ಟೆಸ್ಟ್ ಕ್ರಿಕೆಟ್: 500ವಿಕೆಟ್ ಸಾಧನೆ ಮಾಡಿದ ಇಂಗ್ಲೆಂಡ್ ವೇಗಿ ಸ್ಟುವರ್ಟ್ ಬ್ರಾಡ್
ಮ್ಯಾಂಚೆಸ್ಟರ್‌: ವೆಸ್ಟ್‌ ಇಂಡೀಸ್‌ ವಿರುದ್ಧ ಮುಕ್ತಾಯವಾದ ಮೂರು ಪಂದ್ಯಗಳ ಸರಣಿಯಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ ಇಂಗ್ಲೆಂಡ್ ತಂಡದ ಅನುಭವಿ ವೇಗದ ಬೌಲರ್‌ ಸ್ಟುವರ್ಟ್ ಬ್ರಾಡ್ ಟೆಸ್ಟ್ ಕ್ರಿಕೆಟ್‌ನಲ್ಲಿ 500 ವಿಕೆಟ್ ಸಾಧನೆ ಮಾಡಿದರು. ಆ ಮೂಲಕ ಈ ಸಾಧನೆ ಮಾಡಿದ ವಿಶ್ವದ ಏಳನೇ ಬೌಲರ್‌ ಎನಿಸಿದರು.
ಸರಣಿಯ ಮೊದಲ ಪಂದ್ಯದಲ್ಲಿ ಇಂಗ್ಲೆಂಡ್ ತಂಡವನ್ನು ಆಲ್ರೌಂಡರ್‌ ಬೆನ್‌ ಸ್ಟೋಕ್ಸ್‌ ಮುನ್ನಡೆಸಿದ್ದರು. ಈ ಪಂದ್ಯದಿಂದ ಬ್ರಾಡ್ ಅವರನ್ನು ಆಡುವ ಹನ್ನೊಂದರ ಬಳಗದಿಂದ ಹೊರಗಿಡಲಾಗಿತ್ತು. ಪಂದ್ಯವನ್ನು ಪ್ರವಾಸಿ ಪಡೆ 4 ವಿಕೆಟ್ ಅಂತರದಲ್ಲಿ ಗೆದ್ದುಕೊಂಡಿದ್ದರಿಂದ ನಾಯಕನ ನಿರ್ಧಾರಕ್ಕೆ ಟೀಕೆ ವ್ಯಕ್ತವಾಗಿತ್ತು. ಅದಾದನಂತರ ಉಳಿದ ಪಂದ್ಯಗಳಲ್ಲಿ ಸ್ಥಾನ ಗಳಿಸಿದ ಬ್ರಾಡ್, ಸಾಮರ್ಥ್ಯ ಸಾಬೀತು ಮಾಡಿದರು. ಬೌಲಿಂಗ್‌ ಜೊತೆಗೆ ಬ್ಯಾಟಿಂಗ್ನಲ್ಲೂ ಮಿಂಚಿದ ಅವರು ಸರಣಿ ಶ್ರೇಷ್ಠ ಎನಿಸಿದರು.
ಕೊರೊನಾ ಕಾಲದ ಮೊಟ್ಟಮೊದಲ ಟೆಸ್ಟ್ ಸರಣಿಯನ್ನುಇಂಗ್ಲೆಂಡ್ 2–1 ಅಂತರದಿಂದ ಗೆದ್ದು ಬೀಗಿತು.
ಇದನ್ನೂ ಓದಿ:ಇಂಗ್ಲೆಂಡ್‌ಗೆ ಕೊರೊನಾ ಕಾಲದ ಮೊದಲ ’ಕಿರೀಟ’
2007ರಲ್ಲಿ ಟೆಸ್ಟ್ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದ ಬ್ರಾಡ್ ಖಾತೆಯಲ್ಲಿಈ ಸರಣಿಗೂ ಮುನ್ನ485 ವಿಕೆಟ್‌ಗಳಿದ್ದವು. ಎರಡನೇ ಪಂದ್ಯದಲ್ಲಿ ಒಟ್ಟು ಆರು ವಿಕೆಟ್ ಪಡೆದ ಬ್ರಾಡ್, ಮೂರನೇ ಪಂದ್ಯದ ಮೊದಲ ಇನಿಂಗ್ಸ್‌ನಲ್ಲಿ 6 ಹಾಗೂ ಎರಡನೇ ಇನಿಂಗ್ಸ್‌ನಲ್ಲಿ 4 ವಿಕೆಟ್ ಉರುಳಿಸಿದರು. ಮಾತ್ರವಲ್ಲದೆ, ಮೊದಲ ಇನಿಂಗ್ಸ್‌ನಲ್ಲಿ 62 ರನ್‌ ಗಳಿಸಿ ಬ್ಯಾಟಿಂಗ್ನಲ್ಲೂ ಮಿಂಚಿದರು. ಇದರೊಂದಿಗೆ ತಮ್ಮ 140ನೇ ಟೆಸ್ಟ್ ಪಂದ್ಯದ 258ನೇ ಇನಿಂಗ್ಸ್‌ನಲ್ಲಿ 501 ವಿಕೆಟ್ ಪಡೆದ ಸಾಧನೆ ಮಾಡಿದರು.
ಟೆಸ್ಟ್ ಕ್ರಿಕೆಟ್‌ನಲ್ಲಿ 500ಕ್ಕಿಂತ ಹೆಚ್ಚು ವಿಕೆಟ್ ಪಡೆದ ಬೌಲರ್‌ಗಳು
| ಬೌಲರ್‌ | ದೇಶ | ಪಂದ್ಯ | ವಿಕೆಟ್ |
| ಮುತ್ತಯ್ಯ ಮುರುಳಿಧರನ್ | ಶ್ರೀಲಂಕಾ | 133 | 800 |
| ಶೇನ್‌ ವಾರ್ನ್‌ | ಆಸ್ಟ್ರೇಲಿಯಾ | 145 | 708 |
| ಅನಿಲ್‌ ಕುಂಬ್ಳೆ | ಭಾರತ | 132 | 619 |
| ಜೇಮ್ಸ್‌ ಆ್ಯಂಡರ್ಸನ್‌ | ಇಂಗ್ಲೆಂಡ್ | 153 | 589 |
| ಗ್ಲೇನ್‌ಮೆಕ್‌ಗ್ರಾತ್‌ | ಆಸ್ಟ್ರೇಲಿಯಾ | 124 | 563 |
| ಕರ್ಟ್ನಿ ವಾಲ್ಷ್ | ವೆಸ್ಟ್‌ ಇಂಡೀಸ್‌ | 132 | 519 |
| ಸ್ಟುವರ್ಟ್ ಬ್ರಾಡ್* | ಇಂಗ್ಲೆಂಡ್ | 140 | 500 |
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.