ಜಾರ್ಜ್ ಫ್ಲಾಯ್ಡ್ ಸಾವಿನ ಪ್ರಕರಣ: ವಿಚಾರಣೆ ವಿಡಿಯೊ ಚಿತ್ರೀಕರಣಕ್ಕೆ ಆಗ್ರಹ
ಮಿನಿಯಾಪೊಲಿಸ್: ತೀವ್ರ ಚರ್ಚೆಗೆ ಗ್ರಾಸವಾಗಿದ್ದ ಕಪ್ಪು ವರ್ಣೀಯ ಜಾರ್ಜ್ ಫ್ಲಾಯ್ಡ್ ಸಾವಿನ ಪ್ರಕರಣದ ವಿಚಾರಣೆಯ ವಿಡಿಯೊ ಚಿತ್ರೀಕರಣಕ್ಕೆ ಅವಕಾಶ ಕಲ್ಪಿಸಬೇಕು ಎಂಬ ಬೇಡಿಕೆ ಕುರಿತು ನ್ಯಾಯಾಲಯ ಇನ್ನೂ ತೀರ್ಮಾನ ತೆಗೆದುಕೊಂಡಿಲ್ಲ.
ಜಾರ್ಜ್ ಫ್ಲಾಯ್ಡ್ ಸಾವಿಗೆ ಕಾರಣವಾದ ಪೊಲೀಸರ ಹಿಂಸೆ ವಿರುದ್ಧವಿಶ್ವದ ಹಲವೆಡೆ ಪ್ರತಿಭಟನೆಗಳು ನಡೆದಿವೆ. ಇಂತಹ ಪ್ರಕರಣದ ವಿಚಾರಣೆ ವೀಕ್ಷಿಸುವ ಅವಕಾಶ ಜನರಿಗೆ ಇರಬೇಕು. ಕೋವಿಡ್ ಹಿನ್ನೆಲೆಯಲ್ಲಿ ಕ್ಯಾಮೆರಾಗಳ ಉಪಸ್ಥಿತಿಗೆ ಅವಕಾಶ ಕಲ್ಪಿಸುವುದು ಸೂಕ್ತ ಮತ್ತು ಇದು ಅದಕ್ಕೆ ಅರ್ಹವಾದ ಪ್ರಕರಣ ಎಂಬಆಗ್ರಹಈಗ ಕೇಳಿಬಂದಿದೆ.
ಆದರೆ, ಇದಕ್ಕೆ ಮಿನಿಯಾಪೊಲೀಸ್ ರಾಜ್ಯದ ಅಟಾರ್ನಿ ಜನರಲ್ ವಿರೋಧವ್ಯಕ್ತಪಡಿಸಿದ್ದಾರೆ. ಕ್ಯಾಮೆರಾಗಳ ಉಪಸ್ಥಿತಿಯಿಂದ ಸಮಸ್ಯೆ ಉಂಟಾಗಬಹುದು ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.
‘ಇಂತಹ ಪ್ರಕರಣಗಳ ವಿಚಾರಣೆ ಹೇಗೆ ನಡೆಯುತ್ತದೆ ಎಂದು ತಿಳಿಯುವ ಕುತೂಹಲ ಜನರಲ್ಲಿ ಇರುತ್ತದೆ. ವಿಚಾರಣೆ ನೋಡಲು ಸಾಧ್ಯವಾಗದಿದ್ದರೆ, ಸಾರ್ವಜನಿಕರು ಅದನ್ನು ನಂಬುವುದಿಲ್ಲ’ ಎಂದು ಸಿಲ್ಹಾ ಸೆಂಟರ್ ಫಾರ್ ದಿ ಸ್ಟಡಿ ಆಫ್ ಮಿಡಿಯಾ ಎಥಿಕ್ಸ್ ಅಂಡ್ ಲಾ ಸಂಸಥೆಯ ನಿರ್ದೇಶಕಜೇನ್ ಕಿರ್ಟ್ಲಿ ಅವರು ಅಭಿಪ್ರಾಯಪಟ್ಟರು.
ಈ ವರ್ಷದ ಜೂನ್ ತಿಂಗಳಲ್ಲಿ ನ್ಯಾಯಮೂರ್ತಿ ಪೀಟರ್ ಕಹಿಲ್ ಅವರು, ಪೂರ್ವ ವಿಚಾರಣೆ ಕಲಾಪದ ಧ್ವನಿಮುದ್ರಣ ಮತ್ತು ವಿಡಿಯೊ ಚಿತ್ರೀಕರಣಕ್ಕೆ ಅವಕಾಶ ಕಲ್ಪಿಸದಿರಲು ನಿರ್ಧರಿಸಿದ್ದರು. ಈಗ ಕ್ಯಾಮೆರಾಗಳ ಉಪಸ್ಥಿತಿಗೆ ಅವಕಾಶ ನೀಡುವ ಕುರಿತು ನಂತರ ತೀರ್ಮಾನ ಮಾಡಲಿದ್ದೇನೆ ಎಂದು ತಿಳಿಸಿದ್ದಾರೆ. ಆದರೆ, ರೂಲಿಂಗ್ ಎಂದು ಹೊರಬೀಳಲಿದೆ ಎಂಬುದು ಸ್ಪಷ್ಟವಿಲ್ಲ.
ಈ ವರ್ಷದ ಮೇ 25ರಂದು ಕಪ್ಪು ವರ್ಣೀಯ ಜಾರ್ಜ್ ಫ್ಲಾಯ್ಡ್ ಅವರು ಪೊಲೀಸರ ಹಿಂಸೆಯಿಂದಾಗಿ ಮೃತಪಟ್ಟಿದ್ದರು. ಸರ್ವರ್ಣೀಯ ಅಧಿಕಾರಿಯು ಫ್ಲಾಯ್ಡ್ ಕತ್ತಿನ ಮೇಲೆ ಮಂಡಿಯೂರಿದ್ದರಿಂದ ಉಸಿರಾಡಲಾಗದೇ ಅಸುನೀಗಿದ್ದರು. ಅಧಿಕಾರಿ ಡೆರ್ರೆಕ್ ಚೌವಿನ್ ಸೇರಿ ನಾಲ್ವರು ಅಧಿಕಾರಿಗಳ ವಿರುದ್ಧ ಮೊಕದ್ದಮೆ ದಾಖಲಾಗಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.