ಸಂಪಾದಕೀಯ| ಪಾಕ್ ಸೇನಾ ಮುಖ್ಯಸ್ಥರಾಗಿ ಮುನೀರ್: ನಾಯಕತ್ವ ಗುಣಕ್ಕೆ ಅಗ್ನಿಪರೀಕ್ಷೆ

ಸೇನಾ ಮುಖ್ಯಸ್ಥರಾಗಿ ಮುನೀರ್ ಅವರು ಅಧಿಕಾರ ವಹಿಸಿಕೊಳ್ಳುತ್ತಿರುವ ಈ ಸನ್ನಿವೇಶವು ಅತ್ಯಂತ ಸವಾಲಿನದ್ದಾಗಿದೆ. ತಮ್ಮ ಪ್ರತಿಭಟನಾ ಜಾಥಾವನ್ನು ಕೈಬಿಡುವುದಾಗಿ ಇಮ್ರಾನ್‌ ಅವರು ಈಗ ಹೇಳಿದ್ದಾರೆ. ಆದರೆ, ಎಲ್ಲ ಶಾಸನಸಭೆಗಳಲ್ಲಿರುವ ತಮ್ಮ ಪಕ್ಷದ ಪ್ರತಿನಿಧಿಗಳಿಗೆ ರಾಜೀನಾಮೆ ನೀಡಲು ಸೂಚಿಸುವ ಮೂಲಕ ಚುನಾವಣೆಯನ್ನು ಅನಿವಾರ್ಯ ವಾಗಿಸುವ ಕಾರ್ಯತಂತ್ರವನ್ನು ಇಮ್ರಾನ್‌ ಹೆಣೆದಿದ್ದಾರೆ. ಇಮ್ರಾನ್‌ ಅವರ ಕಾರ್ಯತಂತ್ರವು ರಾಜಕೀಯ ಬಿಕ್ಕಟ್ಟು ಸೃಷ್ಟಿಸಿದರೆ, ಅದು ಮುನೀರ್ ಅವರು ಎದುರಿಸಬೇಕಾಗುವ ಮೊದಲ ಸವಾಲು ಆಗಬಹುದು. ಮಧ್ಯಪ್ರವೇಶಿಸುವ ಪ್ರಲೋಭನೆ
ಯನ್ನು ನಿಯಂತ್ರಿಸಿಕೊಳ್ಳುವುದು ಅವರಿಗೆ ಸಾಧ್ಯವಾಗಬಹುದೇ? ಅವರು ಈ ಅವಕಾಶವನ್ನು ಸೇಡು ತೀರಿಸಿಕೊಳ್ಳಲು ಬಳಸಿಕೊಳ್ಳಬಹುದೇ? ದೇಶವನ್ನು ನಿಯಂತ್ರಣಕ್ಕೆ ತೆಗೆದುಕೊಳ್ಳಬಹುದೇ? ಪಾಕಿಸ್ತಾನದ ಆಂತರಿಕ ಸುರಕ್ಷತೆಯು ಶೋಚನೀಯ ಸ್ಥಿತಿಯಲ್ಲಿದೆ. ತೆಹ್ರೀಕ್‌ ಎ ತಾಲಿಬಾನ್‌ ಪಾಕಿಸ್ತಾನ (ಟಿಟಿಪಿ) ಉಗ್ರ ಸಂಘಟನೆಯು ಗಂಭೀರವಾದ ಬೆದರಿಕೆಯಾಗಿದೆ. ಇದು ಅಫ್ಗಾನಿಸ್ತಾನದ ತಾಲಿಬಾನ್‌ ಸರ್ಕಾರದ ಜೊತೆಗೆ ಪಾಕಿಸ್ತಾನದ ಸಂಬಂಧದ ಮೇಲೆಯೂ ಕರಿಛಾಯೆ ಬೀರುತ್ತದೆ. ಟಿಟಿಪಿ ಮತ್ತು ಬಲೂಚ್‌ ಪ್ರದೇಶದಲ್ಲಿನ ಭಯೋತ್ಪಾದನೆಯ ವಿಚಾರದಲ್ಲಿ ಪಾಕಿಸ್ತಾನ ಸರ್ಕಾರ ತೆಗೆದುಕೊಳ್ಳುವ ನಿರ್ಧಾರಗಳನ್ನು ಸೇನೆಯು ಬೆಂಬಲಿಸಬಹುದೇ? ಭಾರತದ ಜೊತೆಗಿನ ಸಂಬಂಧದ ಕುರಿತೂ ಗಮನ ಹರಿಸಬೇಕಿದೆ. ಭಾರತದ ಜೊತೆಗಿನ ಸಂಬಂಧವನ್ನು ಉತ್ತಮಪಡಿಸಿಕೊಳ್ಳುವ ದಿಸೆಯಲ್ಲಿ ಸರ್ಕಾರವು ಕೆಲಸ ಮಾಡಲು ಮುನೀರ್ ಅವರು ಅವಕಾಶ ಕೊಡಬಹುದೇ? ಅಥವಾ ಕದನವಿರಾಮ ಉಲ್ಲಂಘನೆ ಮತ್ತು ಉಗ್ರರನ್ನು ಭಾರತಕ್ಕೆ ಕಳುಹಿಸುವ ಐಎಸ್‌ಐ ಮತ್ತು ಸೇನೆಯ ಈ ಹಿಂದಿನ ಕುತಂತ್ರವನ್ನೇ ಮುನೀರ್‌ ಅವರೂ ಅನುಸರಿಸಲಿದ್ದಾರೆಯೇ?

ಸ್ವಾತಂತ್ರ್ಯ ಬಂದಾಗಿನಿಂದಲೂ ಪಾಕಿಸ್ತಾನದಲ್ಲಿ ಆಳ್ವಿಕೆ ನಡೆಸಿರುವ ಎಲ್ಲ ಸರ್ಕಾರಗಳೂ ಸೇನೆಯ ಮೇಲೆ ಒಂದು ಕಣ್ಣಿಟ್ಟುಕೊಂಡೇ ಇದ್ದವು. ಗಡಿಯಲ್ಲಿನ ಸುರಕ್ಷತೆಯನ್ನು ಖಾತರಿಪಡಿಸುವುದು ಮುನೀರ್‌ ಅವರ ಹೊಣೆಗಾರಿಕೆಯಾಗಿದೆ. ಪಾಕಿಸ್ತಾನವು ತೀವ್ರ ಆರ್ಥಿಕ ಬಿಕ್ಕಟ್ಟಿಗೆ ಸಿಲುಕಿದೆ. ಸೇನಾ ವೆಚ್ಚವನ್ನು ಕಡಿತಗೊಳಿಸುವ ಮೂಲಕ ಮುನೀರ್ ಅವರು ಸಕಾರಾತ್ಮಕ ಸಂದೇಶ ರವಾನಿಸಬಹುದು. ಈ ಮೂಲಕ ಜನರಿಗೆ ಹೆಚ್ಚು ಉತ್ತರದಾಯಿ ಎನಿಸಿಕೊಳ್ಳಬಹುದು.