ಶುಕ್ರವಾರ, ಫೆಬ್ರವರಿ 21, 2020
20 °C
ಭಾರತೀಯ ವಿಜ್ಞಾನ ಸಂಸ್ಥೆ ಅಧ್ಯಯನ ವರದಿಯಲ್ಲಿ ಉಲ್ಲೇಖ

ಹಾವು ಕಡಿತ: ಔಷಧಿ ಸೀಮಿತ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಬೆಂಗಳೂರು: ನಮ್ಮಲ್ಲಿ 270 ಪ್ರಭೇದಗಳ ಹಾವುಗಳಿದ್ದು, ಅವುಗಳಲ್ಲಿ ನಾಗರಹಾವು, ಕಡಂಬಲ (ಕಾಮನ್‌ ಕ್ರೈಟ್‌) ಸೇರಿದಂತೆ ನಾಲ್ಕು ಪ್ರಭೇದಗಳ ಹಾವು ಕಡಿತಕ್ಕೆ ಮಾತ್ರ ‘ಆ್ಯಂಟಿ ಸ್ನೇಕ್ ವೆನಂ’ ಜೀವರಕ್ಷಕವಾಗಿದೆ ಎನ್ನುವುದು ಭಾರತೀಯ ವಿಜ್ಞಾನ ಸಂಸ್ಥೆ (ಐಐಎಸ್ಸಿ) ನಡೆಸಿದ ಅಧ್ಯಯನದಿಂದ ಸಾಬೀತಾಗಿದೆ.

ಹಾವು ಕಡಿತಕ್ಕೆ ಒಳಗಾದವರನ್ನು ರಕ್ಷಿಸಲು ಇರುವ ಏಕೈಕ ಔಷಧಿ ‘ಆ್ಯಂಟಿ ಸ್ನೇಕ್ ವೆನಂ’. ಆದರೆ, ಈ ಔಷಧಿಯೂ ಉತ್ತಮ ಫಲಿತಾಂಶ ನೀಡುತ್ತಿಲ್ಲ ಎನ್ನುವುದು ಅಧ್ಯಯನದಿಂದ ತಿಳಿದು ಬಂದಿದೆ. ‘ಭಾರತವು ಪ್ರಪಂಚದ ಹಾವು ಕಡಿತದ ರಾಜಧಾನಿ’ ಎಂಬ ಶೀರ್ಷಿಕೆಯಡಿ ನಗರದ ವಿಜ್ಞಾನಿಗಳು ಅಧ್ಯಯನ ನಡೆಸಿದ್ದಾರೆ. ವಿವಿಧ ಸಂಶೋಧನಾ ಸಂಸ್ಥೆಗಳು ಈ ಅಧ್ಯಯನಕ್ಕೆ ನೆರವಾಗಿವೆ.

ನಾಗರಹಾವು, ಕಡಂಬಲ, ಗರಗಸ ಮಂಡಲ ಹಾವು ಹಾಗೂ ಕೊಳಕುಮಂಡಲ ಹಾವಿನ ಕಡಿತಕ್ಕೆ ಆ್ಯಂಟಿ ವೆನಂ ತಯಾರಿಸಲಾಗುತ್ತಿದೆ. ಉಳಿದ ವಿಷಕಾರಿ ಹಾವುಗಳ ಕಡಿತಕ್ಕೆ ಔಷಧಿ ಒದಗಿಸಲು ನಿರ್ದಿಷ್ಟವಾದ ವಿಷ ನಿರ್ಬಂಧಕಗಳು ಉತ್ಪತ್ತಿಯಾಗಿಲ್ಲ. ಕೆಲವೆಡೆ ಸಾಂಪ್ರದಾಯಿಕ ಔಷಧಿಯನ್ನೇ ಬಳಕೆ ಮಾಡಲಾಗುತ್ತಿದ್ದು, ಅದು ನಿರೀಕ್ಷಿತ ಫಲಿತಾಂಶ ನೀಡುತ್ತಿಲ್ಲ. ಇದರಿಂದ ಹಾವು ಕಡಿತದಿಂದ ಸಾಯುವವರ ಸಂಖ್ಯೆ ನಿಯಂತ್ರಣಕ್ಕೆ ಬರುತ್ತಿಲ್ಲ ಎನ್ನುವುದನ್ನು ವರದಿಯಲ್ಲಿ ನಮೂದಿಸಲಾಗಿದೆ.

ವಿಷಗಳಲ್ಲಿ ವ್ಯತ್ಯಾಸ

‘ಮೊದಲ ಹಂತದಲ್ಲಿ ಕಡಂಬಳ, ಕಾಳಿಂಗ ಸೇರಿದಂತೆ ನಿರ್ಲಕ್ಷಿತ ಭಾರತೀಯ ಹಾವುಗಳ ವಿಷಗಳ ವೈಶಿಷ್ಟ್ಯಗಳ ಬಗ್ಗೆ ಅಧ್ಯಯನ ನಡೆಸಿ, ಔಷಧೀಯ ಚಟುವಟಿಕೆಗಳು ಮತ್ತು ಸಾಮರ್ಥ್ಯಗಳನ್ನು ನಿರೂಪಿಸಲಾಯಿತು. ಹಾವುಗಳ ವಿಷ ಸಂಯೋಜನೆಗಳಲ್ಲಿ ಗಮನಾರ್ಹವಾದ ವ್ಯತ್ಯಾಸಗಳನ್ನು ಫಲಿತಾಂಶಗಳು ಬಹಿರಂಗಪಡಿಸಿದವು. ಭೌಗೋಳಿಕವಾಗಿ ಬೇರ್ಪಟ್ಟ ಒಂದೇ ಜಾತಿಯ ಗುಂಪುಗಳ ನಡುವೆ ವಿಷದ ಸಂಯೋಜನೆ ಭಿನ್ನವಾಗಿರುವುದು ಬೆಳಕಿಗೆ ಬಂದಿದೆ’ ಎಂದು ಸಂಸ್ಥೆ ವಿಜ್ಞಾನಿ ಡಾ.ಕಾರ್ತಿಕ್ ಸುಣಗಾರ್ ತಿಳಿಸಿದರು.

‘ಪಶ್ಚಿಮ ಬಂಗಾಳ, ಅರುಣಾಚಲ ಪ್ರದೇಶದಲ್ಲಿ ಕಂಡುಬರುವ ಒಂದೇ ಪ್ರಭೇದಗಳ ಹಾವುಗಳ ವಿಷಗಳಲ್ಲಿ ಗಮನಾರ್ಹ ವ್ಯತ್ಯಾಸಗಳನ್ನು ಗಮನಿಸಲಾಯಿತು. ಪಶ್ಚಿಮ ಬಂಗಾಳದ ನಾಗರಹಾವಿನ ವಿಷ ನರಮಂಡಲಕ್ಕೆ ಹಾನಿ ಮಾಡಿದರೆ, ಅರುಣಾಚಲ ಪ್ರದೇಶದ ನಾಗರ ಹಾವಿನ ವಿಷ ಅಂಗಾಂಗಗಳಿಗೆ ಹಾನಿ ಮಾಡುತ್ತದೆ’ ಎಂದರು.

ವಿಷದ ಪರಿಣಾಮಗಳನ್ನು ನಿವಾರಿಸಲು ವಿಷ ನಿರ್ಬಂಧಕಗಳು ಸಂಪೂರ್ಣ ಅಸಮರ್ಥವಾಗಿವೆ ಎನ್ನುವುದೂ ಸಾಬೀತಾಗಿದೆ. ಇಲಿಗಳ ಮಾದರಿಯ ಮೇಲೆ ಈ ಪ್ರಯೋಗ ಮಾಡಲಾಗಿದೆ. ಅರುಣಾಚಲ ಪ್ರದೇಶದ ನಾಗರಹಾವಿನ ವಿಷದ ವಿರುದ್ಧ ಈ ವಿಷ ನಿರ್ಬಂಧಕ ಪರಿಣಾಮ ಬೀರಿಲ್ಲ ಎಂದು ಹೇಳಿದರು.

ಕಟ್ಟುಹಾವಿನ ವಿಷಕ್ಕೆ ಸ್ಪಂದಿಸದ ಔಷಧಿ

ಅಧ್ಯಯನದ ಎರಡನೇ ಭಾಗದಲ್ಲಿ ಸಂಶೋಧನಾ ತಂಡವು ಇಲ್ಲಿ ಬಳಕೆಯಲ್ಲಿರುವ ಆ್ಯಂಟಿ ಸ್ನೇಕ್ ವೆನಂ ಬಗ್ಗೆ ಮೌಲ್ಯಮಾಪನ ಮಾಡಿದೆ. ಪಶ್ಚಿಮ ಭಾರತದಿಂದ ಬಂದ ಕಟ್ಟುಹಾವಿನ ವಿಷವು ನಾಗರಹಾವಿನ ವಿಷಕ್ಕಿಂತ 40 ಪಟ್ಟು ಹೆಚ್ಚು ಪ್ರಬಲವಾಗಿರುವುದು ತಿಳಿದು ಬಂದಿದೆ.

‘ಆ್ಯಂಟಿ ಸ್ನೇಕ್ ವೆನಂ ಕಟ್ಟು ಹಾವಿನ ವಿಷವನ್ನು ಪರಿಣಾಮಕಾರಿಯಾಗಿ ತಟಸ್ಥಗೊಳಿಸಲು ಸಂಪೂರ್ಣವಾಗಿ ವಿಫಲವಾಗಿದೆ. ವಿಷ ನಿರ್ಬಂಧಕ ತಯಾರಕರು, ಸಾರ್ವಜನಿಕ ಆರೋಗ್ಯ ಅಧಿಕಾರಿಗಳು, ನೀತಿ ನಿರೂಪಕರು ಒಟ್ಟಾಗಿ ನಿರ್ಲಕ್ಷಿತ ಪ್ರಭೇದಗಳಿಗೆ ಚಿಕಿತ್ಸೆಗಳನ್ನು ಅಭಿವೃದ್ಧಿಪಡಿಸುವ ಅವಶ್ಯಕತೆಯಿದೆ’ ಎಂದು ಡಾ.ಸುಣಗಾರ್ ತಿಳಿಸಿದರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)