ಮಿಥಾಲಿ ಮಗದೊಂದು ಮೈಲುಗಲ್ಲು; ಏಕದಿನದಲ್ಲಿ 7,000 ರನ್ ಗಳಿಸಿದ ಮೊದಲ ಆಟಗಾರ್ತಿ

ಕಳೆದ ಪಂದ್ಯದಲ್ಲಷ್ಟೇ ಮಿಥಾಲಿ ರಾಜ್, ಅಂತರ ರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 10,000 ರನ್ ಪೂರೈಸಿದ ವಿಶ್ವದ ಎರಡನೇ ಹಾಗೂ ಭಾರತದ ಮೊದಲ ಆಟಗಾರ್ತಿ ಎಂಬ ಕೀರ್ತಿಗೆ ಭಾಜನವಾಗಿದ್ದರು.

213ನೇ ಏಕದಿನ ಪಂದ್ಯದಲ್ಲಿ ಮಿಥಾಲಿ ರಾಜ್ ಈ ಮೈಲುಗಲ್ಲು ತಲುಪಿದ್ದಾರೆ. 50.49ರ ಸರಾಸರಿಯಲ್ಲಿ 7,000 ರನ್ ಪೂರೈಸಿರುವ ಮಿಥಾಲಿ ವೃತ್ತಿ ಜೀವನದಲ್ಲಿ ಏಳು ಶತಕ ಹಾಗೂ 54 ಅರ್ಧಶತಕಗಳು ಸೇರಿವೆ.

1999ರಲ್ಲಿ ಕ್ರಿಕೆಟ್ ಜೀವನಕ್ಕೆ ಕಾಲಿರಿಸಿರುವ 38 ವರ್ಷದ ಮಿಥಾಲಿ ಭಾರತೀಯ ಮಹಿಳಾ ಕ್ರಿಕೆಟ್‌ನ 'ಸಚಿನ್ ತೆಂಡೂಲ್ಕರ್' ಎಂಬ ಬಿರುದಿಗೆ ಪಾತ್ರವಾಗಿದ್ದಾರೆ.

ಇದನ್ನೂ ಓದಿ:ಅಂತರರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 10,000 ರನ್ ಪೂರೈಸಿದ ಮಿಥಾಲಿ ರಾಜ್

ಲಕ್ನೋದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ನಡೆಯುತ್ತಿರುವ ಮೂರನೇ ಏಕದಿನ ಪಂದ್ಯದ್ಲಲೂ ಉತ್ತಮ ಬ್ಯಾಟಿಂಗ್ ಪ್ರದರ್ಶಿಸಿದ ಮಿಥಾಲಿ 71 ಎಸೆತಗಳಲ್ಲಿ ನಾಲ್ಕು ಬೌಂಡರಿಗಳ ನೆರವಿನಿಂದ 45 ರನ್ ಗಳಿಸಿದರು.

ಅತ್ತ ಪೂನಂ ರಾವುತ್ ಅಜೇಯ ಶತಕದ ಬೆಂಬಲದೊಂದಿಗೆ ಭಾರತ ಮಹಿಳಾ ತಂಡವು ನಾಲ್ಕು ವಿಕೆಟ್ ನಷ್ಟಕ್ಕೆ 266 ರನ್‌ಗಳ ಸ್ಪರ್ಧಾತ್ಮಕ ಮೊತ್ತ ಪೇರಿಸಿತ್ತು. ಕೊನೆಯಲ್ಲಿ ಹರ್ಮನ್‌ಪ್ರೀತ್ ಕೌರ್ 35 ಎಸೆತಗಳಲ್ಲಿ ಬಿರುಸಿನ 54 ರನ್ ಗಳಿಸಿದರು.

ಮಹಿಳಾ ಏಕದಿನ ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರ್ತಿಯರ ಪಟ್ಟಿ:
ಮಿಥಾಲಿ ರಾಜ್ (ಭಾರತ): 7,019
ಸಿಎಂ ಎಡ್ವರ್ಡ್ಸ್ (ಇಂಗ್ಲೆಂಡ್): 5,992
ಬಿಜೆ ಕ್ಲಾರ್ಕ್ (ಆಸ್ಟ್ರೇಲಿಯಾ): 4,844
ಕೆಎಲ್ ರಾಲ್ಟನ್ (ಆಸ್ಟ್ರೇಲಿಯಾ): 4,814
ಎಸ್‌ಆರ್ ಟೇಲರ್ (ವೆಸ್ಟ್‌ಇಂಡೀಸ್): 4,754