ಸಂಪಾದಕೀಯ: ಪ್ರತಿಮಾ ರಾಜಕಾರಣ– ಮಹಾರಾಷ್ಟ್ರದಲ್ಲಿ ಭಾವನೆಗಳೊಂದಿಗೆ ನಾಯಕರ ಆಟ

ಶಿವಾಜಿ ಎಂಬ ಹೆಸರು ಮಹಾರಾಷ್ಟ್ರದ ಮಟ್ಟಿಗೆ ಭಾವನಾತ್ಮಕವಾದುದು ಮತ್ತು ಬಹುದೊಡ್ಡ ಸಂಕೇತ. ವಿಧಾನಸಭೆ ಚುನಾವಣೆಯು ಹೊಸ್ತಿಲಲ್ಲಿಯೇ ಇರುವಾಗ ಯಾವ ಪಕ್ಷವೂ ಇಂತಹುದೊಂದು ವಿವಾದ
ವನ್ನು ಕೈಬಿಡುವುದಿಲ್ಲ. ಪ್ರತಿಮೆ ನಿರ್ಮಾಣದಲ್ಲಿ ಅವ್ಯವಹಾರ ನಡೆದಿದೆ ಎಂಬುದಕ್ಕಿಂತ ಶಿವಾಜಿಗೆ ರಾಜ್ಯ ಸರ್ಕಾರವು ಅವಮಾನ ಮಾಡಿದೆ ಎಂದೇ ಬಿಂಬಿಸಲು ಉದ್ಧವ್‌ ಠಾಕ್ರೆ ನೇತೃತ್ವದ ವಿರೋಧ ಪಕ್ಷಗಳ ಮೈತ್ರಿಕೂಟ ಮಹಾ ವಿಕಾಸ ಆಘಾಡಿ (ಎಂವಿಎ) ಪ್ರಯತ್ನಿಸುತ್ತಿದೆ. ಅದರಲ್ಲಿ ಸ್ವಲ್ಪಮಟ್ಟಿನ ಯಶಸ್ಸು ಕೂಡ ಈ ಮೈತ್ರಿಕೂಟಕ್ಕೆ ದೊರೆತಿದೆ. ಲೋಕಸಭಾ ಚುನಾವಣೆಯಲ್ಲಿ ಮಹಾರಾಷ್ಟ್ರದಲ್ಲಿ ಆಡಳಿತಾರೂಢ ಮೈತ್ರಿಕೂಟಕ್ಕೆ ಭಾರಿ ಹಿನ್ನಡೆ ಆಗಿತ್ತು. ಹಾಗಾಗಿಯೇ ಪ್ರಧಾನಿ ನರೇಂದ್ರ ಮೋದಿ ಅವರು ಕೂಡ ಪ್ರತಿಮೆ ಕುಸಿದಿದ್ದಕ್ಕೆ ಬಹಿರಂಗವಾಗಿ ಕ್ಷಮೆ ಯಾಚಿಸಿ, ‘ಶಿವಾಜಿ ಮಹಾರಾಜ್‌ ಅಂದರೆ ನಮಗೆ ಒಬ್ಬ ರಾಜ ಮಾತ್ರ ಅಲ್ಲ, ದೇವರಿಗೆ ಸಮಾನ’ ಎಂದು ಆದ ಹಾನಿಯನ್ನು ಸರಿಪಡಿಸಿಕೊಳ್ಳುವ ಪ್ರಯತ್ನ ಮಾಡಿದರು.

ಬಿಜೆಪಿ ರಾಜ್ಯದಾದ್ಯಂತ ಎಂವಿಎ ವಿರುದ್ಧ ಪ‍್ರತಿಭಟನೆಯನ್ನೂ ನಡೆಸಿತು. ಧರ್ಮ, ಜಾತಿ ನಡುವೆ ಬಿರುಕು ಮೂಡಿಸುವುದು, ಭಾವನಾತ್ಮಕತೆಯನ್ನು ಕೆಣಕಿ ಜನರು ಉನ್ಮಾದಗೊಳ್ಳುವಂತೆ ಮಾಡುವುದೇ ಈ ಕಾಲದ ರಾಜಕೀಯ ತಂತ್ರಗಾರಿಕೆ ಆಗಿಬಿಟ್ಟಿದೆ. ಬಿಜೆಪಿ ಹಿಂದಿನಿಂದಲೂ ಅದನ್ನು ಮಾಡುತ್ತಲೇ ಬಂದಿದೆ ಎಂಬುದು ಆ ಪಕ್ಷದ ಮೇಲೆ ಇರುವ ಬಹುದೊಡ್ಡ ಆರೋಪ. ಈ ಬಾರಿ ಅದೇ ತಂತ್ರವನ್ನು ಎಂವಿಎ ಬಿಜೆಪಿಯತ್ತಲೇ ತಿರುಗಿಸಿಬಿಟ್ಟಿದೆ. ಮಹಾರಾಷ್ಟ್ರದ ಆಡಳಿತಾರೂಢ ಮೈತ್ರಿಕೂಟ ಮಹಾಯುತಿಯಲ್ಲಿ ಬಿರುಕುಗಳೂ ಕಾಣಿಸಿಕೊಂಡಿವೆ. ಶಿವಸೇನಾದ ಮುಖಂಡ ಮತ್ತು ಸಚಿವ ತಾನಾಜಿ ಸಾವಂತ್‌ ಅವರ ಹೇಳಿಕೆಯೊಂದು ಎನ್‌ಸಿಪಿ ಮುಖಂಡರು ಕೆರಳುವಂತೆ ಮಾಡಿದೆ. ‘ಕಾಂಗ್ರೆಸ್‌ ಮತ್ತು ಎನ್‌ಸಿಪಿ ಜೊತೆ ನನಗೆ ಜೀವನ ಪರ್ಯಂತ ಹೊಂದಿಕೊಳ್ಳಲಾಗದು. ಸಚಿವ ಸಂಪುಟ ಸಭೆಯಲ್ಲಿ ಅವರ ಸಮೀಪ ಕೂರುತ್ತೇನೆ. ಆದರೆ ಹೊರಗೆ ಹೋದ ಮೇಲೆ ನನಗೆ ವಾಂತಿ ಬರುತ್ತದೆ’ ಎಂದು ಅವರು ಹೇಳಿದ್ದಾರೆ. ಹೀಗೆ, ಮಹಾಯುತಿಗೆ ಏಟಿನ ಮೇಲೆ ಏಟು ಬೀಳುತ್ತಲೇ ಇದೆ. ಹಾಗಾಗಿ, ಈ ಬಾರಿಯ ವಿಧಾನಸಭೆ ಚುನಾವಣೆಯಲ್ಲಿ ಅಭಿವೃದ್ಧಿ, ಜನಪರ ವಿಚಾರಗಳು ಮುನ್ನೆಲೆಗೆ ಬರುವ ಸಾಧ್ಯತೆ ಇಲ್ಲ. ಬದಲಿಗೆ ಎರಡೂ ಮೈತ್ರಿಕೂಟಗಳು ಭಾವನಾತ್ಮಕತೆಯನ್ನು ಕೆದಕಿ ಚುನಾವಣೆ ಎದುರಿಸಲಿವೆ ಎಂಬುದರ ಸ್ಪಷ್ಟ ಕುರುಹುಗಳು ಈಗಲೇ ನಮ್ಮ ಮುಂದೆ ಇವೆ.