ಕೆಂಪೇಗೌಡ ಪೀಠ ಸ್ಥಾಪನೆಯಷ್ಟೇ ಸಾಲದು ಅಧ್ಯಯನವೂ ನಡೆಯಬೇಕು

ಬೆಂಗಳೂರು ವಿಶ್ವವಿದ್ಯಾಲಯದ ಆವರಣದಲ್ಲಿ ‘ನಾಡಪ್ರಭು ಕೆಂಪೇಗೌಡ ಅಧ್ಯಯನ ಪೀಠ’ ಸ್ಥಾಪನೆಯ ವಿಚಾರವು ರಾಜಕೀಯ ತಿಕ್ಕಾಟದ ಸ್ವರೂಪ ಪಡೆದುಕೊಂಡದ್ದು ದುರದೃಷ್ಟಕರ. ಸಿದ್ದರಾಮಯ್ಯ ನೇತೃತ್ವದ ಸರ್ಕಾರದ ಅವಧಿಯಲ್ಲಿ ಪೀಠ ಸ್ಥಾಪನೆಯ ನಿರ್ಧಾರ ಕೈಗೊಳ್ಳಲಾಗಿತ್ತು. ಅದಕ್ಕಾಗಿ, ಬೃಹತ್‌ ಬೆಂಗಳೂರು ಮಹಾನಗರಪಾಲಿಕೆಯ (ಬಿಬಿಎಂಪಿ) ಬಜೆಟ್‌ನಲ್ಲಿ ₹ 50 ಕೋಟಿ ಅನುದಾನ ಘೋಷಿಸಲಾಗಿತ್ತು. ಆದರೆ, ಬಿಬಿಎಂಪಿಯಲ್ಲಿ ಸಂಪನ್ಮೂಲ ಲಭ್ಯವಿಲ್ಲದ ಕಾರಣದಿಂದಾಗಿ ಅಧ್ಯಯನ ಪೀಠದ ಕಾಮಗಾರಿ ರದ್ದುಪಡಿಸುವಂತೆ ನಗರಾಭಿವೃದ್ಧಿ ಇಲಾಖೆಯ ಉನ್ನತ ಸಮಿತಿಯು ಬಿಬಿಎಂಪಿಗೆ ಬರೆದ ಪತ್ರವು ರಾಜಕಾರಣದ ಕೆಸರೆರಚಾಟಕ್ಕೆ ಕಾರಣವಾಯಿತು. ಪೀಠವನ್ನು ರದ್ದುಪಡಿಸಲು ಮುಂದಾದ ಕ್ರಮ ರಾಜಕೀಯ ದುರುದ್ದೇಶದಿಂದ ಕೂಡಿದೆ ಎನ್ನುವ ವಿರೋಧ ಪಕ್ಷಗಳ ನಾಯಕರ ಆರೋಪಗಳಿಗೆ ಉತ್ತರವಾಗಿ, ‘ಪೀಠ ಸ್ಥಾಪನೆ ಯೋಜನೆ ಕೈಬಿಟ್ಟಿಲ್ಲ, ಮುಂದಿನ ಬಜೆಟ್‌ನಲ್ಲಿ ಅನುದಾನ ಒದಗಿ ಸಲಾಗುವುದು’ ಎಂದು ಮುಖ್ಯಮಂತ್ರಿ ಬಿ.ಎಸ್‌. ಯಡಿಯೂರಪ್ಪ ಹೇಳಿದ್ದಾರೆ. ಅದರ ಬೆನ್ನಿಗೇ ನಗರಾಭಿವೃದ್ಧಿ ಇಲಾಖೆಯು ಈ ಯೋಜನೆಯ ಕಾಮಗಾರಿಗೆ ಷರತ್ತುಬದ್ಧ ಅನುಮೋದನೆ ನೀಡಿದೆ. ಈ ಆರೋಪ ಮತ್ತು ಸ್ಪಷ್ಟನೆಗಳ ಹಿಂದೆ ಕೆಂಪೇಗೌಡರ ಬಗೆಗಿನ ಕಾಳಜಿಗಿಂತಲೂ ರಾಜಕೀಯ ಲೆಕ್ಕಾಚಾರಗಳೇ ಎದ್ದುಕಾಣಿಸುತ್ತಿವೆ. ಉದ್ದೇಶಿತ ಪೀಠದಿಂದ ಏನು ಪ್ರಯೋಜನ ಎನ್ನುವ ಸ್ಪಷ್ಟತೆ ಸರ್ಕಾರಕ್ಕೂ ಇದ್ದಂತಿಲ್ಲ, ವಿರೋಧ ಪಕ್ಷಗಳಿಗೂ ಅದು ಬೇಕಾಗಿಲ್ಲ. ಪರಸ್ಪರರನ್ನು ಹೀಗಳೆಯಲು ಕೆಂಪೇಗೌಡರು ದಾಳವಾಗಿ ಬಳಕೆಯಾಗುತ್ತಿದ್ದಾರೆ ಅಷ್ಟೆ. ಈ ಯೋಜನೆಗೆ ಬಿಬಿಎಂಪಿ ₹50 ಕೋಟಿ ನೀಡಬೇಕೆಂಬ ಯೋಚನೆಯೇ ಅಚ್ಚರಿ ಹುಟ್ಟಿಸುವಂತ ಹದ್ದು. ಬೆಂಗಳೂರಿನ ರಸ್ತೆಗಳಲ್ಲಿನ ಗುಂಡಿಗಳನ್ನು ಮುಚ್ಚುವುದಕ್ಕೇ ದುಡ್ಡಿಲ್ಲದ ಬಿಬಿಎಂಪಿ, ಅಧ್ಯಯನ ಪೀಠವೊಂದಕ್ಕೆ ಕೋಟ್ಯಂತರ ರೂಪಾಯಿ ಕೊಡುವಷ್ಟು ಶ್ರೀಮಂತವಾಗಿದೆಯೇ? ಗ್ರಂಥಾಲಯ ಇಲಾಖೆಗೆ ಸೇರಬೇಕಾಗಿದ್ದ ನೂರಾರು ಕೋಟಿ ರೂಪಾಯಿ ಮೊತ್ತವನ್ನು ಬಾಕಿ ಉಳಿಸಿಕೊಂಡು ‘ಪುಸ್ತಕ ಸಂಸ್ಕೃತಿ’ಗೆ ಮೊಳೆ ಹೊಡೆಯುತ್ತಿರುವ ಪಾಲಿಕೆಯು ಕೆಂಪೇಗೌಡರ ಹೆಸರಿನಲ್ಲಿ ಸಾಂಸ್ಕೃತಿಕ ಕಾಳಜಿ ಪ್ರದರ್ಶಿಸುತ್ತದೆಂದು ನಂಬುವುದು ಹೇಗೆ? ಉದ್ದೇಶಿತ ಪೀಠವು ಕೆಂಪೇಗೌಡರ ಇತಿಹಾಸ ಹಾಗೂ ಚಿಂತನೆಗಳ ಅಧ್ಯಯನಕ್ಕೆ ನೆರವಾಗಲಿದೆ ಎಂದು ಹೇಳಲಾಗಿದೆ. ಇದೇ ಕೆಲಸವನ್ನು ವಿಶ್ವವಿದ್ಯಾಲಯದ ಇತಿಹಾಸ ವಿಭಾಗ ಯಾಕೆ ಮಾಡಬಾರದು? ನಮ್ಮ ರಾಜಕಾರಣಿಗಳಿಗೆ ಅಧ್ಯಯನಕ್ಕಿಂತಲೂ ಹೆಚ್ಚಾಗಿ ಹೊಸ ಹೊಸ ಕುರ್ಚಿಗಳ ಅವಕಾಶಗಳನ್ನು ಸೃಷ್ಟಿಸುವುದು, ಆ ಮೂಲಕ ಸಾರ್ವಜನಿಕರ ತೆರಿಗೆಯ ಕೋಟ್ಯಂತರ ರೂಪಾಯಿ ಖರ್ಚು ಮಾಡುವುದೇ ಮುಖ್ಯವಾಗಿದೆ.