ಬರ್ಮಿಂಗ್‌ಹ್ಯಾಮ್‌ನಲ್ಲಿ ತನ್ನ ಕುಟುಂಬದೊಂದಿಗೆ ವಾಸಿಸುತ್ತಿರುವ ದಯಾಳ್‌ ಕೌರ್‌, ಸಣ್ಣ ವಯಸ್ಸಿನಲ್ಲೇ ಕಲಿಕಾ ಸಾಮರ್ಥ್ಯವನ್ನು ಪ್ರಸ್ತುತಪಡಿಸಿದ್ದಳು. ಕೇವಲ 14 ತಿಂಗಳಲ್ಲೇ ಇಂಗ್ಲಿಷ್‌ನ ಎಲ್ಲ ವರ್ಣಮಾಲೆಯನ್ನು ಕಲಿತಿದ್ದ ಕೌರ್‌, ಮೆನ್ಸಾ ಪರೀಕ್ಷೆ ಬರೆಯುವ ಆಸಕ್ತಿ ತೋರಿದ್ದಳು. ಕೋವಿಡ್‌–19 ಕಾರಣದಿಂದಾಗಿ ಪ್ರಸಕ್ತ ವರ್ಷದಲ್ಲಿ ಆನ್‌ಲೈನ್‌ ಮೂಲಕ ನಡೆದ ಪರೀಕ್ಷೆಯಲ್ಲಿ 145 ಐಕ್ಯೂ ಅಂಕ ಪಡೆದಿದ್ದಾಳೆ. ಈ ಮೂಲಕ ಬ್ರಿಟನ್‌ನ ಜನಸಂಖ್ಯೆಯಲ್ಲಿ ಅತ್ಯಂತ ಪ್ರತಿಭಾವಂತ, ಹೆಚ್ಚಿನ ಬುದ್ಧಿಶಕ್ತಿಯುಳ್ಳ ಶೇ 1 ಜನಸಂಖ್ಯೆಗೆ ಕೌರ್‌ ಸೇರ್ಪಡೆಯಾಗಿದ್ದಾಳೆ.
