ಮನಿಲಾ: ಫಿಲಿಪ್ಪೀನ್ಸ್‌ನಲ್ಲಿ ಬುಧವಾರ ತಡರಾತ್ರಿ ಅಪ್ಪಳಿಸಿದ ವಾಮ್ಕೊ ಚಂಡಮಾರುತದಿಂದಾಗಿ 42 ಮಂದಿ ಮೃತಪಟ್ಟಿದ್ದು, 32 ಮಂದಿ ನಾಪತ್ತೆಯಾಗಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದರು.
ಮನಿಲಾದಲ್ಲಿ ಚಂಡಮಾರುತದಿಂದಾಗಿ ಮನೆಗಳು ಭಾಗಶಃ ಹಾನಿಗೊಳಗಾಗಿದ್ದು,ಮನೆಗಳ ಸುತ್ತಲೂ ಮಣ್ಣು ತುಂಬಿ ಹೋಗಿದೆ.ಈವರೆಗೆ ಸಾವಿರಾರು ಮಂದಿಯನ್ನು ರಕ್ಷಿಸಲಾಗಿದೆ. ಸೇನಾ ಪಡೆಯು ಹೆಚ್ಚುನೀರು ತುಂಬಿದ ಪ್ರದೇಶಗಳಿಂದ ಜನರನ್ನು ರಕ್ಷಿಸುವ ಕಾರ್ಯದಲ್ಲಿ ನಿರತವಾಗಿದೆ ಎಂದು ಸೇನಾ ಸಿಬ್ಬಂದಿ ಮುಖ್ಯಸ್ಥ ಜನರಲ್‌ ಗಿಲರ್ಬಟ್‌ ಗೊಪಾಯ್‌ ಅವರು ತಿಳಿಸಿದರು.
ವಾಮ್ಕೊ ಚಂಡಮಾರುತವು ಉತ್ತರ ಮನಿಲಾದ ಬುಲಾಕನ್ ಮತ್ತು ಪಂಪಂಗಾ ಪ್ರಾಂತ್ಯಗಳಲ್ಲಿ ಗುರುವಾರ ಬುಧವಾರ ತಡರಾತ್ರಿ ಅಪ್ಪಳಿಸಿದೆ. ಇದರಿಂದಾಗಿ ಮನೆಗಳು, ವಿದ್ಯುತ್‌ ಕಂಬಗಳು, ಮರಗಳು ಹಾನಿಗೊಳಗಾಗಿವೆ ಎಂದು ಅಧಿಕಾರಿಗಳು ಹೇಳಿದರು.
ಈವರೆಗೆ ಕರಾವಳಿ ಮತ್ತು ತಗ್ಗು ಪ್ರದೇಶದಿಂದ 3,50,000 ಮಂದಿಯನ್ನು ಸುರಕ್ಷಿತ ಪ್ರದೇಶಕ್ಕೆ ಸ್ಥಳಾಂತರಿಸಲಾಗಿದೆ. ಮನಿಲಾದಲ್ಲಿ 41,000 ಸೇರಿದಂತೆ 100,000 ಕ್ಕೂ ಹೆಚ್ಚು ಜನರನ್ನು ರಕ್ಷಿಸಲಾಗಿದೆ ಎಂದು ಫಿಲಿಪ್ಪೀನ್ಸ್‌ ರಾಷ್ಟ್ರೀಯ ಪೊಲೀಸರು ತಿಳಿಸಿದ್ದಾರೆ.
