ಕೆಂಗೇರಿ: ‘ಇಂದಿನ ಕಾಲದ ಮಕ್ಕಳಿಗೆ ಕಲಿಯಲು ಬೇಸಿಗೆ ಶಿಬಿರದ ವೇದಿಕೆಗಳಿವೆ. ನಮ್ಮ ಕಾಲದಲ್ಲಿ ಮರಕೋತಿ ಆಟದಲ್ಲೇ ಬೇಸಿಗೆ ಮುಗಿದು ಹೋಗುತ್ತಿತ್ತು’ ಎಂದು ಬೆಂಗಳೂರು ವಿಶ್ವವಿದ್ಯಾಲಯದ ಕುಲಪತಿ ಕೆ.ಆರ್.ವೇಣುಗೋಪಾಲ್ ತಮ್ಮ ಬಾಲ್ಯ ದಿನಗಳನ್ನು ನೆನಪಿಸಿಕೊಂಡರು.
ವಿಶ್ವವಿದ್ಯಾಲಯದ ಪ್ರದರ್ಶನ ಕಲಾ ವಿಭಾಗದಲ್ಲಿ ಆಯೋಜಿಸಿದ್ದ ಮಕ್ಕಳ ರಂಗಶಿಬಿರ ಉದ್ಘಾಟಿಸಿ ಅವರು ಮಾತನಾಡಿದರು.
‘ಶಿಬಿರದಲ್ಲಿ ನೂರಾರು ಮಕ್ಕಳು ಒಟ್ಟಾಗಿ ಬೆರೆತು ಕಲಿಯುವ ಅವಕಾಶ ದೊರೆಯುತ್ತದೆ. ಅಡಗಿರುವ ವಿಶಿಷ್ಟ ಪ್ರತಿಭೆಯನ್ನು ರಂಗದ ಮೇಲೆ ತೋರ್ಪಡಿಸಿಕೊಳ್ಳಲು ಸಾಧ್ಯವಾಗುತ್ತದೆ. ಇದರಿಂದ ಮಕ್ಕಳಲ್ಲಿ ಚಿಕ್ಕಂದಿನಲ್ಲಿಯೇ ಪ್ರಪಂಚವನ್ನು ಸಕಾರಾತ್ಮಕವಾಗಿ ಎದುರಿಸುವ ಶಕ್ತಿ ವೃದ್ಧಿಸುತ್ತದೆ’ ಎಂದು ಹೇಳಿದರು.
‘ಪಠ್ಯ ಹಾಗೂ ಪರೀಕ್ಷಾ ಒತ್ತಡದಿಂದ ವಿದ್ಯಾರ್ಥಿಗಳು ಹೊರಬರಲು ರಂಗ ಶಿಬಿರಗಳು ಸಹಕಾರಿಯಾಗಿವೆ. ಇಲ್ಲಿ ಅಂಕ ಗಳಿಕೆಯ ಗೋಜಿಲ್ಲ. ಅನುತ್ತೀರ್ಣವಾಗುವ ಭಯವೂ ಇಲ್ಲ’ ಎಂದು ಕುಲಸಚಿವ ಬಿ.ಕೆ.ರವಿ ಹೇಳಿದರು.
ಕಾರ್ಯಕ್ರಮದಲ್ಲಿ 80ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಪಾಲ್ಗೊಂಡಿದ್ದರು. ‘ಶಿಬಿರದಲ್ಲಿ ಜಾನಪದ, ನೃತ್ಯ, ಯೋಗ, ಹಾಡುಗಾರಿಕೆ, ಕುಸುರಿ ಕಲೆಗಳ ತರಬೇತಿ ನೀಡಲಾಗುತ್ತಿದೆ’ ಎಂದು ಪ್ರದರ್ಶನ ಕಲಾ ವಿಭಾಗದ ನಿರ್ದೇಶಕ ರಾಮಕೃಷ್ಣಯ್ಯ ಹೇಳಿದರು.
