ಬರಲಿ ಮನೆಗೆ ‘ಆಡು–ಹುಲಿ’

ಬಹುತೇಕ ಮಕ್ಕಳಿಗೆ ಚೆಸ್‌ ಕಲಿಸಲು ಪೋಷಕರು ಉತ್ಸುಕರಾಗಿರುತ್ತಾರೆ. ಆದರೆ, ಚೆಸ್‌ಗೆ ಪೂರ್ವ ತಯಾರಿಯಾಗಿ ನವಕಂಕರಿ ಮತ್ತು ಶೊಲೋ ಗುಟ್ಟಿ ಆಟಗಳನ್ನು ಆಡಲು ಕಲಿತರೆ ಚೆಸ್‌ ಆಟಕ್ಕೆ ಅಗತ್ಯವಿರುವ ಪಟ್ಟುಗಳನ್ನು ಕಲಿಯಲು ಸಹಾಯವಾಗುತ್ತದೆ. ಶೊಲೋ ಗುಟ್ಟಿ 16 ಯೋಧರ ದಾಳವಿರುವ ಆಟ. ಮಿದುಳನ್ನು ಕ್ರಿಯಾಶೀಲಗೊಳಿಸಲು ಅಗತ್ಯವಿರುವ ದೇಸಿ ಆಟಗಳಿವು. ಆಡು –ಹುಲಿಯಾಟ ತಂತ್ರಗಾರಿಕೆಯ ಆಟವಾಗಿದ್ದರಿಂದ ಮಿದುಳು ಚುರುಕಾಗಲು, ಒತ್ತಡ ನಿವಾರಣೆಗೆ ಸಹಕಾರಿ. ಹಿರಿಯ ನಾಗರಿಕರಲ್ಲಿ ಮರೆವಿನ ಶಕ್ತಿಯಿದ್ದರೆ, ಇದರ ಬಳಕೆಯಿಂದ ಲಾಭವಾಗುತ್ತದೆ. ತರ್ಕಿಸುವ ಮನೋಭಾವ ಹೆಚ್ಚಿಸುತ್ತದೆ ಎನ್ನುತ್ತಾರೆ ತನುಶ್ರೀ. ದೇಶದ ಯಾವುದೇ ಭಾಗಗಳಿಗೆ ಹೋದರೂ ಒಳಾಂಗಣದ ಆಟಗಳೆಲ್ಲವೂ ಬೇರೆ ಬೇರೆ ಹೆಸರಿನಲ್ಲಿ ಕರೆದರೂ ಬಹುತೇಕ ಒಂದೇ ರೀತಿ ಇರುತ್ತವೆ. ಆದರೆ, ಆಡುವ ವಿಧಾನ, ನಿಯಮಗಳು ತುಸು ಭಿನ್ನವಾಗಿರುತ್ತವೆ.

ಮಕ್ಕಳಿಗಾಗಿ ವಿಷ್ಣುವಿನ ದಶಾವತಾರ, ರಾಮಾಯಣ, ಮಹಾಭಾರತ ಪಝಲ್ಸ್‌, ಚೆಸ್‌, ಬೋರ್ಡ್‌ಗಳಿವೆ. ಚಿಕ್ಕವಯಸ್ಸಿನ ಮಕ್ಕಳಿಗೆ ಬಾರ್ಬಿ, ಸ್ಪೈಡರ್‌ ಮ್ಯಾನ್‌, ಸೂಪರ್‌ಮ್ಯಾನ್‌ ಗಳಿರುವ ಪಝಲ್‌ ಬೋರ್ಡ್‌ ಗೊತ್ತು. ಆದರೆ, ಈ ನೆಲದ ಕಥೆಗಳನ್ನು, ಪೌರಾಣಿಕ ಕಥೆಗಳನ್ನು ಈ ಪಝಲ್ಸ್‌ ಬೋರ್ಡ್‌ ಮೂಲಕ ಕಲಿಸಬಹುದು. ಇದರ ಜತೆಗೆ ಬಣ್ಣ ಹಚ್ಚುವ ಶೀಟ್‌ಗಳಿರುತ್ತವೆ. ಹೆಚ್ಚಿನ ಮಾಹಿತಿಗೆ ಕ್ಯುಆರ್‌ ಕೋಡ್‌ ಕೂಡ ನೀಡಲಾಗಿದೆ.