ಜಪಾನ್‌ನಲ್ಲಿ ಜೆ–ಲೀಗ್ ಫುಟ್ಬಾಲ್ ಟೂರ್ನಿ ಪುನರಾರಂಭ
ಅಕ್ಷರ ಗಾತ್ರ :ಆ |ಆ |ಆ
ಜಪಾನ್: ನಾಲ್ಕು ತಿಂಗಳ ನಂತರ ಜಪಾನ್‌ನ ಪ್ರಮುಖ ಫುಟ್ಬಾಲ್ ಟೂರ್ನಿ ಜೆ–ಲೀಗ್ ಶನಿವಾರ ಪುನರಾರಂಭಗೊಂಡಿತು. ಆದರೆ ಪ್ರೇಕ್ಷಕರ ಗ್ಯಾಲರಿಗಳು ಖಾಲಿಯಾಗಿದ್ದವು.
ವೈರಸ್ ನಿಯಂತ್ರಣಕ್ಕಾಗಿ ಹೇರಲಾಗಿದ್ದ ನಿರ್ಬಂಧಗಳು ಜಪಾನ್‌ನಲ್ಲಿ ಸಡಿಲಿಕೆಯಾಗುತ್ತಿವೆ. ಅರ್ಧಕ್ಕೇ ನಿಂತಿದ್ದ ‘ಪ್ರೊಫೆಷನಲ್ ಬೇಸ್‌ಬಾಲ್‌’ ಟೂರ್ನಿ ಜೂನ್ 19ರಂದು ಆರಂಭಗೊಂಡಿತ್ತು. ಇದೀಗ ಫುಟ್ಬಾಲ್ ಕ್ರೀಡೆಯೂ ಮರುಚಾಲನೆ ಪಡೆಯಿತು.
ಜೆ–ಲೀಗ್ ಪಂದ್ಯಗಳ ಆರಂಭಕ್ಕೂ ಮೊದಲು ಆಟಗಾರರು ಮತ್ತು ಕೋಚ್‌ಗಳನ್ನು ಪರೀಕ್ಷೆಗೆ ಒಳಪಡಿಸಲಾಗಿತ್ತು. ಕೋವಿಡ್ –19 ಸೋಂಕು ಇಲ್ಲ ಎಂದು ದೃಢಪಟ್ಟ ನಂತರ ಅಂಗಣಕ್ಕೆ ಇಳಿಯಲು ಅವಕಾಶ ನೀಡಲಾಯಿತು. ಶನಿವಾರ ಒಂಬತ್ತು ಪಂದ್ಯಗಳು ನಡೆದವು.
‘ಪರಿಸ್ಥಿತಿ ಸುಧಾರಣೆಗೊಂಡು ಕ್ರೀಡಾ ಕ್ಷೇತ್ರ ಚುರುಕು ಪಡೆದುಕೊಳ್ಳಲಿದೆ. ಆಗ ಹೆಚ್ಚು ಪ್ರೇಕ್ಷಕರಿಗೆ ಅವಕಾಶ ಸಿಗುವ ಸಾಧ್ಯತೆ ಇದೆ’ ಎಂದು ವಿಸೆಲ್ ಕೋಬೆ ತಂಡದಲ್ಲಿ ಆಡುತ್ತಿರುವ ಬಾರ್ಸಿಲೋನಾದ ಆ್ಯಂಡ್ರೆಸ್ ಇನೆಸ್ತಾ ತಿಳಿಸಿರುವುದಾಗಿ ಸ್ಥಳೀಯ ಪತ್ರಿಕೆ ಸಾಂಕಿ ಶಿಂಬುಮ್ ವರದಿ ಮಾಡಿದೆ.
ಫೆಬ್ರುವರಿಯಲ್ಲಿ ಲೀಗ್ ಆರಂಭಗೊಂಡಿತ್ತು. ಆದರೆ ಒಂದು ವಾರದ ನಂತರ ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಯಿತು. ಜುಲೈ 10ರಂದು ಪಂದ್ಯಗಳ ನೇರ ಪ್ರಸಾರ ಇರುತ್ತದೆ. ಅಂದಿನಿಂದ ಕ್ರೀಡಾಂಗಣದ ಸಾಮರ್ಥ್ಯದ ಶೇಕಡಾ 50ರಷ್ಟು ಮಂದಿಯನ್ನು ಅಥವಾ ಐದು ಸಾವಿರ ಜನರನ್ನು ಒಳಗೆ ಬಿಡಲಾಗುವುದು ಎಂದು ತಿಳಿಸಲಾಗಿದೆ.
ಕ್ರೀಡಾಂಗಣದೊಳಗೆ ಮುಖಗವಸು ಧರಿಸುವುದು ಮತ್ತು ಕೈಗಳನ್ನು ಆಗಾಗ ತೊಳೆಯುವುದು ಕಡ್ಡಾಯ. ಪಂದ್ಯದ ವೇಳೆ ಸಂಭ್ರಮದಿಂದ ಕೂಗಾಡುವುದನ್ನು ನಿರ್ಬಂಧಿಸಲಾಗಿದೆ.
ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.
ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.
ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.
