ಪುಸ್ತಕೋದ್ಯಮಕ್ಕೆ ತೆರಿಗೆ ಕುರಿತು ಬರೆದಿರುವ ಎಚ್.ಎಸ್.ಮಂಜುನಾಥ ಅವರು (ವಾ.ವಾ., ಸೆ. 6) ಲೇಖಕರ ಗೌರವಧನದ ಮೇಲಿನ ಶೇ 12ರಷ್ಟು ಜಿಎಸ್‌ಟಿಯನ್ನು ಪ್ರಕಾಶಕರೇ ಭರಿಸುತ್ತಾರೆ ಎಂದಿದ್ದಾರೆ. ಇದು ಸತ್ಯವಲ್ಲ. ಎಲ್ಲ ಪ್ರಕಾಶಕರೂ ಪೂರ್ತಿಯಾಗಿ ಭರಿಸುತ್ತಿಲ್ಲ, ಕೆಲವರಿರಬಹುದು. ನನ್ನ ಬಗ್ಗೆಯೇ ಹೇಳುವುದಾರೆ, ನನ್ನ ಪುಸ್ತಕಗಳನ್ನು ಪ್ರಕಟಿಸಿರುವ ಪ್ರಕಾಶನ ಸಂಸ್ಥೆಯೊಂದು ಶೇ 6ರಷ್ಟು ಜಿಎಸ್‌ಟಿ ಕಡಿತ ಮಾಡಿ ಗೌರವಧನ ಪಾವತಿಸಿದೆ. ಶೇ 6ರಷ್ಟನ್ನು ಮಾತ್ರ ಅದು ಭರಿಸಿದೆ. ಇದು ಪ್ರಕಾಶನದ ವಿರುದ್ಧ ದೂರಲ್ಲ. ಲೇಖಕ– ಪ್ರಕಾಶಕರಿಬ್ಬರೂ ಜಿಎಸ್‌ಟಿ ಹೊರೆಯನ್ನು ಸಮಸಮ ಭರಿಸಬೇಕೆಂಬ ಅವರ ಮಾತೂ ನ್ಯಾಯವಾದುದೇ. ಆದರೆ, ಯಾವುದೇ ಸಾಮಾಜಿಕ ಭದ್ರತೆ ಇಲ್ಲದ, ಜೀವನೋಪಾಯಕ್ಕೆ ಬರವಣಿಗೆಯನ್ನೇ ನೆಚ್ಚಿಕೊಂಡಿರುವ ನನ್ನಂಥ ಲೇಖಕರು ಮತ್ತು ಪತ್ರಕರ್ತರಿಗೆ ಶೇ 6ರಷ್ಟು ಜಿಎಸ್‌ಟಿಯೂ ಹೊರೆಯೇ.
