ವಾಟ್ಸ್‌ಆ್ಯಪ್‌ಗೆ ದಿಢೀರ್‌ ಪೈಪೋಟಿ ನೀಡಿದ್ದ ಮೆಸೇಜಿಂಗ್‌ ಆ್ಯಪ್ 'ಸಿಗ್ನಲ್'ನ ಕಾರ್ಯಸ್ಥಗಿತಗೊಂಡಿದೆ.
ಬಳಕೆದಾರರ ಭದ್ರತೆ ಮತ್ತು ಗೋಪ್ಯತೆಗೆ ಸಂಬಂಧಿಸಿದಂತೆ ವಾಟ್ಸ್‌ಆ್ಯಪ್‌ ಬಗ್ಗೆ ಸೃಷ್ಟಿಯಾಗಿದ್ದ ಗೊಂದಲಗಳಿಂದಾಗಿ ಭಾರತದಲ್ಲಿ ಸಿಗ್ನಲ್ ಆ್ಯಪ್‌ನ ಬಳಕೆದಾರರ ಸಂಖ್ಯೆಯಲ್ಲಿ ತೀವ್ರ ಏರಿಕೆ ಕಂಡುಬಂದಿತ್ತು.
ಈ ಬಗ್ಗೆ ಶುಕ್ರವಾರ ರಾತ್ರಿ ಟ್ವೀಟ್‌ ಮಾಡಿರುವ ಸಿಗ್ನಲ್ ಕಂಪನಿಯು, 'ನಾವು ತಾಂತ್ರಿಕ ತೊಂದರೆಗಳನ್ನು ಎದುರಿಸುತ್ತಿದ್ದೇವೆ. ಸಾಧ್ಯವಾದಷ್ಟು ಬೇಗ ಸೇವೆಗೆ ಮರಳಲು ಶ್ರಮಿಸುತ್ತಿದ್ದೇವೆ.' ಎಂದು ತಿಳಿಸಿದೆ.
'ನಾವು ಹೆಚ್ಚುವರಿ ಸಾಮರ್ಥ್ಯ ಹೊಂದಿರುವ ಹೊಸ ಸರ್ವರ್‌ಗಳನ್ನು ತಡೆರಹಿತವಾಗಿ ಅಳವಡಿಸುತ್ತಿದ್ದೇವೆ. ಲಕ್ಷಾಂತರ ಹೊಸ ಬಳಕೆದಾರರು ಗೋಪ್ಯತೆಗೆ ಸಂಬಂಧಿಸಿದ ಸಂದೇಶಗಳನ್ನು ಕಳುಹಿಸುತ್ತಿದ್ದಾರೆ. ನಿಮ್ಮ ತಾಳ್ಮೆಯನ್ನು ನಾವು ಪ್ರಶಂಸಿಸುತ್ತೇವೆ' ಎಂದು ಸಿಗ್ನಲ್ ಹೇಳಿದೆ.
ಖಾಸಗಿ ಮಾಹಿತಿ ಸುರಕ್ಷತೆ ಮತ್ತು ಗೋಪ್ಯತೆಗೆ ಸಂಬಂಧಿಸಿದಂತೆ ವಾಟ್ಸ್‌ಆ್ಯಪ್‌ ಬಗ್ಗೆ ಜಗತ್ತಿನಾದ್ಯಂತ ವಿವಾದ ಸೃಷ್ಟಿಯಾಗಿತ್ತು. ಅದರ ಬೆನ್ನಲ್ಲೇ ವಾಟ್ಸ್‌ಆ್ಯಪ್‌ ಬಳಕೆದಾರರು ಸ್ವಯಂ ಪ್ರೇರಿತರಾಗಿ ಸಿಗ್ನಲ್ ಆ್ಯಪ್ ಡೌನ್‌ಲೋಡ್‌ ಮಾಡಿಕೊಂಡಿದ್ದರು. ಅದರಲ್ಲೂ ಭಾರತದಲ್ಲಿ ಹೆಚ್ಚು ಜನ 'ಸಿಗ್ನಲ್' ಬಳಕೆಯನ್ನು ಆರಂಭಿಸಿದ್ದರು.
