ಮಂಗಳವಾರ, ಅಕ್ಟೋಬರ್ 20, 2020
25 °C
ಫ್ರೆಂಚ್‌ ಓಪನ್ ಟೆನಿಸ್‌ ಟೂರ್ನಿಯ ಅರ್ಹತಾ ಪಂದ್ಯಗಳು

ಪ್ರಜ್ಞೇಶ್‌ಗೆ ಮುನ್ನಡೆ; ನಗಾಲ್‌ ನಿರ್ಗಮನ

ಪಿಟಿಐ Updated:

ಅಕ್ಷರ ಗಾತ್ರ : | |

Prajavani

ಪ್ಯಾರಿಸ್‌: ಭಾರತದ ಪ್ರಜ್ಞೇಶ್‌ ಗುಣೇಶ್ವರನ್‌ ಅವರು ಫ್ರೆಂಚ್ ಓಪನ್‌ ಟೆನಿಸ್ ಅರ್ಹತಾ ಟೂರ್ನಿಯಲ್ಲಿ ಎರಡನೇ ಸುತ್ತು ಪ್ರವೇಶಿಸಿದರು. ದೇಶದ ಇನ್ನೋರ್ವ ಅಗ್ರಕ್ರಮಾಂಕದ ಆಟಗಾರ ಸುಮಿತ್‌ ನಗಾಲ್‌ ಅವರು ಟೂರ್ನಿಯಿಂದ ಹೊರಬಿದ್ದರು.

16ನೇ ಶ್ರೇಯಾಂಕ ಪಡೆದಿದ್ದ ನಗಾಲ್‌ ಅವರು 6–7, 5–7ರಿಂದ ಜರ್ಮನಿಯ ಅನುಭವಿ ಆಟಗಾರ ಡಸ್ಟಿನ್‌ ಬ್ರೌನ್‌ ಎದುರು ಸೋತರು. 47 ನಿಮಿಷಗಳಲ್ಲಿ ಈ ಪಂದ್ಯ ಮುಗಿಯಿತು. ಇತ್ತೀಚೆಗೆ ಕೊನೆಗೊಂಡ ಅಮೆರಿಕ ಓಪನ್‌ ಟೂರ್ನಿಯ ಮೊದಲ ಸುತ್ತಿನಲ್ಲಿ ಗೆಲ್ಲುವ ಮೂಲಕ ನಗಾಲ್‌ ಅವರು ಏಳು ವರ್ಷಗಳ ಬಳಿಕ ಗ್ರ್ಯಾಂಡ್‌ಸ್ಲಾಮ್‌ ಪಂದ್ಯವೊಂದನ್ನು ಗೆದ್ದ ಭಾರತದ ಆಟಗಾರ ಎನಿಸಿಕೊಂಡಿದ್ದರು.

ಪಂದ್ಯದ ಎರಡನೇ ಸೆಟ್‌ನಲ್ಲಿ ನಗಾಲ್‌ ಅವರಿಗೆ ಉತ್ತಮ ಅವಕಾಶವಿತ್ತು. ಆರಂಭದಲ್ಲಿ 3–0 ಮುನ್ನಡೆಯಲ್ಲಿದ್ದರು. ಆದರೆ ಆ ಬಳಿಕ ಬ್ರೌನ್ ಪಾರಮ್ಯ ಮೆರೆದರು.

ಭಾರತದ ಎರಡನೇ ಕ್ರಮಾಂಕದ ಸಿಂಗಲ್ಸ್‌ ವಿಭಾಗದ ಆಟಗಾರ ಪ್ರಜ್ಞೇಶ್ ಅವರು 6–3, 6–1ರಿಂದ ಟರ್ಕಿಯ ಸೆಮ್‌ ಇಲ್‌ಕೆಲ್‌ ಅವರ ಸವಾಲನ್ನು ಮೀರಿದರು.

ಅರ್ಹತಾ ಟೂರ್ನಿಯಲ್ಲಿರುವ ಭಾರತದ ಇನ್ನೋರ್ವ ಆಟಗಾರ ರಾಮಕುಮಾರ್‌ ರಾಮನಾಥನ್ ಅವರು ಸ್ಥಳೀಯ ಆಟಗಾರ ತ್ರಿಸ್ಟಾನ್‌ ಲ್ಯಾಮಸೈನ್‌ ಎದುರು ಆಡಲಿದ್ದಾರೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು