ನವದೆಹಲಿ: ಬೇಬಿರೋಜಿಸಾನ ಚಾನು ಮತ್ತು ಅರುಂಧತಿ ಚೌಧರಿ ಉರೋಪ್‌ನ ಮಾಂಟೆನಿಗ್ರೊದಲ್ಲಿ ನಡೆದ ಯೂತ್ ಮಹಿಳೆಯರ ಅಡ್ರಿಯಾಟಿಕ್ ಪರ್ಲ್‌ ಬಾಕ್ಸಿಂಗ್ ಟೂರ್ನಿಯಲ್ಲಿ ಸೋಮವಾರ ಚಿನ್ನದ ಪದಕ ಗಳಿಸಿದರು. ಇದರೊಂದಿಗೆ ಭಾರತ ಐದು ಚಿನ್ನದೊಂದಿಗೆ ಒಟ್ಟು 10 ಪದಕಗಳನ್ನು ಗಳಿಸಿ ಅಗ್ರಸ್ಥಾನ ತನ್ನದಾಗಿಸಿಕೊಂಡಿತು.
ಬೇಬಿರೋಜಿಸಾನ ಚಾನು 51 ಕೆಜಿ ವಿಭಾಗದಲ್ಲಿ ಮತ್ತು ಅರುಂಧತಿ 69 ಕೆಜಿ ವಿಭಾಗದಲ್ಲಿ ಮೊದಲಿಗರಾದರು. ಲಕ್ಕಿ ರಾಣ 64 ಕೆಜಿ ವಿಭಾಗದಲ್ಲಿ ಬೆಳ್ಳಿ ಪದಕಕ್ಕೆ ಕೊರಳೊಡ್ಡಿದರು. ಇದರೊಂದಿಗೆ ಐದು ಚಿನ್ನ, ಮೂರು ಬೆಳ್ಳಿ ಮತ್ತು ಎರಡು ಕಂಚಿನ ಪದಕಗಳು ಭಾರತದ ಪಾಲಾದವು. ಎರಡು ಚಿನ್ನ ಗೆದ್ದ ಉಜ್ಬೆಕಿಸ್ತಾನ ಮತ್ತು ಒಂದು ಚಿನ್ನ ಗಳಿಸಿದ ಜೆಕ್ ಗಣರಾಜ್ಯ ಕ್ರಮವಾಗಿ ಎರಡು ಮತ್ತು ಮೂರನೇ ಸ್ಥಾನ ಗಳಿಸಿದವು.
ಖೇಲೊ ಇಂಡಿಯಾ ಕ್ರೀಡಾಕೂಟದಲ್ಲಿ ಮೂರು ಬಾರಿ ಚಿನ್ನ ಗಳಿಸಿರುವ ಅರುಂಧತಿ ಭಾನುವಾರ ರಾತ್ರಿ ನಡೆದ ಬೌಟ್‌ನಲ್ಲಿ ಉಕ್ರೇನ್‌ನ ಮರಿಯಾನೊ ಸ್ಟೊಯ್ಕೊ ವಿರುದ್ಧ 5–0ಅಂತರದಿಂದ ಗೆದ್ದರು. ಎಂ.ಸಿ.ಮೇರಿ ಕೋಮ್ ಅವರ ಇಂಫಾಲದಲ್ಲಿರುವ ಅಕಾಡೆಮಿಯಲ್ಲಿ ತರಬೇತಿ ಪಡೆಯುತ್ತಿರುವ ಚಾನು ಏಷ್ಯನ್ ಜೂನಿಯರ್ ವಿಭಾಗದ ಚಾಂಪಿಯನ್ ಉಜ್ಬೆಕಿಸ್ತಾನದ ಸಬೀನಾ ಬಬುಕುಲೋವ ಅವರನ್ನು 3–2ರಲ್ಲಿ ಮಣಿಸಿದರು. ಫಿನ್ಲ್ಯಾಂಡ್‌ನ ಲಿಯಾ ಪುಕಿಲಾ ಎದುರು ಲಕ್ಕಿ ರಾಣಾ 0–5ರಲ್ಲಿ ಸೋಲನುಭವಿಸಿದರು.
ಟೂರ್ನಿಯ ಆರಂಭದಲ್ಲಿ ಭಾರತದ ಅಲ್ಫಿಯಾ (81+ ಕೆಜಿ), ವಿಂಕಾ (60 ಕೆಜಿ) ಮತ್ತು ಸನಮಾಚ ಚಾನು (75 ಕೆಜಿ) ಚಿನ್ನ ಗಳಿಸಿದ್ದರು. ವಿಂಕಾ ಅವರು ಟೂರ್ನಿಯ ಅತ್ಯುತ್ತಮ ಬಾಕ್ಸರ್ ಪ್ರಶಸ್ತಿ ತಮ್ಮದಾಗಿಸಿಕೊಂಡರು. ಪುರುಷರ ವಿಭಾಗದಲ್ಲಿ ಎರಡು ಪದಕಗಳು ಲಭಿಸಿದ್ದರು.
Lok Sabha Elections Results 2024 |ನರೇಂದ್ರ ಮೋದಿ ಅವರ 'ವಿಕಸಿತ ಭಾರತ' ಅಥವಾ ರಾಹುಲ್ ಗಾಂಧಿ ಅವರ ಇಂಡಿಯಾ ಐಕ್ಯ ಭಾರತ? ಜಗತ್ತಿನ ಅತಿದೊಡ್ಡ ಪ್ರಜಾಪ್ರಭುತ್ವದ 18ನೇ ಲೋಕಸಭೆಗೆ ನಡೆದ ಚುನಾವಣೆ ಫಲಿತಾಂಶದ ಕ್ಷಣ ಕ್ಷಣದ ಮಾಹಿತಿ, ವಿಶ್ವಾಸಾರ್ಹ ವಿಶ್ಲೇಷಣೆ, ಅಂಕಿ ಅಂಶಗಳಿಗಾಗಿ ಪ್ರಜಾವಾಣಿ ನೋಡಿ. ಇದರ ಜೊತಗೆ, ಆಂಧ್ರಪ್ರದೇಶ ಮತ್ತು ಒಡಿಶಾ ವಿಧಾನಸಭೆ ಚುನಾವಣೆಯ ಫಲಿತಾಂಶವೂ ಇಲ್ಲೇ ಲಭ್ಯ. ಪ್ರಜಾವಾಣಿಯನ್ನು ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಫಾಲೋ ಮಾಡಲು ಮರೆಯದಿರಿ.
