ಟೋಕಿಯೊ: ಕೋವಿಡ್–19ರ ಆತಂಕದಿಂದ ಅಮೆರಿಕದ ಪ್ರಯಾಣ ನಿರ್ಬಂಧಗಳ ಎಚ್ಚರಿಕೆಗೆ ಜಗ್ಗದ ಜಪಾನ್ ಸರ್ಕಾರ ಒಲಿಂಪಿಕ್ಸ್ ಕೂಟ ಯಾವುದೇ ಕಾರಣಕ್ಕೂ ರದ್ದಾಗುವುದಿಲ್ಲ ಎಂದು ಮಂಗಳವಾರ ಹೇಳಿದೆ. ಒಲಿಂಪಿಕ್ಸ್ ಆಯೋಜಕರೂ ಇದಕ್ಕೆ ದನಿಗೂಡಿಸಿದ್ದಾರೆ.
ಜಪಾನ್ ಪ್ರವಾಸ ಕೈಗೊಳ್ಳುವುದರಿಂದ ಆದಷ್ಟೂ ದೂರ ಇರುವಂತೆ ಅಮೆರಿಕ ತನ್ನ ಪ್ರಜೆಗಳಿಗೆ ಸೋಮವಾರ ಸೂಚಿಸಿತ್ತು. ಒಲಿಂಪಿಕ್ಸ್ ಕೂಟದ ಉದ್ಘಾಟನೆಗೆ ಕೆಲವೇ ವಾರಗಳು ಬಾಕಿ ಇರುವಾಗ ನೀಡಿರುವ ಈ ಎಚ್ಚರಿಕೆ ಕುತೂಹಲ ಕೆರಳಿಸಿತ್ತು.
‘ಪ್ರಯಾಣ ನಿರ್ಬಂಧ ಹೇರಿದ್ದರೂ ಒಲಿಂಪಿಕ್ಸ್ಗೆ ಅಮೆರಿಕದ ಬೆಂಬಲ ಮುಂದುವರಿಯಲಿದೆ. ಕ್ರೀಡಾಪಟುಗಳಿಗೆ ಈ ನಿರ್ಬಂಧ ಬಾಧಕವಾಗುವುದಿಲ್ಲ ಎಂಬ ವಿಸ್ವಾಸವಿದೆ’ ಎಂದು ಜಪಾನ್ ಸರ್ಕಾರದ ವಕ್ತಾರ ಕಸುನೊಬು ಕಾಟೊ ಹೇಳಿದ್ದಾರೆ.
ಈ ನಡುವೆ ಒಲಿಂಪಿಕ್ಸ್ ಸುರಕ್ಷಿತ ವಾತಾವರಣದಲ್ಲಿ ನಡೆಯುವ ವಿಶ್ವಾಸವಿದೆ ಎಂದು ಅಮೆರಿಕ ಒಲಿಂಪಿಕ್ ಮತ್ತು ಪ್ಯಾರಾಲಿಂಪಿಕ್ ಸಮಿತಿ ಹೇಳಿದೆ. ಪಾನ್ ಅಮೇರಿಕ ಕ್ರೀಡಾ ಸಂಘ, ಮೆಕ್ಸಿಕೊ ಕಾನ್ಸುಲೇಟ್ ಮತ್ತು ಮರ್ಸೋನಿ ಫೌಂಡೇಷನ್ ಆಶ್ರಯದಲ್ಲಿ ಮಿಯಾಮಿಯಲ್ಲಿ ಅಥ್ಲೀಟ್ಗಳಿಗೆ ಲಸಿಕೆ ನೀಡುವ ಕಾರ್ಯ ಆರಂಭವಾಗಿದೆ.
ಆಸ್ಟ್ರೇಲಿಯಾ: ಲಸಿಕೆ ಕಡ್ಡಾಯ ಟೋಕಿಯೊ ಪ್ಯಾರಾಲಿಂಪಿಕ್ಸ್ಗೆ ತೆರಳುವವರು ಕಡ್ಡಾಯವಾಗಿ ಲಸಿಕೆ ಹಾಕಿಸಿಕೊಳ್ಳಬೇಕು ಆಸ್ಟ್ರೇಲಿಯಾ ಸೂಚಿಸಿದೆ. ಪ್ಯಾರಾಲಿಂಪಿಕ್ ಕೂಟ ಆಗಸ್ಟ್ 24ರಿಂದ ಸೆಪ್ಟೆಂಬರ್ 5ರ ವರೆಗೆ ನಡೆಯಲಿದೆ. ಲಸಿಕೆ ಹಾಕಿಸಿಕೊಳ್ಳುವಂತೆ ಅಂತರರಾಷ್ಟ್ರೀಯ ಪ್ಯಾರಾಲಿಂಪಿಕ್ ಸಮಿತಿ ಕೂಡ ಸೂಚಿಸಿದೆ. ಆದರೆ ಕಡ್ಡಾಯ ಮಾಡಿಲ್ಲ.