ನವದೆಹಲಿ: ಸುಪ್ರೀಂ ಕೋರ್ಟ್ನ ಆವರಣದಲ್ಲಿದ್ದ ಚೀಲವೊಂದರಲ್ಲಿ ಬಾಂಬ್ ಇದೆ ಎನ್ನುವ ಶಂಕೆ ಕೆಲ ಕಾಲ ಸ್ಥಳದಲ್ಲಿ ಆತಂಕ ಮೂಡಿಸಿತ್ತು.
ಕೋರ್ಟ್ ಸಂಖ್ಯೆ 4ರ ಹೊರಗಡೆ ಇದ್ದ ಚೀಲದಿಂದ ‘ಬೀಪ್, ಬೀಪ್...’ ಶಬ್ದ ಕೇಳಿ ಬಂದ ಕಾರಣ ತಕ್ಷಣವೇ ಸ್ಥಳಕ್ಕೆ ಆಗಮಿಸಿದ ಭದ್ರತಾ ಸಿಬ್ಬಂದಿ, ಈ ಪ್ರದೇಶಕ್ಕೆ ಯಾರೂ ಪ್ರವೇಶಿಸದಂತೆ ತಡೆದರು.
ಖಾಲಿ ಜಾಗಕ್ಕೆ ಚೀಲವನ್ನು ತೆಗೆದುಕೊಂಡು ಹೋಗಿ ಪರಿಶೀಲನೆ ನಡೆಸಿದ ಸಂದರ್ಭದಲ್ಲಿ ಅದರೊಳಗೆ ಮೊಬೈಲ್ ಚಾರ್ಜ್ ಮಾಡುವ ಪವರ್ ಬ್ಯಾಂಕ್ ಪತ್ತೆಯಾಗಿದೆ. ‘ಚೀಲ ಹಾಗೂ ಪವರ್ ಬ್ಯಾಂಕ್ ಅನ್ನು ನಿಯಂತ್ರಣ ಕೊಠಡಿಯಲ್ಲಿ ಇಡಲಾಗಿದೆ. ಇದರ ವಾರಸುದಾರರು ಪತ್ತೆಯಾಗಿಲ್ಲ’ ಎಂದು ಅಧಿಕಾರಿಯೊಬ್ಬರು ತಿಳಿಸಿದರು.