ಅಭ್ಯರ್ಥಿಯನ್ನು ಉದ್ದೇಶಿಸಿ, ‘ಇವರು ಅಡುಗೆ ಮಾಡಿಕೊಂಡಿರುವುದಕ್ಕಷ್ಟೇ ಲಾಯಕ್ಕು’ ಎಂದು ಶಾಮನೂರು ಶಿವಶಂಕರಪ್ಪ ಹೇಳಿದ್ದರು. ಕೀಳು ಅಭಿರುಚಿಯ ಇಂಥ ಮಾತುಗಳನ್ನು ಲಿಂಗಸಂವೇದನೆಗೆ ಕುರುಡಾದಾಗಲಷ್ಟೇ ಆಡಲಿಕ್ಕೆ ಸಾಧ್ಯ. ಬಿಜೆಪಿ ನೇತೃತ್ವದ ನಿಕಟಪೂರ್ವ ಸರ್ಕಾರದ ಅವಧಿಯಲ್ಲಿ ಕಾಂಗ್ರೆಸ್‌ನ ಬಿ.ಕೆ. ಹರಿಪ್ರಸಾದ್‌ ಅವರು ‘ತಮ್ಮನ್ನು ತಾವು ಮಾರಿಕೊಂಡು ಪಕ್ಷಾಂತರ ಮಾಡಿದ ಶಾಸಕರನ್ನು ವೇಶ್ಯೆಯರೆಂದು ಕರೆಯಬಹುದೇ’ ಎಂದು ಜರಿದಿದ್ದನ್ನೂ, ಅದಕ್ಕೆ ಪ್ರತಿಯಾಗಿ ತಮ್ಮನ್ನು ಹೀಯಾಳಿಸಿದವರಿಗೆ ಅವರು ಬಳಸಿದ ಬೈಗುಳವನ್ನೇ ಅಂದಿನ ಸಚಿವರಾದ ಬಿ.ಸಿ. ಪಾಟೀಲ ಹಾಗೂ ಮುನಿರತ್ನ ಹಿಂತಿರುಗಿಸಿದ್ದನ್ನೂ ನೆನಪಿಸಿಕೊಳ್ಳಬಹುದು. ವೇಶ್ಯಾವೃತ್ತಿಯಲ್ಲಿ ಇರುವವರನ್ನು ಅವಮಾನಿಸುವಂತಿದ್ದ ಆ ಬೈಗುಳಗಳು ಹೆಣ್ಣನ್ನು ಭೋಗದ ವಸ್ತುವಿನ ರೂಪದಲ್ಲಿ ಪರಿಗಣಿಸುವ ಗಂಡಿನ ಮನಃಸ್ಥಿತಿಗೆ ನಿದರ್ಶನದಂತಿದ್ದವು. ವೇಶ್ಯಾವೃತ್ತಿಯಲ್ಲಿ ನಿರತರಾಗಿರುವವರು ಅನುಭವಿಸಬಹುದಾದ ಬಡತನ, ಹಸಿವು, ಅಸಹಾಯಕತೆ ಹಾಗೂ ದೇಹಶೋಷಣೆಯ ಸಾಧ್ಯತೆಗಳ ಅರಿವಿರುವ ಯಾರೂ ಹೀಗೆ ಮಾತನಾಡಲಾರರು.