ಕೊರೊನಾ ವಿರುದ್ಧ ಹೋರಾಟ ‘ಟೆಸ್ಟ್‌’ ಇದ್ದಂತೆ: ಸಚಿನ್ ತೆಂಡೂಲ್ಕರ್

‘ಇಡೀ ವಿಶ್ವವೇ ಕೊರೊನಾ ವೈರಸ್ ವಿರುದ್ಧ ಹೋರಾಡುತ್ತಿದೆ. ಟೆಸ್ಟ್‌ ಪಂದ್ಯದಲ್ಲಿ ರಕ್ಷಣಾತ್ಮಕವಾಗಿ ಆಡುತ್ತ, ತಂಡವು ಒಗ್ಗೂಡಿ ಹೋರಾಡುವ ಮಾದರಿಯಲ್ಲಿ ಈ ಕಾರ್ಯ ನಡೆಯಬೇಕಿದೆ. ಕ್ರಿಕೆಟ್‌ನ ಅತ್ಯಂತ ಹಳೆಯ ಮಾದರಿಯಾದ ಟೆಸ್ಟ್ ಕ್ರಿಕೆಟ್‌ನ ಪಾಠಗಳು ನಮಗೆ ನೆರವಾಗಲಿವೆ’ ಎಂದು ಸಚಿನ್ ಆಂಗ್ಲಪತ್ರಿಕೆಯೊಂದಕ್ಕೆ ನೀಡಿರುವ ಸಂದರ್ಶನದಲ್ಲಿ ತಿಳಿಸಿದ್ದಾರೆ.

‘ಪಿಚ್ ಮರ್ಮ ತಿಳಿಯದೇ ಹೋದಾಗ, ಎದುರಾಳಿಯ ದಾಳಿಯು ಪ್ರಭಾವಶಾಲಿಯಾಗಿರುವಾಗ ರಕ್ಷಣಾತ್ಮಕ ಶೈಲಿಯೇ ಶ್ರೇಷ್ಠ ಆಕ್ರಮಣಕಾರಿ ಶೈಲಿಯೂ ಆಗುತ್ತದೆ. ಆದ್ದರಿಂದ ತಾಳ್ಮೆ, ಎಚ್ಚರಿಕೆಯಿಂದ ಪರಿಸ್ಥಿತಿಯನ್ನು ಎದುರಿಸಬೇಕು’ ಎಂದು ಸಲಹೆ ನೀಡಿದ್ದಾರೆ.