ಮಂಗಳವಾರ, ಫೆಬ್ರವರಿ 18, 2020
31 °C

ಯುವ ವಿಶ್ವಕಪ್ | ಹಲವು ದಾಖಲೆಗಳ ಮೇಲೆ ಯಶಸ್ವಿ, ಬಿಷ್ಣೋಯಿ ಕಣ್ಣು

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಪೊಷೆಫ್‌ಸ್ಟ್ರೂಮ್‌: ಭಾರತದ 19 ವರ್ಷದೊಳಗಿನವರ ತಂಡದ ಆರಂಭಿಕ ಬ್ಯಾಟ್ಸ್‌ಮನ್ ಯಶಸ್ವಿ ಜೈಸ್ವಾಲ್‌ ಹಾಗೂ ಸ್ಪಿನ್ನರ್‌ ರವಿ ಬಿಷ್ಣೋಯಿ, ಫೈನಲ್‌ ಪಂದ್ಯದಲ್ಲಿ ಹಲವು ದಾಖಲೆಗಳನ್ನು ಬರೆಯಲು ಸಜ್ಜಾಗಿದ್ದಾರೆ.

ಸದ್ಯ ದಕ್ಷಿಣ ಆಫ್ರಿಕಾದಲ್ಲಿ ನಡೆಯುತ್ತಿರುವ ವಿಶ್ವಕಪ್‌ ಟೂರ್ನಿಯಲ್ಲಿ ಹೆಚ್ಚು (312) ರನ್‌ ಗಳಿಸಿರುವ ಜೈಸ್ವಾಲ್‌, ಫೈನಲ್‌ ಪಂದ್ಯದಲ್ಲಿ ಇನ್ನು 38 ರನ್‌ ಗಳಿಸಿದರೆ ಯುವ ವಿಶ್ವಕಪ್‌ನ ಒಂದೇ ಟೂರ್ನಿಯಲ್ಲಿ ಭಾರತ ಪರ ಹೆಚ್ಚು ರನ್‌ ಗಳಿಸಿದ ಎರಡನೇ ಆಟಗಾರ ಎನಿಸಿಕೊಳ್ಳಲಿದ್ದಾರೆ.

ಸದ್ಯ ಭಾರತ ಪರ ಒಂದೇ ಟೂರ್ನಿಯಲ್ಲಿ ಹೆಚ್ಚು ರನ್‌ ಗಳಿಸಿರುವುದು ಆಟಗಾರ ಶಿಖರ್ ಧವನ್‌. ಅವರು 2004ರಲ್ಲಿ 505 ರನ್‌ ಗಳಿಸಿದ್ದರು. 2006ರಲ್ಲಿ 349 ರನ್‌ ಗಳಿಸಿರುವ ಚೇತೇಶ್ವರ ಪೂಜಾರ ಸದ್ಯ ಎರಡನೇ ಸ್ಥಾನದಲ್ಲಿದ್ದಾರೆ.

ಅತಿ ಹೆಚ್ಚು ಸಿಕ್ಸರ್‌ ದಾಖಲೆ
ಸದ್ಯ ಐದು ಪಂದ್ಯಗಳಿಂದ 9 ಸಿಕ್ಸರ್ ಸಿಡಿಸಿರುವ ಜೈಸ್ವಾಲ್‌, 19 ವರ್ಷದೊಳಗಿನವರ ವಿಶ್ವಕಪ್‌ನಲ್ಲಿ ಹೆಚ್ಚು ಸಿಕ್ಸರ್‌ ಬಾರಿಸಿದ ಆಟಗಾರ ಎನಿಸಿಕೊಳ್ಳಲು 7 ಸಿಕ್ಸರ್‌ ಬೇಕಿದೆ. 2016 ಟೂರ್ನಿಯಲ್ಲಿ 15 ಸಿಕ್ಸರ್‌ ಸಿಡಿಸಿದ್ದ ಇಂಗ್ಲೆಂಡ್‌ನ ಜಾಕ್‌ ಬರ್ನ್‌ಹ್ಯಾಮ್‌ ಮೊದಲ ಸ್ಥಾನದಲ್ಲಿದ್ದಾರೆ. 2014ರಲ್ಲಿ 12 ಸಿಕ್ಸರ್‌ ಸಿಡಿಸಿರುವ ಭಾರತದ ಸಂಜು ಸ್ಯಾಮ್ಸನ್‌ ಭಾರತ ಪರ ಮೊದಲ ಸ್ಥಾನದಲ್ಲಿದ್ದಾರೆ.

ಜಿಂಬಾಬ್ವೆಯ ತಡಿವಾನಶೆ ಮರುಮಾನಿ ಅವರೂ ಈ ಬಾರಿ 9 ಸಿಕ್ಸರ್‌ ಸಿಡಿಸಿದ್ದಾರೆ.

ಅರ್ಧಶತಕದ ದಾಖಲೆ
ಈ ಬಾರಿ ನಾಲ್ಕು ಸಲ 50ಕ್ಕಿಂತ ಹೆಚ್ಚು ರನ್‌ ಗಳಿಸಿರುವ ಜೈಸ್ವಾಲ್‌, ಇನ್ನೊಂದು ಅರ್ಧಶತಕ ಗಳಿಸಿದರೆ ಹೆಚ್ಚು ಬಾರಿ 50ಕ್ಕಿಂತ ಅಧಿಕ ರನ್‌ ಗಳಿಸಿದ ಪಟ್ಟಿ ಸೇರಿಕೊಳ್ಳಲಿದ್ದಾರೆ. 1988ರಲ್ಲಿ ಆಸ್ಟ್ರೇಲಿಯಾದ ಬ್ರೆಟ್‌ ವಿಲಿಯಮ್ಸ್‌ ಮತ್ತು 2016ರಲ್ಲಿ ಭಾರತದ ಸರ್ಫರಾಜ್‌ ಖಾನ್‌ ತಲಾ ಐದು ಬಾರಿ 50ಕ್ಕಿಂತ ಹೆಚ್ಚು ರನ್‌ ಗಳಿಸಿದ್ದಾರೆ.

ಈ ಬಾರಿ ಜೈಸ್ವಾಲ್‌ ಶ್ರೀಲಂಕಾ ವಿರುದ್ಧ 59, ಜಪಾನ್‌ ವಿರುದ್ಧ ಅಜೇಯ 29, ನ್ಯೂಜಿಲೆಂಡ್‌ ವಿರುದ್ಧ ಅಜೇಯ 57, ಆಸ್ಟ್ರೇಲಿಯಾ ವಿರುದ್ಧ 62 ಮತ್ತು ಪಾಕಿಸ್ತಾನ ವಿರುದ್ಧ ಅಜೇಯ 105 ರನ್‌ ಗಳಿಸಿದ್ದಾರೆ.

ಈ ಬಾರಿ ಹೆಚ್ಚು ವಿಕೆಟ್‌
ಸದ್ಯ ಆಡಿರುವ ಐದು ಪಂದ್ಯಗಳಿಂದ 13 ವಿಕೆಟ್‌ ಉರುಳಿಸಿರುವ ಮಣಿಕಟ್ಟಿನ ಸ್ಪಿನ್ನರ್‌ ರವಿ ಬಿಷ್ಣೋಯಿ ಹೆಚ್ಚು ವಿಕೆಟ್‌ ಪಡೆದವರ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿದ್ದಾರೆ.

ಅಫ್ಗಾನಿಸ್ಥಾನ ತಂಡದ ಶಫಿವುಲ್ಲಾ ಗಫಾರಿ ಹಾಗೂ ಕೆನಡಾದ ಅಖಿಲ್‌ ಕುಮಾರ್‌ ತಲಾ 16 ವಿಕೆಟ್‌ ಗಳಿಸಿ ಮೊದಲ ಸ್ಥಾನದಲ್ಲಿದ್ದಾರೆ. ಹೀಗಾಗಿ ಮೊದಲ ಸ್ಥಾನಕ್ಕೇರಲು ಬಿಷ್ಣೋಯಿಗೆ ಮೂರು ವಿಕೆಟ್ ಬೇಕಿದೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು