<p>ಕವಿತೆ | ಪೂರ್ಣದೃಷ್ಟಿ</p>.<p>'ನಾ ಹೇಗೆ ಕಾಣಬಹುದು ಸತ್ತ ಮೇಲೆ?'<br />ಕೇಳಿದೆ ಹೆಂಡತಿಯನ್ನು.<br />'ಥೂ ಬಿಡ್ತು ಅನ್ನಿ ಮೊದಲು' ಅಂದಳು<br />ಬಿಟ್ಟು ಕೆಂಗಣ್ಣು.</p>.<p>'ಸರಿಯಾಗಿ ಕೇಳಿಸಿಕೊಳ್ಳೇ ನನ್ನ ಮಾತ'<br />ಅಂದೆ ನಗುತ್ತ,<br />'ನಾ ಸತ್ತ ಮೇಲೆ ಕಾಣಲು ನನಗೆ<br />ಕಣ್ಣಿರುತ್ತಾ?'</p>.<p>'ರಾಮ ರಾಮಾ! ನಾ ಕೇಳಲಾರೆ' ಅಂದಳು<br />'ಏನಾಗಿದೆ ನಿಮಗೆ?'<br />'ನಿಜ, ನಾನೂ ಕೇಳಲಾರೆ ಆಗ ಬಹುಶಃ<br />ಅನ್ನಿಸುತ್ತೆ ನನಗೆ.</p>.<p>‘ಆತ್ಮಕ್ಕೆ ಕಿವಿಯಿರುತ್ತಾ ಕೇಳಲು?<br />ಪರಮಾತ್ಮನೇ ಬಲ್ಲ.<br />ಇದೆಲ್ಲ ಗಹನ ಗಂಭೀರ ಜಿಜ್ಞಾಸೆ,<br />ನಿನಗೆ ಅರ್ಥವಾಗೋಲ್ಲ.’</p>.<p>‘ಓ ಹಾಗೋ? ಸರಿ, ನನ್ನದೂ ಒಂದು ಪ್ರಶ್ನೆ,<br />ಉತ್ತರ ಹೇಳ್ತೀರಾ?<br />ಇದು ಸತ್ತ ಮೇಲಿನ ಸಂಗತಿಯಲ್ಲ,<br />ಇರುವಾಗಿನ ವಿಚಾರ.</p>.<p>‘ಅರ್ಧನಾರೀಶ್ವರನಿಗೆ ಪೂರ್ಣದೃಷ್ಟಿ<br />ದಕ್ಕೋದು ಯಾವಾಗ?<br />ಎರಡೂ ಕಣ್ಣಿಂದ ಕಂಡಾಗ ತಾನೆ?’<br />ಅವಾಕ್ಕು ನಾನೀಗ!</p>.<div><p><strong>ತಾಜಾ ಸುದ್ದಿಗಾಗಿ <a href="https://t.me/Prajavani1947">ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್</a> ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: <a href="https://play.google.com/store/apps/details?id=com.tpml.pv">ಆಂಡ್ರಾಯ್ಡ್ </a>| <a href="https://apps.apple.com/in/app/prajavani-kannada-news-app/id1535764933">ಐಒಎಸ್</a> | ನಮ್ಮ <a href="https://www.facebook.com/prajavani.net">ಫೇಸ್ಬುಕ್ ಪುಟ</a> ಫಾಲೋ ಮಾಡಿ.</strong></p></div>