ಕೀವ್: ಝಪೋರಿಝ್ಯಾ ಪರಮಾಣು ವಿದ್ಯುತ್ ಸ್ಥಾವರ ಈಗ ಸುರಕ್ಷಿತವಾಗಿದೆ ಎಂದು ಉಕ್ರೇನ್ ಸರ್ಕಾರ ಘೋಷಿಸಿದೆ.
ಉಕ್ರೇನ್ ವಿರುದ್ಧ ಯುದ್ಧ ಸಾರಿರುವ ರಷ್ಯಾ, ಶುಕ್ರವಾರ ಅಣುಸ್ಥಾವರದ ಮೇಲೆ ಶೆಲ್ ದಾಳಿ ಆರಂಭಿಸಿತ್ತು. ಹೀಗಾಗಿ ಸ್ಥಾವರದ ಆವರಣದಲ್ಲಿ ಬೆಂಕಿ ಕಾಣಿಸಿಕೊಂಡಿತ್ತು.
‘ಈಗ ಪರಮಾಣು ಸ್ಥಾವರ ಸುರಕ್ಷಿತವಾಗಿದೆ ಎಂದು ಸ್ಥಾವರದ ನಿರ್ದೇಶಕರು ಹೇಳಿದ್ದಾರೆ. ಘಟಕದ ತರಬೇತಿ ಕಟ್ಟಡ ಮತ್ತು ಪ್ರಯೋಗಾಲಯವು ಬೆಂಕಿಗೆ ಆಹುತಿಯಾಗಿದೆ ಎಂದು ನಿರ್ವಾಹಕರು ಹೇಳಿದ್ದಾರೆ’ ಎಂದು ಝಪೋರಿಝ್ಯಾ ಪ್ರದೇಶದ ಮಿಲಿಟರಿ ಆಡಳಿತದ ಮುಖ್ಯಸ್ಥ ಒಲೆಕ್ಸಾಂಡರ್ ಸ್ಟಾರುಖ್ ಮಾಹಿತಿ ನೀಡಿದ್ದಾರೆ.
ದಾಳಿಯಲ್ಲಿ, ಸ್ಥಾವರದ ಅಗತ್ಯ ಉಪಕರಣಗಳು ಹಾನಿಗೀಡಾಗಿಲ್ಲ ಎಂದು ವಿಶ್ವಸಂಸ್ಥೆಯ ಪರಮಾಣು ವಿಚಕ್ಷಣ ವಿಭಾಗದಸ್ಥಳೀಯ ಅಧಿಕಾರಿಗಳು ತಿಳಿಸಿದ್ದಾರೆ.
ಸ್ಥಾವರದಲ್ಲಿವಿಕಿರಣದ ಮಟ್ಟ ಹೆಚ್ಚಿರುವ ಬಗ್ಗೆ ಯಾವುದೇ ಸೂಚನೆಗಳಿಲ್ಲ ಎಂದು ಅಮೆರಿಕದ ಅಧಿಕಾರಿಗಳು ತಿಳಿಸಿದ್ದಾರೆ.
ಝಪೋರಿಝ್ಯಾ ಮೇಲೆ ದಾಳಿ ಆರಂಭವಾಗುತ್ತಲೇ ಅಮೆರಿಕದ ಅಧ್ಯಕ್ಷ ಜೊ ಬೈಡನ್ ಅವರು ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಫೋನ್ನಲ್ಲಿ ಚರ್ಚೆ ನಡೆಸಿ ಮಾಹಿತಿ ಪಡೆದಿದ್ದರು.
ನಂತರ ಹೇಳಿಕೆ ನೀಡಿದ್ದ ಝೆಲೆನ್ಸ್ಕಿ ‘ಚರ್ನೋಬಿಲ್ ದುರಂತ ಮರುಕಳಿಸಬೇಕೆಂದು ರಷ್ಯಾ ಬಯಸುತ್ತಿದೆ. ಅದು ಅಣುಭಯೋತ್ಪಾದನೆ ನಡೆಸುತ್ತಿದೆ’ ಎಂದು ವಾಗ್ದಾಳಿ ನಡೆಸಿದ್ದಾರೆ.