ಸಂಪಾದಕೀಯ | ಆರೋಗ್ಯ ಸಂಸ್ಥೆಗೆ ದೇಣಿಗೆ ಸ್ಥಗಿತದ ನಿರ್ಧಾರ ಅನುಚಿತ

ವಿಶ್ವ ಆರೋಗ್ಯ ಸಂಸ್ಥೆಗೆ (ಡಬ್ಲ್ಯುಎಚ್‌ಒ) ಅತಿಹೆಚ್ಚಿನ ವಂತಿಗೆಯನ್ನು ನೀಡುವ ದೇಶ ಅಮೆರಿಕ. ಈಗ ವಿಶ್ವದೆಲ್ಲೆಡೆ ಸಾಂಕ್ರಾಮಿಕವಾಗಿ ಹರಡಿರುವ ಕೋವಿಡ್–19 ಕಾಯಿಲೆಗೆ ಅತಿಹೆಚ್ಚಿನ ಜನ ತುತ್ತಾಗಿರುವುದು ಅಮೆರಿಕದಲ್ಲಿ. ಆ ದೇಶದಲ್ಲಿ ಈ ಕಾಯಿಲೆಯಿಂದ ಮೃತಪಟ್ಟವರ ಸಂಖ್ಯೆ 30 ಸಾವಿರ ದಾಟಿದೆ. ಸೋಂಕಿತರ ಸಂಖ್ಯೆ ಆರೂವರೆ ಲಕ್ಷ ಸಮೀಪಿಸಿದೆ. ಇಂತಹ ಭೀಕರ ಬಿಕ್ಕಟ್ಟಿನ ಸಂದರ್ಭದಲ್ಲಿ, ಅಮೆರಿಕದ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್ ಅವರು ಆರೋಗ್ಯ ಸಂಸ್ಥೆಗೆ ತಮ್ಮ ದೇಶದಿಂದ ನೀಡಲಾಗುತ್ತಿದ್ದ ಆರ್ಥಿಕ ನೆರವನ್ನು ಸ್ಥಗಿತಗೊಳಿಸುವುದಾಗಿ ಹೇಳಿದ್ದಾರೆ. ‘ವಿಶ್ವ ಆರೋಗ್ಯ ಸಂಸ್ಥೆಯು ತನ್ನ ಮೂಲಭೂತ ಕರ್ತವ್ಯ ನಿಭಾಯಿಸುವಲ್ಲಿ ಸೋತಿದೆ. ಹಾಗಾಗಿ, ಸಂಸ್ಥೆಯನ್ನು ಉತ್ತರದಾಯಿ ಆಗಿಸಬೇಕು. ಸಂಸ್ಥೆಯು ಕೊರೊನಾ ವೈರಾಣು ಸೋಂಕಿನ ವಿಚಾರದಲ್ಲಿ ಚೀನಾದ ತಪ್ಪು ಮಾಹಿತಿಗಳನ್ನು ಹರಡುವಲ್ಲಿ ನೆರವು ನೀಡಿತು. ಇದರ ಪರಿಣಾಮವಾಗಿಯೇ ಈ ವೈರಾಣು ಇಷ್ಟೊಂದು ವ್ಯಾಪಕವಾಗಿ ಹರಡಿರುವ ಸಾಧ್ಯತೆ ಇದೆ. ಚೀನಾ ನೀಡಿದ ತಪ್ಪು ಮಾಹಿತಿ ಹರಡಲು ಸಂಸ್ಥೆ ನೆರವಾಗದೇ ಇದ್ದಿದ್ದರೆ ಸೋಂಕು ಇಷ್ಟು ವ್ಯಾ‍ಪಕವಾಗುವ ಸಾಧ್ಯತೆ ಇರಲಿಲ್ಲ’ ಎಂದು ಟ್ರಂಪ್ ಹೇಳಿದ್ದಾರೆ. 2019ರಲ್ಲಿ ಡಬ್ಲ್ಯುಎಚ್‌ಒಗೆ ಅಮೆರಿಕವು ಒಟ್ಟು 40 ಕೋಟಿ ಡಾಲರ್ (ಸರಿಸುಮಾರು ₹3 ಸಾವಿರ ಕೋಟಿ) ಹಣಕಾಸಿನ ನೆರವು ನೀಡಿತ್ತು. ಸಂಸ್ಥೆಯ ಒಟ್ಟು ಆಯವ್ಯಯದ ಶೇಕಡ 15ರಷ್ಟನ್ನು ಅಮೆರಿಕವೇ ನೀಡುತ್ತಿದೆ. ಅದಕ್ಕಿಂತಲೂ ಹೆಚ್ಚಾಗಿ, ಎರಡನೆಯ ಮಹಾಯುದ್ಧದ ನಂತರದ ಕಾಲಘಟ್ಟದಲ್ಲಿ ವಿಶ್ವಸಂಸ್ಥೆ, ವಿಶ್ವ ಆರೋಗ್ಯ ಸಂಸ್ಥೆ ಸೇರಿದಂತೆ ಹತ್ತು ಹಲವು ಸಂಸ್ಥೆಗಳನ್ನು ಕಟ್ಟಿ, ಆ ಸಂಸ್ಥೆಗಳ ಮೂಲಕ ವಿಶ್ವದ ಎಲ್ಲೆಡೆ ತನ್ನ ಪ್ರಭಾವವನ್ನು ವಿಸ್ತರಿಸಿಕೊಂಡಿದ್ದು ಅಮೆರಿಕ ದೇಶ. ಹಣದ ಶಕ್ತಿಯ ಜೊತೆಯಲ್ಲೇ, ಇಂತಹ ಸಂಸ್ಥೆಗಳ ಮೂಲಕ ದಕ್ಕಿದ ಪ್ರಭಾವವನ್ನೂ ಬಳಸಿಕೊಂಡು ಅಮೆರಿಕ ಜಗತ್ತಿನಲ್ಲಿ ಅತ್ಯಂತ ಪ್ರಬಲ ದೇಶವಾಗಿ ಮೆರೆದಿದೆ. ಈ ಸಂಸ್ಥೆಗಳು ವಿಶ್ವದಲ್ಲಿ ಬಹಳಷ್ಟು ಒಳ್ಳೆಯ ಕೆಲಸಗಳನ್ನು ಕೂಡ ಮಾಡಿವೆ ಎಂಬುದರಲ್ಲಿಯೂ ಎರಡು ಮಾತಿಲ್ಲ.