ಶವವಾಗಿ ಮಲಗಿದ ಅಮ್ಮನನ್ನು ಎಬ್ಬಿಸುತ್ತಿರುವ ಕಂದ; ಮನಕಲಕುವ ವಿಡಿಯೊ ವೈರಲ್

ಅಮ್ಮನ ದೇಹದ ಮೇಲಿರುವ ಹೊದಿಕೆಯನ್ನು ಎಳೆದು ಆ ಮಗು ಅಮ್ಮನನ್ನು ಎಬ್ಬಿಸಲು ಪ್ರಯತ್ನಿಸುತ್ತಿರುವ ದೃಶ್ಯ ಮನಕಲಕುವಂತಿದೆ.ಅಧಿಕ ಶಾಖ, ಹಸಿವು ಮತ್ತು ನಿರ್ಜಲೀಕರಣದಿಂದ ಬಳಲುತ್ತಿದ್ದುದ್ದೇ ಆಕೆಯ ಸಾವಿಗೆ ಕಾರಣ ಎಂದು ಕುಟುಂಬದವರು ಹೇಳಿದ್ದಾರೆ.

ಬಿಹಾರದ ಮುಜಾಫರ್‌ಪುರ್ ರೈಲು ನಿಲ್ದಾಣಕ್ಕೆ ಸೋಮವಾರ ಬಂದಿಳಿದ ವಲಸೆ ಕಾರ್ಮಿಕರ ವಿಶೇಷ ರೈಲಿನಲ್ಲಿ 23ರ ಹರೆಯದ ಈ ಮಹಿಳೆ ಬಂದಿದ್ದರು. ಅದೇ ನಿಲ್ದಾಣದಲ್ಲಿ 2 ವರ್ಷದ ಮಗು ಕೂಡಾ ಸಾವಿಗೀಡಾಗಿದೆ. ಅಧಿಕ ಶಾಖ ಮತ್ತು ಸರಿಯಾದ ಆಹಾರ ಸಿಗದೆ ಮಗು ಸಾವಿಗೀಡಾಗಿತ್ತು.

ಸರಿಯಾಗಿ ಆಹಾರ, ನೀರು ಸಿಗದೆ ಮಹಿಳೆ ಅಸ್ವಸ್ಥಳಾಗಿದ್ದಳು. ಶನಿವಾರ ಈಕೆ ಗುಜರಾತಿನ ಅಹಮದಾಬಾದ್‌ನಿಂದ ರೈಲು ಹತ್ತಿದ್ದಳು. ಸೋಮವಾರ ಮುಜಾಫರ್‌ಪುರ್‌ಗೆ ರೈಲು ಹೊರಡುವುದಕ್ಕಿಂತ ಸ್ವಲ್ಪ ಮುಂಚೆ ಈಕೆ ಕೊನೆಯುಸಿರೆಳೆದಳು ಎಂದು ಆಕೆಯ ಕುಟುಂಬದವರು ಹೇಳಿದ್ದಾರೆ.

ರೈಲು ನಿಲ್ದಾಣದ ಪ್ಲಾಟ್‌ಫಾರಂನಲ್ಲಿ ಆಕೆಯ ಮೃತದೇಹವಿರಿಸಿದ್ದು, ಇದು ಯಾವುದೂ ಗೊತ್ತೇ ಇಲ್ಲದ ಪುಟ್ಟ ಮಗು ಅಮ್ಮನನ್ನು ಎಬ್ಬಿಸಲು ಪ್ರಯತ್ನಿಸುತ್ತಿತ್ತು. ರೈಲಿಗೆ ಹತ್ತುವ ಮುನ್ನವೇ ಆಕೆ ಅಸ್ವಸ್ಥಳಾಗಿದ್ದಳು. ಆಕೆ ಸಾವಿಗೀಡಾದ ಕಾರಣ ಆ ಕುಟುಂಬ ಮುಜಾಫರ್‌ಪುರ್ ನಿಲ್ದಾಣದಲ್ಲಿ ಇಳಿದಿತ್ತು. ಸಹೋದರಿ, ಸಹೋದರಿಯ ಗಂಡ ಮತ್ತು ಇಬ್ಬರು ಮಕ್ಕಳೊಂದಿಗೆ ಆಕೆ ಕತಿಹಾರ್‌ಗೆ ಪ್ರಯಾಣಿಸುತ್ತಿದ್ದಳು ಎಂದು ರೈಲ್ವೆ ಸಚಿವಾಲಯ ಹೇಳಿದೆ.