ನವದೆಹಲಿ: ಕೇಂದ್ರದ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯದ ಟ್ವಿಟರ್‌ ಖಾತೆ ಬುಧವಾರ ಹ್ಯಾಕ್‌ ಆಗಿತ್ತು. ಆ ಖಾತೆಯನ್ನು ನಿಯಂತ್ರಣಕ್ಕೆ ತೆಗೆದುಕೊಂಡಿದ್ದ ಹ್ಯಾಕರ್‌ಗಳು, ಖಾತೆಯ ಹೆಸರನ್ನು ಅಮೆರಿಕದ ಉದ್ಯಮಿ 'ಇಲಾನ್‌ ಮಸ್ಕ್‌' ಎಂದು ಬದಲಿಸಿ, 'ಗ್ರೇಟ್‌ ಜಾಬ್‌' (ಅತ್ಯುತ್ತಮ ಕೆಲಸ) ಎಂದು ಟ್ವೀಟಿಸಿದ್ದರು.
ಕೆಲ ಸಮಯದಲ್ಲೇ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯದ ಟ್ವಿಟರ್‌ ಖಾತೆಯನ್ನು ಹಿಡಿತಕ್ಕೆ ತೆಗೆದುಕೊಳ್ಳಲಾಗಿದೆ ಹಾಗೂ ಹ್ಯಾಕರ್‌ಗಳು ಮಾಡಿದ್ದ ಪೋಸ್ಟ್‌ಗಳ‌ನ್ನು ಅಳಿಸಿ ಹಾಕಲಾಗಿದೆ. '@Mib_india ಖಾತೆ ಪುನಃ ಸ್ಥಾಪಿಸಲಾಗಿದೆ. ಖಾತೆಯನ್ನು ಫಾಲೋ ಮಾಡುತ್ತಿರುವ ಎಲ್ಲರ ಮಾಹಿತಿಗಾಗಿ...' ಎಂದು ಸಚಿವಾಲಯದ ಖಾತೆಯು ಪ್ರಕಟಿಸಿದೆ.
ಆ ಟ್ವಿಟರ್‌ ಖಾತೆಯನ್ನು 14 ಲಕ್ಷ ಜನ ಫಾಲೋ ಮಾಡುತ್ತಿದ್ದಾರೆ.
The account @Mib_india has been restored. This is for the information of all the followers.
— Ministry of Information and Broadcasting (@MIB_India) January 12, 2022
ಕಳೆದ ತಿಂಗಳು ಪ್ರಧಾನಿ ನರೇಂದ್ರ ಮೋದಿ ಅವರ ಟ್ವಿಟರ್‌ ಖಾತೆ ಸಹ ಹ್ಯಾಕ್‌ ಆಗಿತ್ತು ಹಾಗೂ ಹ್ಯಾಕರ್‌ಗಳು, 'ಭಾರತದಲ್ಲಿ ಬಿಟ್‌ಕಾಯಿನ್‌ ಅನ್ನು ಅಧಿಕೃತಗೊಳಿಸಲಾಗಿದೆ...' ಎಂದು ಪ್ರಕಟಿಸಿದ್ದರು.
'ಪ್ರಧಾನಿ ನರೇಂದ್ರ ಮೋದಿ ಅವರ ಟ್ವಿಟರ್‌ ಖಾತೆಯು ಕೆಲ ಸಮಯ ನಿಯಂತ್ರಣ ಕಳೆದುಕೊಂಡಿತ್ತು. ಟ್ವಿಟರ್‌ ಸಂಸ್ಥೆಯೊಂದಿಗೆ ವಿಷಯ ಪ್ರಸ್ತಾಪಿ, ತಕ್ಷಣವೇ ಖಾತೆಯನ್ನು ಸುರಕ್ಷಿತಗೊಳಿಸಲಾಯಿತು. ನಿಯಂತ್ರಣ ಕಳೆದುಕೊಂಡಿದ್ದ ಅವಧಿಯಲ್ಲಿ ಪ್ರಕಟಿಸಿರುವ ಟ್ವೀಟ್‌ಗಳನ್ನು ಕಡೆಗಣಿಸುವಂತೆ' ಪ್ರಧಾನಿ ಕಾರ್ಯಾಲಯವು ಪ್ರಕಟಿಸಿತ್ತು.
