ಸಂಪಾದಕೀಯ: ರೆಪೊ ದರ ಯಥಾಸ್ಥಿತಿ, ಗ್ರಾಹಕರ ವಿಶ್ವಾಸ ಹೆಚ್ಚಿಸಬೇಕು

ಇಂತಹ ಪರಿಸ್ಥಿತಿಯಲ್ಲಿ ಆರ್‌ಬಿಐ, ರೆಪೊ ದರಗಳಲ್ಲಿ ಈಗಿನ ಮಟ್ಟವನ್ನೇ ಮುಂದೆಯೂ ಕಾಯ್ದುಕೊಳ್ಳಲು ಬಯಸುವುದಾದರೆ, ಹಣದುಬ್ಬರ ಪ್ರಮಾಣವನ್ನು ತಗ್ಗಿಸಲು ತಕ್ಷಣ ಕ್ರಮ ಕೈಗೊಳ್ಳಬೇಕು. ಅದಾಗದಿದ್ದಲ್ಲಿ, ಬಡ್ಡಿ ದರವನ್ನು ಸ್ವಲ್ಪಮಟ್ಟಿಗೆ ಹೆಚ್ಚಿಸುವ ಬಗ್ಗೆಯೂ ಆಲೋಚಿಸಬಹುದು. ಹಣದುಬ್ಬರ ಪ್ರಮಾಣವು ಈ ಆರ್ಥಿಕ ವರ್ಷದ ಕೊನೆಯ ತ್ರೈಮಾಸಿಕದಲ್ಲಿ ಶೇಕಡ 5.8ರ ಮಟ್ಟಕ್ಕೆ ತಗ್ಗಲಿದೆ ಎಂಬುದು ಆರ್‌ಬಿಐ ಮಾಡಿರುವ ಅಂದಾಜು. ಅಲ್ಲಿಯವರೆಗೂ ಅದು ಶೇಕಡ 6ಕ್ಕಿಂತ ಹೆಚ್ಚಿನ ಮಟ್ಟದಲ್ಲಿ ಇರುವ ನಿರೀಕ್ಷೆ ಇದೆ. ಇದು ಕಳವಳಕಾರಿ. ಏಕೆಂದರೆ, ತೀವ್ರ ಹಣದುಬ್ಬರ ಹಾಗೂ ಠೇವಣಿ ಮೇಲಿನ ಕಡಿಮೆ ಬಡ್ಡಿ ದರದ ಸ್ಥಿತಿಯು ನೇರವಾಗಿ ಏಟು ಕೊಡುವುದು ದೇಶದ ಜನಸಾಮಾನ್ಯರಿಗೆ. ಹಾಲಿ ಹಣಕಾಸು ವರ್ಷದಲ್ಲಿ ಜಿಡಿಪಿ ಬೆಳವಣಿಗೆ ದರವು ಶೇಕಡ (–)9.5ರಷ್ಟು ಇರಲಿದೆ ಎಂದು ಈ ಮೊದಲು ಅಂದಾಜಿಸಿದ್ದ ಆರ್‌ಬಿಐ, ಈಗ ತನ್ನ ಅಂದಾಜನ್ನು ಪರಿಷ್ಕರಿಸಿದೆ. ಅರ್ಥವ್ಯವಸ್ಥೆಯು ನಿರೀಕ್ಷೆಗಿಂತ ವೇಗವಾಗಿ ಬೆಳವಣಿಗೆ ಕಾಣುತ್ತಿದ್ದು, ಅದು ಈ ವರ್ಷದಲ್ಲಿ ಶೇಕಡ (–)7.5ರಷ್ಟು ಬೆಳವಣಿಗೆ ಕಾಣಲಿದೆ ಎಂದು ಹೇಳಿದೆ. ಈ ಅಂಕಿ–ಅಂಶದಲ್ಲಿ ಭಾರಿ ಖುಷಿಗೆ ಕಾರಣವಾಗುವಂಥದ್ದು ಏನೂ ಇಲ್ಲವಾದರೂ ಕುಸಿತದ ಪ್ರಮಾಣದಲ್ಲಿ ಒಂದಿಷ್ಟು ಕಡಿಮೆ ಆಗಬಹುದು ಎಂಬ ಭರವಸೆಯನ್ನು ಇದು ಮೂಡಿಸುವಂತೆ ಇದೆ. ಆದಾಯ, ಉದ್ಯೋಗ ಲಭ್ಯತೆ, ಒಟ್ಟಾರೆ ಅರ್ಥವ್ಯವಸ್ಥೆ ಕುರಿತು ಗ್ರಾಹಕರಲ್ಲಿನ ವಿಶ್ವಾಸದ ಬಗ್ಗೆ ಆರ್‌ಬಿಐ ನಡೆಸಿದ ಸಮೀಕ್ಷೆಯು ನವೆಂಬರ್‌ನಲ್ಲಿ ಗ್ರಾಹಕರ ವಿಶ್ವಾಸ ಕಡಿಮೆ ಮಟ್ಟದಲ್ಲಿಯೇ ಇದ್ದಿದ್ದನ್ನು ಕಂಡುಕೊಂಡಿದೆ. ಜಿಡಿಪಿ ಬೆಳವಣಿಗೆ ದರ, ಹಣದುಬ್ಬರ ಪ್ರಮಾಣ, ರೆಪೊ ದರ... ಇಂಥವುಗಳಿಗೆ ಸಂಬಂಧಿಸಿದ ಅಂಕಿ–ಅಂಶಗಳನ್ನೆಲ್ಲ ಹಿತಕರ ಮಟ್ಟಕ್ಕೆ ತರುವ ಮೊದಲು ಆಗಬೇಕಿರುವುದು ಗ್ರಾಹಕರಲ್ಲಿ ಅರ್ಥವ್ಯವಸ್ಥೆಯ ಬಗ್ಗೆ ವಿಶ್ವಾಸ ಹೆಚ್ಚಿಸುವಂತೆ ಮಾಡುವ ಕೆಲಸ. ಅವರು ಖುಷಿಯಿಂದ, ವಿಶ್ವಾಸದಿಂದ ಮಾರುಕಟ್ಟೆಯಲ್ಲಿ ಖರೀದಿ ವಹಿವಾಟು ಆರಂಭಿಸಿದರೆ ಹೆಚ್ಚಿನ ಸಮಸ್ಯೆಗಳು ತಾವಾಗಿಯೇ ಪರಿಹಾರ ಆಗುತ್ತವೆ. ಈ ಕೆಲಸವು ಆರ್‌ಬಿಐ ಒಂದರಿಂದಲೇ ಆಗುವಂಥದ್ದಲ್ಲ; ಇದಕ್ಕೆ ಸರ್ಕಾರಗಳ ನೆರವೂ ಬೇಕು.