ಸಂಪಾದಕೀಯ: ಹಿಂಸೆ ಹಿಂದೆ ಸರಿಯಲಿ; ಶಾಂತಿ, ಸೌಹಾರ್ದ ಮುನ್ನೆಲೆಗೆ ಬರಲಿ

ವೇದನೆ ಮತ್ತು ವಿಷಾದಕ್ಕೆ ಕಾರಣವಾಗಬೇಕಿದ್ದ ಈ ಸಾವನ್ನು ಬಿಜೆಪಿ ಮತ್ತು ಟಿಎಂಸಿ ರಾಜಕೀಯ ಮೇಲಾಟಕ್ಕೆ ಬಳಸಿಕೊಳ್ಳುತ್ತಿರುವುದು ನಾಚಿಕೆಗೇಡು. ರಾಜಕೀಯ ಹಿಂಸಾಚಾರದ ಇತಿಹಾಸ ರಾಜ್ಯಕ್ಕೆ ಇದೆ ಎಂಬ ಕಾರಣಕ್ಕೆ ಅದನ್ನು ಮುಂದುವರಿಸಿಕೊಂಡು ಹೋಗಬೇಕು ಎಂದೇನಿಲ್ಲ. ಹಿಂಸೆ ಮತ್ತು ವೈಷಮ್ಯವನ್ನು ಬದಿಗೊತ್ತಿ ಜನರಲ್ಲಿ ಪ್ರೀತಿ ಬಿತ್ತುವುದೇ ನಿಜವಾದ ನಾಯಕತ್ವ ಎಂಬುದರ ಅತಿ ದೊಡ್ಡ ನಿದರ್ಶನವಾಗಿ ಗಾಂಧೀಜಿ ನಮ್ಮ ಮುಂದಿದ್ದಾರೆ. ಆದರೆ, ಅಧಿಕಾರದಾಹ
ದಿಂದ ಕುರುಡಾಗಿರುವ ನಾಯಕರಿಗೆ ಇದು ಕಾಣಿಸದು. ರಾಜ್ಯದಲ್ಲಿ ವ್ಯಾಪಕವಾಗಿ ನಿಯೋಜನೆಗೊಂಡಿರುವ ‘ಕೇಂದ್ರೀಯ ಭದ್ರತಾ ಪಡೆಗಳು ಬಿಜೆಪಿ ಪರವಾಗಿ ಕೆಲಸ ಮಾಡುತ್ತಿವೆ, ಅವರಿಗೆ ಮುತ್ತಿಗೆ ಹಾಕಿ’ ಎಂದು ಮುಖ್ಯಮಂತ್ರಿ ಮತ್ತು ಟಿಎಂಸಿ ಮುಖ್ಯಸ್ಥೆ ಮಮತಾ ಬ್ಯಾನರ್ಜಿ ಪದೇ ಪದೇ ಹೇಳಿದ್ದಾರೆ. ‘ಮುತ್ತಿಗೆ ಹಾಕಿ’ ಎನ್ನುವುದು ಹೊಣೆ ಮರೆತ ಹೇಳಿಕೆ.ಇದನ್ನು ಪ್ರಚೋದನೆ ಎಂದು ಚುನಾವಣಾ ಆಯೋಗವು ಪರಿಗಣಿಸಿರುವುದರಲ್ಲಿ ಅರ್ಥ ಇದೆ. ಆದರೆ, ಮಮತಾ ಆರೋಪದಲ್ಲಿ ಸತ್ಯಾಂಶ ಇದೆಯೇ ಎಂಬುದನ್ನು ಪರಿಶೀಲಿಸುವುದು ತನ್ನ ಹೊಣೆ ಎಂಬುದನ್ನು ಆಯೋಗವು ಮರೆತಿದೆ. ಪ್ರಧಾನಿ ನರೇಂದ್ರ ಮೋದಿ ಮತ್ತು ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ಅವರಂತಹ ಅತ್ಯಂತ ಹೊಣೆಗಾರಿಕೆಯ ಸ್ಥಾನದಲ್ಲಿರುವವರು ಕೂಡ ಪ್ರಚೋದನಕಾರಿಯಾಗಿ ಮಾತನಾಡಿದ್ದಕ್ಕೆ ಈ ಚುನಾವಣಾ ಪ್ರಚಾರವು ಸಾಕ್ಷಿಯಾಯಿತು. ‘ನಾಟಿ ಬಾಯ್‌ಗಳು ಸರಿಯಾಗಿ ವರ್ತಿಸದಿದ್ದರೆ ಕೂಚ್‌ಬಿಹಾರದಂತಹ ಇನ್ನಷ್ಟು ಘಟನೆಗಳು ನಡೆದು ಇನ್ನೂ ಹೆಚ್ಚು ಜನರು ಸಾಯುತ್ತಾರೆ’ ಎಂದು ಬಿಜೆಪಿಯ ಪಶ್ಚಿಮ ಬಂಗಾಳ ಘಟಕದ ಅಧ್ಯಕ್ಷ ದಿಲೀಪ್ ಘೋಷ್ ಹೇಳಿದ್ದು ಏನನ್ನು ಸೂಚಿಸುತ್ತದೆ? ಪ್ರತಿ ದಿನವೂ ಕೆರಳಿಸುವ ಮಾತುಗಳನ್ನು ಆಡಿ ಇಡೀ ರಾಜ್ಯವನ್ನು ಅಗ್ನಿಪರ್ವತದ ರೀತಿಯಲ್ಲಿಪರಿವರ್ತಿಸಿದ್ದರ ಜವಾಬ್ದಾರಿಯನ್ನು ಅಲ್ಲಿನ ಎಲ್ಲ ರಾಜಕೀಯ ಪಕ್ಷಗಳ ನಾಯಕರು ಹೊತ್ತುಕೊಳ್ಳ
ಲೇಬೇಕು. ಪ್ರಜಾಪ್ರಭುತ್ವ ಎಂಬುದು ಯಾರಿಗೆ ಹೆಚ್ಚು ಹಿಂಸಾಚಾರ ನಡೆಸುವ ತಾಕತ್ತು ಇದೆ ಎಂಬುದರ ಪರೀಕ್ಷೆ ಅಲ್ಲ. ಜನರು ವಿವೇಚನೆಯಿಂದ ಮತ ಚಲಾಯಿಸಲು ಸಾಧ್ಯವಾಗುವಂತೆ ಇನ್ನುಳಿದ ನಾಲ್ಕು ಹಂತಗಳ ಮತದಾನವನ್ನು ಶಾಂತಿಯಿಂದ, ಮುಕ್ತವಾಗಿ ನಡೆಸುವ ದಿಸೆಯಲ್ಲಿ ಆಯೋಗ ಮತ್ತು ರಾಜಕೀಯ ಪಕ್ಷಗಳು ಗಮನ ಹರಿಸಬೇಕಿದೆ.